YEKIKITHI AKINIU 3 - BAIBEL (BSI)

¹ Tithiu Solomon no Jerusalem yeghi Moria to khipa alo AMPEU no papu David piyekeno tipa alo AMPEU ki shini ke kutothu, a-a tipauye Jebusimi Arauna no athi kuphu-a mlakeu qalo shi.

² Pa kuka mipe abidiulo aqhi akiniu atsala akiniu lono aki shithu.

³ Akukau Solomon no shikeu ki ye akushulau miter mukutsuni akijelau miter toku ke.

⁴ Akisheqho sholu tughiu bono miter toku tiye achineki akijelau pahi eno achuqulauye miter lhopungu bidi. Akibo alouye shunazuno nudake.

⁵ Akibo akijeuye kedarsu akiviuno shi eno shunayi zuno nuda eno tipa shouno amsabo julho ajoshi shipuku.

⁶ Akukau no achineki amekusho tu pesu jukivi pushi mla eno Parvaim yeghi lono puighikeu shuna akiviu pe mla.

⁷ Pano shunayi zu pesu aki jibo, akhetsukucho, axu, ahukikha, alashe kumtsu nudave eno kerubim shisupe qhi.

⁸ Abo alou Shishe Akimthe-a ipikeuye akijelau miter toku akushulau miter toku eno tiye achineki akijelau pahike. Shunayi kilogram 20,000 pesu ti akimthebo kuzupeqhike.

⁹ Shunayi kilogram tuxa toike qhemi pesu ayishu lakhikhi shino peitha eno kunguubo ghi shuna yizuno kuzuke.

¹⁰ Akimthe chebo tipaulo ayi pesu kerubim shuna zuno vekeu shipe qhinike akukauno akumlami qo vilo ahza tsuke.

¹¹ Lhoxu tipau chishiboye lakhikhino miter kinino tuxa eno tipaqo chishibo huno aki jibo kutolo toke.

¹² Lakhiu kerubim chishibo ghi miter kinino tuxa eno akijibo kutolo eno achishibo tuxauye kerubim lakhiu chishibo sasu kuchope qhi.

¹³ Kerubim chishiboqoye miter toku eno alikhi apukhu shou puthugho pe.

¹⁴ Tinguno alau ghi pano ayethi kumkano ghokeu phi huchuyi, tsulakibiye ishi ajeli phi pe nhaqhi phi mlape tshuqhike.

Akhetsu Kucho Kini

¹⁵ Akizulo pano akhetsu kucho kini mla, tiye lakhi khino akuchuqulau miter chighipungu tuxa eno ti kuma kutsuqalo a-a miter kinino tuxa mlake.

¹⁶ Achila toi khaghatu ju kimihino pili ghi athi aqheqheno ala kinini pilikeu pe tile qhi.

¹⁷ Akhetsu kucho tikumaye aki ikulola hula hila susu puani eno apeu kudau akeu jeno Jakhin eno ahuu akeu jeno Boaz kutsu.