YETSAPIU 12 - BAIBEL (BSI)

¹ Nono lhothemi shiaphi lono oLhophe keu kumsulu lo, atsala kuzuqo sholumphi lono, ti ohaluveno nono “Niye akuxu azuzuvae” ipi nanike.

² Tipauye kughono tsukinhe kuvu, aqhi kuvu eno ayepu kuvuno oghenguno zamimeive nikeno tileno tishi nani, tsughu chekeu khungkusuye khilemu tau move nani.

³ Tilehiye itehi o-u pesu oshokhalu chekeu huye khokhoshive nani eno opukhu itehi mutotoi akeuye miqemileyive nani. Ohuye achuqupu chunike lakhi kini likhive eno onhethiye zamimei kelauno mutsuqhei ithumlave nani.

⁴ Alaghilalo mubumghukeu sutsa okini ghenguye ipophoyive nani. Athi kutsughu ghugha ngo alebo potsughu ighakeu akushukulu chilu nani, ikemu aghau ghugha ghi okuda puthuve kepu shive nani.

⁵ Noye qhemghaikeu-a jupesu musave nani eno alachekeu ghi akuighupu shive nani. Osa mpave nani eno noye akushukulu opuqhelu kepu shi nani eno minemighei kepu jeli kumtsu kuhave nani. Ninguye ashekhau kulhokiqhi alo wuve nani eno tileno alaghilalo akuqa kumlo shi nani.

⁶ Tsandiyi kighi itave nani eno shunayino shikeu akulubo ye ikiqiveno kubove nani; azukikhelo azu shophe chekeu apu ipove nani eno akulabo vephove nani.

⁷ Niphimpiye ayeghi mukhulo idewove nani eno akuxupu tuthuye Alhou lau idewove nani tiye pano ningu tsu puanike.

⁸ Yetsapiuno pi, adouke, adouke. Hi kumtsu adouke.

Pekime Tsa

⁹ Yetsapiu ye alokutsumi ke ghenguno pano kiu ithivekeno tipau pesu timiqo shikapiye ache. Pano aholetsa phikutoju eno tipaqoye kuchou kemokela tsaqutsaleyi pekithi ju.

¹⁰ Yetsapiu ye alokughunopu tsa pukaputsa phuju, pano yepeqhi keu tsaye atsatho ke.

¹¹ Alokutsuno piqhi keu tsaqoye akussu kumtsu pesu bheri la kichepiye keu toi ke, eno ahole pekikepe akeqoye ayishu mutotoi yesupe puakeu toike. Tipaqoye Alhou no tsupuakeu, pano ningu kumtsu kheju kuto achekeu ke.

¹² Inu, kutau lakhi jukutokugho kepu ani. Kaku kutomo yeqhenikeu ashekha kuhae eno chilo phikutojukeu shi aye akulho shive cheni.

¹³ Hipaqo kumtsu shelo thime lakhi likhi pikepu ani: Alhou musalo eno pa zahkutsu papelo kughengu timi lhopuakeu ye hipau kimiji ghengunoke.

¹⁴ Ninguno thwokha shikeu ti akivi na alhoksa namu Alhou no kughathani cheni, tuqho-tughouno mla puakeu thime shou ghi kughatha be nani.