YEKIKITHI AKINIU 16 - BAIBEL (BSI)

Israil sasu Kupunalu

¹ Juda lo Akukau Asa no kakeu ampe shighi akutsughou lo Israil Kukau Basha no Juda leighi eno Judamino iqho iqi keu laghi kumtsu hekhave tsunike ghenguno pano Rama putukhasu thuve.

² Tighenguno Asa no Achineki ngo kukaki lono tsandiyi ngo shuna pesu Damaska lo Siriya kukau Benhadad lau tsupuwu puzu asutsa hipau tsupe:

³ “Ningu papunoqo toi ningu ghi shompami shinie. Tsandi ngo shuna hiye oghenguno tughotili tsupuwu anike. Itehiye nono Israil Kukau Basha sasu shompami shi ache keu kututa shivelo tishianguno paye ighakhu lono pawu ghushimi sawu khave nanike.”

⁴ Benhadad ye Asa tsa luvetsuno pawu zatsuu kijemi eno tipaqo gholo ghushimi akeqo puwu puzu Israil lo aphughiqo lewupe. Tipaqono Ijon, Dan, Abel Bet Maaka eno Naftali lo aphughi khipaqo lo kuchu kini pukishe suwo qhipua che keno tipaqo kumtsu khasu pe leluve.

⁵ Akukau Basha no tipaqo sutsa chilu puzu paye Rama putukhasu akeu kumla shipishe pesu qhive.

⁶ Tithiu Akukau Asa no Juda ghakhulo kiptimi thaqhu hekutsu kumqono Basha no Rama lo peitha akeu atu ngo tokta su kumtsu xapughilo pi ahza tsu eno panonguno tipaqo pesu Geba ngo Mizpa phughiqo putukhasulu.

Tungkupu Hanani

⁷ Tipa ghulokilo tungkupu Hanani no Akukau Asa lau wuno pi, “Nono AMPEU oLhou pukhuni ke zuqhulo Siriya kukau shou pukhube ke ghenguno Israil Kukau wu ghushimi ye olauno pokaluveke.

⁸ Sudanmi ngo Libiyami khurkulu ngo khurshimi kutomo akeu ghushimi kuha kesha? Ikemu nono AMPEU pukhu ke ghenguno panoqo shou pano opelo tokulu shilupeke.

⁹ AMPEU ye khunoqono pa lau amlolo aghokulu shi acheni keno tipaqo shikumtoni ke paye ayeghiqha kumtsu thebei jukuto acheni ke. Noye aghuzu nikha shivae eno tighenguno itehi nguno hilauye noye pulhapuju lo aghu shi ananike.”

¹⁰ Hipatsa no Asa pelo tungkupu shou amlo idevepe ike pa kughape ayikighi no tshupe qhivepe. Hipa ghuloki lono huthu puzu Asa no timi khami kijipusa thuve.

Asa Kuka Kishekha

¹¹ Asa no kakeu ghili kumtsu abothu lono ashekha kutolo Juda ngo Israil Kukami Xughili lo yekutsu pe puani.

¹² Asa no akukau shikeu ampe shighi tokuu lo paye apukhu kinitave, ikeghi paye AMPEU kukuphu kudau tsughu ighimono shikipivimi lau wuve.

¹³ Ampe kini thiu paye thive

¹⁴ eno David phughilo pano atuqu kumoki chhupe puakeulo pa kumo qhove. Panonguno pa kumo shiqhonike kutokugho keulo vekuju mukhu ngo tsungqui keu teli peitha eno pa kithi mloqah keu shi panonguno ami kuloghi lakhi kuiquke.