YEKIKITHI AKINIU 13 - BAIBEL (BSI)

Abija ngo Jeroboam Ghushi

¹ Israil lo Akukau Jeroboam no ayehpe keu ampe chighi akutacheulo Abija no Juda lo akukau shiluve,

² paye Jerusalem lo ampe kuthu ayeh pelu. Pa zaye Uriel nonga Mikaya, Gibea phughilomi ke. Abija ngo Jeroboam pama dolo aghushi ipeghive.

³ Abija no ghushimi 400,000 hekutsulu eno Jeroboam no ghushimi 800,000 sasu pama kumjokile.

⁴ Hula hila ghushimino Efraim to yeghi lono kusholu. Akukau Abija no Zemaraim toghilo iku puzu Jeroboam ngo Israilmi vilo ishi asheshu pi, “Itsa inilo!

⁵ AMPEU, Israil Lhou no hepho mlakepu puloshoqhi lakhi David sasu shi puzu pa eno pa polo kughukomi lau Israilmi shou alhokupuju lo kukami shiche penike tsukeu nonguye mtha kesha?

⁶ Nebat nu Jeroboam no pa kukau Solomon shou hebide ke.

⁷ Tipa shelo, pano ame kuhakemi kusakughami amqo lakhi hekutsu kumqoke eno panonguno Solomon nu Rehoboam shou panoqo gho pulou inadapuku ke, paye alhothe eno puju shiju keu kuha kehu tipaqo mujochile mlave.

⁸ Itehi nonguye AMPEU no David laghami lau tsuve keu kuka shou aghushini keu kimji shipe ani. Nonguye ghushimi kumzapu ani eno Jeroboam no nongu lhou shipenike mlatsu keu shuna mishitsuqo nongu gholo anike.

⁹ Nonguno AMPEU wu achinemi, Aron laghami hapupove ke eno Levimi nonguno hapupove ke. Tipanoqo alo nonguno ashiayeh kutamiqono shicheke paphi lono achinemi susupe qhike. Timi khuu khuu namu amshitsu lakhi momu bheri tsuni saighi aye no lhou ipiche keqo chinemi lakhi shinike shikimtheluve chenike.

¹⁰ “Ikemu ninguye AMPEU niLhou qe achephi ke eno pa pheve mphike. Aron launo ikoighi kemi achinemi no panoqo kumlapu saje shi acheni eno Levimi no panoqo kuphu cheni.

¹¹ Inakijili panonguno tsungqui keu ta ngo aghakishi lhoxu kuchopu piti keu pesu pa mlla acheni. Panonguno asho kumllagho pesu chini kepulo mithe akeu kibepulo qhitsu cheni eno kijili atsu tsu panonguno shuna kulubo lo akulu kuiqu cheni. Ninguye AMPEU no ahza tsu keu shi acheni ikemu nonguye pa phevae.

¹² Alhou ampino ni sakipheu ke eno pawu achinemiye afukoqo pesu hile ani eno ningu pelo nongu sasu aghu shi penike afuko ighani ke kutope ani ke. Israil lo timiqo, AMPEU nongu puasu Lhou sasu aghu shi kevilo! Nonguye tomoke!”

¹³ Tishi akelo Jeroboam no pawu ghushimi khami puwu puzu azupouno Judami ghushimi ala thape khepeni ye shike eno kutamino azuuno panoqo sasu shiniye shike

¹⁴ Juda lono ighikeqo no tsughuwo jupuwo kelo panoqo vehomxaluve aghikeu ithulu. Panonguno kuphu penike AMPEU lau ighamuku khuke eno achinemino afukolo fusu.

¹⁵ Juda lono ighikeqo no aghugha kuloghi shi igha eno Abija no saphe puzu lethuve; Alhou no Jeroboam ngo Israil ghushimi leluve.

¹⁶ Israilmi ye Juda lono ighi kemiqo launo pove eno Alhou no Juda lono ighi keqo pelo panoqo shou tokulu shiluvepe.

¹⁷ Abija ngo pawu ghushimino Israilmi hephokichei leluve eno Israilmi ghushimi kishekiphe 500,000 kutolo pithive tsu.

¹⁸ Ike Juda lo akemino Israil lo akemiqo shou tokulu shiluve kughengu panonguno AMPEU panoqo puasu Lhou shou pukhubeke.

¹⁹ Abija no Jeroboam wu ghushimiqo hasusu wu eno panoqo phughi hami qhasuluve: Bethel, Jeshana, Efron eno aphughi hipaqo sukumxalo aphu akeqo ghi luvetsu.

²⁰ Jeroboam ye Abija no ka ake ghuloki loye pa kuka khilemu ikukithemlave. Ashekhalo AMPEU no pa hekuluqhive eno paye thive.

²¹ Abija ye akuka kumto alau alau shiuve. Paye anipu chighi bidi ake eno anu muku kini anga chighi tsugho papu shiluke.

²² Abija xughili, pano kiu pi eno shi che keno tipau kutauqoye Ido Tungkupu Xughili kakulo yepe puani.