YEKIKITHI AKINIU 25 - BAIBEL (BSI)

Juda lo Akukau Amazia

¹ Amazia ye ampe muku pungu shi ake lono akukau shiluveno Jerusalem lo ampe muku toku ayeh pelu. Pa zaye Jehoadin, Jerusalem lo akemi.

² Paye AMPEU mlo kiqhipu shike ikemu tipau shinishimo qhiyi shike.

³ Pano akuka mutotoiluve kemtsa papu heqhive kemi kijemi pithive.

⁴ Paye tishiepimu tipaqo tianuli ye pithitsu moe ikemu Muse Yezah lo AMPEU no ahza tsupua keu papelu ghi shike: “Atianuli no heqhibuqhi keu shipuaghike ghenguno tipaqo puaza pithive moni eno apuaza no heqhi buqhi keu shi puaghi ke ghenguno tipaqo tianuli pithivemoni; timi lakhi ye pano heqhi buqhi keu shipuaghi ke ghengu likhi lono pithi kepu shilo.”

Edom sasu Aghushi

⁵ Akukau Amanzia no Juda ngo Benjamin laghalo kiptimi kumtsu ghakuto pesu pututa limi kiqi lono aghushimi muqo kutowo eno timi 1,000 mqo ngo 100 muqo shou ahza tsuni kemi atomi qhiwo ke. Tipaqo gholo kiptimi ampe muku nguno akichiu shive aghikemi kumtsu kumqo kelo timi 3,00,000 ae. Panonguye ghushimi kishekidelu kemi, aghu shikulumi, angu ngo azuto pekithimi ke.

⁶ Tinguno alau ghi, pano tsandiyi kilogram 3,400 tsupuzu Israil lono ghushimi 1,00,000 piqe sughi.

⁷ Ikemu tungkupmi lakhino akukau lau wuno pa vilo ishi pi, “Israilmi ghushimi ogholo sawu kevilo. AMPEU ye ahuu Kukaqha kudau ghushimi hipaqo gholo kuhake.

⁸ Noye panoqono aghukishi lo oshikumtolu nani pi kumsu aghiluvi ikemu tolukeu momu tomla keu tsukulupu shi akeu ye Alhou likhino akuka anike eno pano oghumi pelo otoluve pe nani ke.”

⁹ Amazia no tungkupu vilo iniju, “Tishiaye tsandiyi kumzapu ino panoqo tsuve keuye kishiveni kya?” Tungkupu no khochile, pi, “AMPEU no tinguno alau otsuchilelu nanike!”

¹⁰ Tighenguno Amazia no piqesu akemi ghushimiqo puwuve eno panoqo vilo akilo wovelo pive. Ikelo panongu ye Judami shou amlo idesusu akilo idewo khave.

¹¹ Amazia no pa mlo kuloghi shilu puzu pa ghumi sasu Amiti Khila lo sawu. Tilau panonguno aghushi puzu Edommi ghushimi 10,000 pithive tsu,

¹² eno ghushimi kutami 10,000 kughaluve tsu. Panonguno akughumi sasu Sela phughi nhekikhi kutsuqa lo sawu eno panoqo tukulu qhive, tishi keu lono panonguye aqhou atuqu shouno veqhi pithive.

¹³ Tishi akelo Israilmi ghushimi khunoqo Amazia no aghushilo pa gholo sawumove keno tipaqono Samaria ngo Bet Horon dolo Judami phughiqo le eno timi 3,000 pithivetsu puzu anhemgha kutomo xule puwuvetsu.

¹⁴ Amazia no Edom toluveno ideghi kelo pano tipaqo wu ajulhoqo pa gholo sughi, tipaqo ghope qhi eno tipaqo mllae eno tsungqui keu ta tipaqo lau piti kumna ke.

¹⁵ Hipauno AMPEU loghu shikighideve, tighenguno pano tungkupu lakhi Amazia lau puwu. Tungkupuu no ishi ighiha iniju, “Inaghami lhouqoye pano likhi panowu timiqo ghi ou lono panoqo xaphemlave keghi noye kushiye tipaqo mlla ani kya?”

¹⁶ Amazia no ishi ghechile, “Kughono ningu ye opelo akukau kukutsuu shiveape kya? Atsa pikevelo, ti kumoaye ino opithive nani ke!” Tungkupuu no atsa pimove ikemu tipau zuuno hipatsa pitsu, “Ino itehiye ithive ake Alhou ye okutsaveni keu shi xathavae kughengu nono hipaqo kumtsu shiveke eno ino kutsu keu tsa kukuthave tsuke.”

Israil sasu Aghushi

¹⁷ Juda lo Akukau Amazia no akukutsu pa tsuche kemiqono Israil shou kumquve. Tithiu pano Jehoahaz nu eno Jehu tinu Israil Kukau Jehoas lau asutsa lakhi pi puwu, “Nikujo agino agi kinheqhe kilenike ighilo.”

¹⁸ Jehoas no khokichile hipau Amazia lau tsupuwu:” Ghuthu lakhi Libanon Naghuto lo asahupho lakhino kedar subo lau asutsa lakhi tsupuwu, ‘Inu sasu kulakupu shipenike onga tsulo.’ Aghalo lhoxu lakhino vechewu cheke lono asahupho nedaveke.

¹⁹ Itehi Amazia no Edommi shou toluve kepi qheza anie ikemu ino akukutsu tsa otsu anike akilo ngoauvelo. Kushiye oshou eno owu timiqo shou likhi kutsakungove kepu kukupuna xuputho ani kya?”

²⁰ Ikemu Amazia no initsumoe Amazia leluve peni keuno Alhou pulou shi ake kughengu pano Edommi julho mllawuve ke.

²¹ Tighenguno Israil Kukau Jehoas no Juda Kukau Amazia sasu aghu shinike wuve. Panonguye Juda lo Bet Shemes lono aghushi.

²² Judami ghushimiqo leluve eno ghushimiye panoqo kilo wokhave.

²³ Jehoas no Amazia kughaluve eno Jerusalem lo pa sasu ighi. Tilau pano aphughi puwu puakeu xalevetsu, tiye Efraim Khagho lono Acheku Khagho kutolo miter 200 qhemi shinishi ke.

²⁴ Pano Achineki lo shuna ngo tsandiyi aghi keu, Obed Edom laghano kheche keu achinekilo nhemghaqo lepusu Samaria lo idewove. Pano timi ghi akughumi shi sawuve.

²⁵ Juda kukau Amazia ye Israil kukau Jehoas nguno alau ampe chighi pungu xuke.

²⁶ Amazia no kutau jeli shikeu kumtsu pano kakeu abothu lono ashekha kutolo Juda ngo Israil kukami Xughili lo yekutsupe puani.

²⁷ Pano AMPEU hebideve kemtsa Jerusalem lo pa pithiveni keu shi kumqu ache. Ashekhalo paye Lakhis phughilo pove ikemu pa ghumino tilau ghi pa papesu wu eno pa heqhi pithive.

²⁸ Pa kithi kumoye khurshi lakhi shouno Jerusalem lo xapuwuve eno paye David Phughilo kukami kumokilo qhove.