YEKIKITHI AKINIU 9 - BAIBEL (BSI)

Sheba lo Kukaliu no Juighi

¹ Sheba lo kukaliu no akukau Solomon jekipi chilu eno lino Jerusalem lo izu susu wuno iniju keu kusho kutsu pesu pa ghukejuni ye shike. Lino li gholo sakichemi kutomo sasu ighi eno tipa gholono kemel no vekuju mukhu ngo akughupu chi xapu ighi eno shunaqo ghi kutomo puighi. Kughono Solomon ngo li pama kusholu keno lino kumsuluke thaqhu kumtsu pa vilo iniju.

² Pano tipaqo kumtsu khochile luve; pa ghenguno chixechilei pimlave kepu lakhimu kusho kutsu shimoe.

³ Sheba lo kukaliu no Solomon lokutsu chiluve eno pano akukaki shipua keu ithuluve.

⁴ Pa ghulhu lipalo achuqupu kutope qhikeu, pawu kijemi no ngoche keu ki, pa kukaki lo akumlami kithipe qhikeu eno aphiphi phimini panoqono uakeu, pano aghulhu shi akelo loji akemi aqemino pepuakeu phimini eno Achinekilo pano aghashi keu pesu mlla keu kumtsu lino ithuluve. Tipaqo jupesu liye atuthu ghi shemlano akumzaqhiyive.

⁵ Lino akukau vilo pi, “Ighakhu lono ino oghili kiu chilu eno olokutsu chilu keno tiye kuchou kena!

⁶ Ilikhi ni ampino ighi puzu ithulumoke kutolo panongu no ivilo kiu pikeno niye pulutsumonoa ke. Niye olokutsu tuxamu chimlano ache kena! Noye timino kugha chekeu nguno alokutsuu ke.

⁷ Oqeche kemiqoye kiutoi akumgha kela! Panonguye pulhapuju ogholo acheni eno nono alokutsu tsa piqhi keu chilu kepu dokivi ithulu achenike!

⁸ AMPEU oLhou sheqhe ani! Opelo akukau shipe eno pa je lono ayeh pepekeu olau alokiqi akeu piye anike. Kughengu pano pawu timiqo Israilmi qhuivulai ani eno alho kupujulo panoqo puxupe puanishi kehu pano opelo panoqo kukau shipeke tishianguno noye ayezah ngo achipiu xatha keu pepimhelu peniyeke.”

⁹ Lino tughotili sughi keqo pesu Akukau Solomon tsuke: Shuna no kilogram 4,000 eno vekuju mukhu ngo akughupu chi jeli kutomo pesu tsuke. Sheba lo kukaliu no Akukau Solomon tsukeu vekuju mukhu toikeu kutau akivi khilemu kuhae.

¹⁰ (Akukau Hiram ngo Akukau Solomon pama wu timi khunoqono Ofir lono shuna sughi keno tipaqono junipersu ngo achiku ghi sughike.

¹¹ Solomon no asu tipau pesu Achineki ngo kukakilo kungu jolha cheboqo shike eno alekiphemi ghengu akighi lebo shini keulo peitha ke. Juda ghakhulo titoi keu su khilemu ithumla aphike.)

¹² Akukau Solomon no Sheba kukaliu no khukeu thwokha kumtsu pesu li tsuke. Tiye lino pa lau tughotili jeli sughi keu me tsu keu nguno alau vebeghi li tsuke. Tithiu liye liwu timiqo sasu Sheba lo idewove.

Akukau Solomon wu Kuakini

¹³ Ampe atsutsulo Akukau Solomon ye shuna kilogram 23,000 kutolo ithulu cheke,

¹⁴ tiye lhidi lhighimiqo no zahme tsuche keu nguno vebe ghi ithulu cheke. Arabia kukami ngo Israil ghakhu bochoqo lo ahng qo ghi pa lau tsandiyi ngo shuna sughi che.

¹⁵ Solomon no azuto kuloghi 200 mlake eno shuna kilogram tsunini no hepha pesu tipaqo lakhi khi kuzuke,

¹⁶ eno itaghi azuto aghulolo 300 mlake eno shuna kilogram kuthu hepha pesu lakhi khi kuzuke. Tipaqoye pano Libanon Ghasu Chebo ipikeulo qhipeke.

¹⁷ Akukauno akuka lakhu ghi kije lakhi mlake. Tipauye akuhahu pesu aqha hami kuzu eno aqha kutau lono shuna pesu kuzuke.

¹⁸ Akuka lakhulo puka iku kepu shi anepa tsugho shike eno tipaulo apukhu kinepu shikime pukuke, tiye shunano kuzuve ke. Akuka lakhulo aukibepu putoputolo ake eno abongushu julhono hula hilau putoputolo puthugho ghi shipe qhi.

¹⁹ Puka iku keulo abongushu julho chighi kini ake, tiye puka iku keu lakhikhi kichi shekhalo lakhi khi ake. Akuka lakhu hikithipuye khuno yehkipeqhalo pinamu khilemu ache ghimo keuke.

²⁰ Akukau Solomon jukhuqoye kumtsu shuna no shike eno Libanon Ghasu Chebo lo akhuali akeuye kumtsu shunayi akiviu pesu shikeu ke. Solomon ghuloki loye tsandiyi ye ame kuapu shi kumsumoke.

²¹ Paye Akukau Hiram wu ashukaki loji gholono azughi kijelo sawu kepushi ashukaki loji acheke. Ampe kuthu thulo pa shukaki ye shuna, tsandiyi, akuhahu eno shuki tunguqo xapusu ideighi cheke.

²² Akukau Solomon ye ayeghiqhalo kukami kutami nguno alokutsuu eno kuakiniu ke.

²³ Alhou no alokutsu pa tsukeu chiluniye panongu kumtsuno pa sasu kushono kuptsalu cheke.

²⁴ Panoqo milakhi khino Solomon lau tughotili peighi che - shuna ngo tsandiyi nhemgha, aphikuzu, azuta - angu, vekuju mukhu, khurshi eno gadaha. Ampe atsu tsulo hipau shikibe ache.

²⁵ Akukau Solomon ye khurkulu ngo khurshi ghenguno ghi aki chebo 4,000 ake eno aghushilo peitha chekeu khurshi 12,000 hamiye Jerusalem lo qhipua che ikemu kutau qoye aphughi kutauqolo qhipua che.

²⁶ Eufrati lono Filistiya ngo Ijip lughi ghakhu qhalo Solomon no kukami kumtsu nguno ayehkipeu akughushuu shi acheke.

²⁷ Pano ayeh pe acheke ghulokilo Jerusalem lo tsandiyi ye atu toike eno kedarsuye mubusu paphi shi kutomo ithulu acheke.

²⁸ Solomon no Ijip lo ngo aghakhu qha kutauqo lono khurshi qhusaghi cheke.

Solomon Yehkipe Hekutsuju keu

²⁹ Solomon wu xughili kutauqoye abothu lono ashekha kutolo hipaqolo yekithipe puani: Nathan Tungkupu Xughililo, Shilo lo Ahija no Tungpu shikeulo eno Tungkupu Ido wu Kungunhetsu Kakulo, tipaulo Israil lo Akukau Jeroboam yehkipe ghili ghi pipuani.

³⁰ Solomon no Jerusalem lono Israilmi kumtsu shou ampe lhobidi ayeh peke.

³¹ Paye thive eno David Phughilo qhove eno panu Rehoboam no pa shelo akukau shi thisuluve.