YETSAPIU 11 - BAIBEL (BSI)

Alokutsumino Shichekeu

¹ Inaghami gholo lhidi shikeulo owu pisa puwopualo eno atsala kutomo thiu nono ala pekutsulu nanike.

² Kughono angkusa tsala ighini keno mthake a-a kutomolo lhidi jeli shipe pualo.

³ Asuboye khikudau iluqi ani keno tipa-alo aghi nani. Kughou khungkusu lo azu chhitoiveni keno ghuqhive cheni.

⁴ Amlhu ngo atsalano achipi shimoke kutolo nono kheanapi aye noye khilemu kiumu yisumo nani eno khilemu ghile hukepu shimo nani.

⁵ Totimi lakhi polo anga mishipu akeu kuxu kishieno tishive cheni keno ithi kuthuwomla kehutoi noye Alhou no thwokha mlape puakeu ithini chemoe.

⁶ Inakijili noye apiti yisu alo kughengu kumtsu akivishi thuwuni cheni mala mthake, kutau yisukeu pavi aghiluvike.

⁷ Atsala kuvu alokepushi ithulupe keuye akivike.

⁸ Ampe atsutsulo nono xuaghikeu ghenguno amlo kiqishi alo. Nono ampe khitotohi axushu namu thive kethiu do pashu kepi kumsululo. Azuu jupuwo juakepu kiumu kuhake.

Lhothemi Kutsupiyekeu

⁹ Lhothemiqo, olhothe ghulokilo alovi alo, nono lhothemi shiakelo likhimu alokivishi alo. Nono kiu shinishikeno shialo eno oghakiqipu shialo. Ikemu nono kiukiu shikeno Alhou no oshou kughathabe nani kepi kumsululo.

¹⁰ Kiunomu omlo punaqhi pekevilo momu oghimeqhi peke vilo kughengu noye ado kushuwa lhothemi shi ani chemoke.