YEKIKITHI AKINIU 11 - BAIBEL (BSI)

Shemaya Tungputsa

¹ Akukau Rehoboam no Jerusalem lo ighilu kelo pano Juda ngo Benjamin lagha lono ghushimi kishekiphe 180,000 kukumqolu. Paye aghu shipuzu ahuu Israil laghami qhasupe achekeu luchileni keu shi kumsupu ake.

² Ikemu AMPEU no Shemaya tungkupu vilo

³ Akukau Rehoboam lau eno Juda ngo Benjamin laghami kumtsu lau asutsa hipau tsupeni keu shike:

⁴ “Nokusami Israilmi lewu kevilo. Nongu kumtsu pututa phulo idewovelo. Kiu shive akeno tiye ikupughuke.” Panonguno AMPEU wu ahza kutsu gholuve eno Jeroboam sasu aghu shinike wumove.

Rehoboam no Aphughi Putukhasu

⁵ Rehoboam ye Jerusalem lo acheuve eno Juda ngo Benjamin lo aphughi hipaqo putukhalu:

⁶ Bethlehem, Etam, Tekoa,

⁷ Bethzur, Soko, Adulam,

⁸ Gat, Maresha, Zip,

⁹ Adoraim, Lakis, Azeka,

¹⁰ Zora, Aijalon eno Hebron.

¹¹ Pano tipaqo akumtoshi putukhasu luve eno tipaqo lakhi khilo ahza kutsuu susupe qhi eno lakhi khilo achuqupu, oliv teli eno aji pukishe suwo qhi,

¹² eno azuto ngo angu ghi suwo qhi. Hitoi shipuzu pano Juda ngo Benjamin pesu pa qholo qhike.

Achinemi ngo Levimi

¹³ Israil ghakhuqha kumtsu lono achinemi ngo Levimi ye apeu Juda ghakhulo ighive.

¹⁴ Levimiye panoqo wu atsuni kumzapu yeghi ngo ayeghi kutauqo qhiveno Juda ngo Jerusalem lo iqesu wuve kughengu Israil lo Akukau Jeroboam ngo pa thisulu kemiqono panoqo pelo AMPEU chinemi shi mla pemoveke.

¹⁵ Jeroboam no pawu timi pesu achinemi shipenike susu tiye inapugha chine kumlla alo mla peniyeke eno pano amshitsu koghe shipe qhitsu puzu tughami ngo ajulho mllape niyeke.

¹⁶ Israil shiaye gholo khunoqono kuchouno AMPEU Israil Lhou mlla nishi keno timi tipaqoye Jerusalem lo Levimi pape wuve, tishianguno panonguno AMPEU panoqo puasu Lhou lau agha shipe mlla luniyeke.

¹⁷ Hitoi shikeu huno Juda kukaqha shikumtolu ke eno ampe kuthu kutolo panonguno Solomon nu Rehoboam choqhe ghi kuphuluke eno Akukau David ngo Akukau Solomon yehkipe qholo toi panonguno xuluke.

Rehoboam Kibolomi

¹⁸ Rehoboam ye David nu Jerimot nga Mahalat sasu kulau ke eno li pazaye Eliab nga eno Jese ti nuli Abihail ke.

¹⁹ Pama ye anu kuthu shike, Jeus, Shemaria eno Zaham.

²⁰ Paye tithiuno Absalom nga Maaka sasu kulau eno anu bidi shi: Abija, Atai, Ziza eno Shelomit.

²¹ Kumtsu kelo Rehoboam ye anipu chighi tache eno alojilimi lhotsugho acheke eno paye anu muku tache eno anga lhotsugho papu ke. Pa nipu eno pa lojilimi gholo pano kumtsu nguno alaushi Maaka qhuivulai cheke,

²² pano atianuli kutami nguno alau Maaka nu Abija kimiye che, pa kishepe qhi puzu pa zuqhulo akukau shipeni keu shike.

²³ Rehoboam ye alokutsu shi pa nuliqo shou amakho pipe che eno Juda ngo Benjamin lo putukhasu puakeu phughiqolo panoqo pelo ngopeke. Panoqo ghenguno pano kupukuno shi thwokha kutope qhitsuno panoqo ghenguno anipu kutomo phusaghitsu ke.