YETSAPIU 1 - BAIBEL (BSI)

Akuxuye Adouke

¹ Hipaqoye Yetsapiu tsake, paye David nu Jerusalem lo akukau shi ache.

² Adou mu adouke ipi Yetsapiuno pi. Akuxuye adouke, thwokha kumtsu adouke.

³ Okuxulo kushiniye ichhe ime mla acheni kya?

⁴ Tiqheli ighi eno wove ani ikemu ayeghiqhaye patholo acheni .

⁵ Tsukinhe ipeghi no ilove acheni eno itaghi hukuthu alo akulho shiqhiyi idewove cheni.

⁶ Amlhuno apeu mulhu iqi no ahuu mulhu iqho cheni, itaghi mulhu ideqho iqi acheni.

⁷ Aghoki kumtsu azughilo qoilo cheni ikemu itehi kutolo chhitoimoe. Aghokino huthu keu-alo ideghino huthu kithe acheni.

⁸ Thwokha akunga kughapuke; tiye timino piphe khamlae. Anhethiye khilemu ju aghaqivekeu kuhae; akiniye khilemu chilukhave chemoe.

⁹ Puzuu kiu shiveakeno itaghi tishiaphike. Puzuu kiu mlave akeno itaghi mla niaphike. Ayeghiqhalo kiumu akithe kuhae.

¹⁰ “Julo, hilau kiukela akithe ani!” ipi pikepu kiu ani kya? Hi kumtsu khaghi ningu punu mphilo shicheke toi tishi aphike.

¹¹ Wovekeulo kiu shivea keno khunomu kumsuchilelu chemoe eno itehi ngo ighinikeu tsalalo ghi kiu shiveni keno khunomu kumsuchilelumo nani.

Yetsapiuno Puju Shijukeu

¹² Ni, Yetsapiu ye Jerusalem lo Israilmi shou akukau ke.

¹³ Niye alokutsu shino ayeghiqhalo kiu shive ani keno kumtsu phukide kuda juniye imlo tsuke. Hiye timiqo pelo mighimghai shi apeniye Alhou no akuxu kusapu pe timi nuliqo shou betsuke.

¹⁴ Ayeghilo shiakeu kumtsu ino ithulu khaveno ino piani, hi kumtsu adouke. Hiye amlhu kugha hajukeu toike.

¹⁵ Noye chighichilai keu sukumzu mlae; eno kuhakeu thimeye kiumu kihikulayilu chemoe.

¹⁶ Ino ilikhi ivilo ishi pi, “Niye kijemi lakhi shiluvea, izuu Jerusalem lo ayehkipemi kumtsu nguno ino alokutsuu. Alokutsu ngo akighithiye kuchouno kiukeno ino ithi ani.”

¹⁷ Ino imlo kuchopu tsupuzu akighithi ngo mbomzu dolo kutuqu akeu alokutsu ngo anikha kuma dolo kutuqu akeu ithiniye pukaputsa. Ikemu ino phulukeuno highi amlhu kugha haju akeu paphie.

¹⁸ Kughengu alokutsu khijehi alau ithini keno tijehi amlo ghime alau ani; eno timi khuuno akighithi alau ithini keno tijehi amlokusa alau anike.