YEKIKITHI AKINIU 15 - BAIBEL (BSI)

Asa no Shikithe keqo

¹ Alhou ghunguno Oded nu Azaria shou ikughi

² eno pano Akukau Asa sasu kusholuni ke wu. Pano ishi igha ku, “Akukau Asa ngo nongu Juda ngo Benjamin lo kuami kumtsu itsa inilo! AMPEU ye nonguno pa gholo ake kutolo nongu gholo ani. Nonguno pa phuju aye paye nongu pelo pa phulu pe nani, ikemu nonguno tsughusu wuve aye pano nongu qhive nani.

³ Ado kushuwa kutolo Israil ye Alhou kuchou sumono xu acheke, panoqo shikapeni kemi achinemi sumo eno ayezah sumono xu ache.

⁴ Ikemu shiluksa ighi kethiuno panonguno AMPEU Israil Lhou lau ideighi. Panonguno pa phuighi eno pa phulu.

⁵ Tipa tsala ghuloki loye milakhimu akupuna shomlano iqho iqi mlake kughengu aghakhu kumtsulo akupuna ngo hexakeu ake.

⁶ Shiyeh lakhino shiyeh lakhi nedaqoda cheke kughengu Alhou no panoqo shou akupuna ngo kutakihi keu sughiche.

⁷ Ikemu nonguye akumto shilulo eno aghuthisu kevilo. Nonguno kiu kumla shini keno tiye asaxu tsunani ke.”

⁸ Oded nu Azaria no tungupu tsa pikeu Asa no chilu keulo paye amlo kumto shiluve. Pano Juda ngo Benjamin ghakhulo ajulho aghikeqo kumtsu pevekhave eno Efraim ato yeghilo aphughiqo lono ajulho lelukeqo ghi kumtsu peve khave. Pano achineki kikhalalo AMPEU wu akiptia akeu ghi shikitheve.

⁹ Timi kutomo Efraim ngo Manasse eno Simon ghakhu lono Asa kudau ighive eno pa kukaqhalo xu acheuve kughengu AMPEU no pa gholo akeu panonguno ithuluve ke. Asa no timi tipaqo ngo Juda eno Benjamin lo akemiqo kumtsu kukumqo.

¹⁰ Panonguno Asa no akukau shilukeu mpe chighi apunguu eno aqhi akuthuu lo Jerusalem lo kuho kumqoluve.

¹¹ Tipa tsalani panoqono lepu ighi keu lono AMPEU lau agha shikeu pesu mllake: amshi 700 eno bheri 7,000.

¹² Panonguno puloshoqhi lakhi shi ke tipau ye panoqo mlo eno angulho kumtsu pesu AMPEU, pano puasu Lhou mllani keu shi panonguno pulosulu ke.

¹³ Panongu gholo lhothemi na muchomi pinamu momu kiptimi na totimi namu khuuno pa mllamoni keno tipaqoye pithive nikeu shive.

¹⁴ Panonguno AMPEU je lono asutsa kuloghi lono panongu ye puloshoqhi penikeu shi ashoqhi lakhi shike eno tithiu panonguno ighuitsa puzu afuko kuighae.

¹⁵ Juda lo akemi kumtsu alokivi shive kughengu panonguno amlo kuchopu supuzu puloshoqhi hipau shi luke. Panonguye AMPEU mllani keulo azukuvu shike eno pano panoqo ikhilu eno aqha kumtsulo alokughuno panoqo tsue.

¹⁶ Akukau Asa no pa puza Maaka no aza kukaliu alo achekeu lono ikhive kughengu lino kinikulu lhoipekighi lhouliu Ashera julho aphi kumqhupu shipe qhike. Asa no ajulho ghekucho thapinyi shiveno Kidron khila lono tipau pitileve.

¹⁷ Asa ye asu-atu kumlla-a kumtsu shipusamoe pi namu paye pa kuxu kupujulo AMPEU lau amikucho shi acheke.

¹⁸ Papu Abija no Alhou lau ikhiphetsuve keu nhemgha jeli kumtsu pano Achineki lo qhike eno tipa gholo pa ampi no shuna ngo tsandiyino shikeu nhemghaqo ikhiphetsu keu ghi suwo qhike.

¹⁹ Pano kakeu ampe shighi apunguu kutolo aghukishi kiumu kuhake.