XAKUTHAMI 9 - BAIBEL (BSI)

Abimelek

¹ Gideon nu Abimelek ye Shekem taun lo wuve, khilehi pa ngulimi no achekeno, eno panongu pelo

² Shekem lo kuamiqo lau hitoi inijupe, “Nonguye khikhiu pulo ani kya? Gideon nuli pano lhotsuni pelono nongu shou ayehpe penikeo timi lakhi pelono ayeh pepeni kya? Abimelek ye nongu abolomi kepi kumsululo.”

³ Pangulimi no Shekem lo kuami vilo timi hipau ghili kuptsatsu, ikelono Shekem lo kuamino Abimelek papenikeu kughathalu kughengu paye panongu bolomi ke.

⁴ Panonguno BaalBerit chineki lono tsandiyi lhotsuni pesu pa tsu eno tipau pisa pesu avehu kuhamitheno achekeqo piqeno pa gholo chewuvepe.

⁵ Paye tishino Ofra lo papu kilo wuve eno tilano atu lakhi pesu pa thikuzumi Gideon nuli pano thotsuni veqhi pithive tsu. Ikemu Gideon nu aitiu Jotham ye itshuluveno heqhi pithi mlave.

⁶ Tishino Shekem ngo Bethmillo lo kuami kumtsu kumtsa Shekem lo achine phisubo lo wuno Abimelek pesu panongu kukau shiluve.

⁷ Kughou Jotham no tipau ghili chilukeno, paye Gerizim naghuto tolo iqhono tile puthughono panongu lau hitoi asheshu, “Nongu Shekem lo kuami, isutsa inijulo, Alhou pelono nongu sutsa initsupe nishi aghiaye!

⁸ Khaghi aghuloki lakhilo asubo qono panongu kutoshino akukau lakhi kisheniye khalacheu ipe. Ike panonguno oliv subo vilo pi, ‘Ningu kukau shitsulo.’

⁹ Oliv subono khochileve, ‘Niye nongu shou ayehkipeu shiniyeno iwu teli ipeghi chekeu khikhi alhouqo eno timiqono tipau vechewono agigihu itsu acheni keno lakhave mlave.’

¹⁰ Itaghi asuboqono khughuthibo vilo pi, ‘Nono ighipuzu ningu kukau shitsulo.’

¹¹ Ikemu khughuthibo ghi hitoi khochileve, ‘Nongu shou ayehkipeu shiniyeno niye ixathi ngoniyi pithi chekeu puhave mlae.’

¹² Tileno asuboqono atsayi kighibo vilo iniju, ‘Nono ighino ningu kukau shitsulo,’

¹³ Ikemu atsayikighibo ghi hitoi khochileve, ‘Nongu kukau shiniyeno niye atsayiji khikhi alhouqo eno timino yepuzu alovi chenikeno tipau ipekighi lakhave mlae.’

¹⁴ Ikehu ashekha loye asuboqo akuchopuno asahukupubo vilo pi, ‘Nono ighino ningu kukau shitsulo.’

¹⁵ Asahukupu subo huno pi, ‘Nonguno kuchouno ipesu nongu kukau shinishi aye, hilau ighino ikicheqholo ngolo. Nonguno tishimo aye ami pelono iwu sahukupu loka lono ipeghino Libanon lo kedar ghasu mulhavepe nani.’ ”

¹⁶ Jotham no pi, “Tihutoi”, nonguye kuchouno amikucho lono Abimelek pesuno nongu kukau shipe puanima? Nonguye Gideon kumla sumsa anima? eno pa bolomi akivishi tucho hiju puani kema? Kughengu pa kumla lono tishi shikuzupu anikehu.

¹⁷ Kumsululo, ipuye nongu ghenguno aghushitsue. Paye pa kuxu ghi kupumono Midiyami ulono nongu xaphelutsue.

¹⁸ Ikemu ishiye nonguye ipu kibolomi mithivae. Nonguno atu lakhi no panuli pano lhotsuni kumtsu veqhi pithivetsu tiye pa qeliu nu Abimelek, khuu nongu bolomikeno pa pelono Shekem lo nongu kukau shipeni kelau noke.

¹⁹ Ikehu ishi nonguno Gideon eno pa kibolomi lau mlavekeu amikucho achipi lono shipuaghi aye Abimelek lau nongu lokivishi alo eno pa pelono nongu sasu ngopelo.

²⁰ Ikemu tikumo aye Abimelek launo ami iqu ipeghi keuno Shekem eno Bethmillo lo kuami pitiqhivepelo.

²¹ Tishi piveno pa mu Abimelek msake launo Jotham ye poveno Beer lo acheuve.

²² Abimelek ye ampe kuthu Israil shou ayehpelu.

²³ Tishino Alhou no Abimelek ngo Shekem lo kuami dolo kimthi kile keu ipeghivepeno panonguno Abimalek sasu hebide ipeghive.

²⁴ Hishi shikeu ye Abimelek ngo Shekem lo kuami khunoqo kuqhano Gideon nuli panongu lhotsuni heqhi pithive tsukeno tipau mukhu angusu ithulu peke.

²⁵ Shekem lo kuamino timi kughapesu naghuto tsuqo kumtsu lo kughutshuveno Abimelek lakhano pa mithi thuve eno pa veche wuchekemi kumtsuno pa ghesuqhi thuve. Ikehu hipau ghili khamino Abimelek vilo pive.

²⁶ Tithiu Ebed nu Gaal no pa thikuzumi sasu Shekem lo ighino Shekem lo kuamiye panongu pukhubekulu pesu pa shou be.

²⁷ Panongu kumtsu pututa tsayili lo hupuzu atsayi xoluno tipau pesu aji mlano aghulhu kije lakhi shi. Panonguno pano lhou chinekilo ilono chuqu-kusho shipuzu tileno Abimelek tha junuqhithuve.

²⁸ Gaal no pi, “Abimelek ye khuukeno ningu Shekem lo kuami ye pa qe nikya? Papu ye Gideon kumokesha? eno pa kijeu Zebul ye Shekem papu Hamor timi qe cheke kumo sheo? Tishiaye kishipuzu ningu ye pa qeni kya? Tighenguno nongu ye nongu pasu Hamor khuuno nolimi huthu phe tsukeno pa lau aghokulu shi alo!

²⁹ Ino timi hipaqo saphetou shi aghike aye! Niye Abimelek hapupoveni chekewa! Niye Abimelek vilo ishi pini cheke, ‘Owu ghushimi kughuko kitheno ipeghino aghushilo!’ ”

³⁰ Aphughilo ayehkipeu Zebul ye kughou Gaal no pikeu tsa chilukeno ighono pa mlo ideve.

³¹ Pano aghinimiqo hapuwuno Aruma lo Abimelek lau ishi piupe, “Ebed nu Gaal no pa thikuzumiqo sasu Shekem lo ighi ani, eno panonguye opelono aphughi hechesu wulupemo niye shi ani.

³² Tishenguno no eno owu timiqo ye putho lono chevelo eno aluzalo itshuu khavelo.

³³ Thanau inaqhe tsukinhe ipeghike mtsa ithu puzu ahza shimono zuleno aphughi lelo. Tishino Gaal ngo pa wu timiqono omujo chileniye khalacheu ipeghike lono nono khijehi kutsalukepu shilunikeno tijehi heqhi pithilulo!”

³⁴ Kuchono Abimelek ngo pawu timiqo ye putho lono chekhaveno Shekem khalacheuno amqo bidi shi ngokhe itshulukhave.

³⁵ Kughou Abimelek eno pawu timiqono Gaal no khalacheu ipeghi puzu aphughi khagholo puthugho akeu ithulukeno panonguno pututa kughutshua lono ithughikhave.

³⁶ Gaal no panongu ithuluno Zebul vilo pi, “Julo, timiqo naghuto huuno hilau iqi chekhanie!” Zebul no khochile, “Hupaqoye timi kumoe, ikemu naghuto yekukhu kicheqhoke.”

³⁷ Gaal no itaghi pi “Julo, naghuto huuno timi hilau iqichekhanie eno aloji lakhino chinichekeu phisubo kudau alaghi lo chechenie!”

³⁸ Tileno Zebul no pa vilo pi, “Nono aqhekuzashi atsa kuloghi pi akhakeqo khilakhave akya? Ninguye kushiniye Abimelek qe anikyapi noye nivilo pi akehu. Timi hu chekeqo ye nono jukunatha chekeqo. Noye ipepuzu panongu sasu aghu shilo.”

³⁹ Gaal no Shekem lo kuami sasu iqi puzu Abimelek sasu aghu shithuve.

⁴⁰ Abimelek no Gaal hakuqo thuve, ikeuloye Gaal ye pove. Kutomono ti aphughi khagho lono izakhave.

⁴¹ Abimelek ye Aruma lo acheke eno Zebul no Gaal ngo pa thikuzumi Shekem lono hapupokhave, ikehu panonguye tilehi kughuna kulupu shimlave.

⁴² Atsala tipau shelo timiqoye aluzalo huveniye kuto ake. Hipau ghili Abimelek vilo khamino pive.

⁴³ Pano pawu timi amqo kuthu shi kijeveno aluzalo ngokheluvepe; eno timi aphughi lono ipecheghikeu miqe apuzu tipaqo sasu kumjono heqhi pithive.

⁴⁴ Abimelek no pa mqo sasu azuu wupuzu aphughi khagho kheluve nikeu shi eno amqo kini aluzalo kughutshu puakeqono aluzalo timiqo phuwuno ghiqhi pithi khave.

⁴⁵ Abimelek ye tipa tsala kupuju aphughilo akeqo sasu aghu shie eno tile ngo akeqo heqhi pithive; pano aphughi tipau mithe-mitheyi puhavetsu eno amtino jonhasuvetsu!

⁴⁶ Shekem liwo qoghelo sakiphemino hipau ghili chilukelo panonguye Gaal Berit chineki lo poilono sukusho laghi phuju.

⁴⁷ Panonguye tilehi hekutsu pesu ngo anipikeu khamino Abimelek vilo pive,

⁴⁸ tighenguno Abimelek no pawu timiqo sasu Zalmon Naghutolo iqho. Tile pano amghu lakhi ikhiluno asubo lakhi yeqhino tipau thapesu pa kuobolo beluve. Pano pawu timiqo vilo mtsazu pano shiketoi panongu ghi tishi shilukhavelo ipive.

⁴⁹ Ikehu timi kumtsuno asubo lakhi khi yeqhino pebeluveno Abimelek papesu wu eno tipaqo pewo atupikiye ihjeghi qhekumqo pe qhiluve. Tishino panongu tile ami suve tsu, ikehu ti aliwo alou ngo akemi kiptimi totimi kumtsu kuqhakelo 1,000 kutolo pitivetsu.

⁵⁰ Tishiveno Abimelek no Thebez phughi homxa luvetsu no levetsu.

⁵¹ Tipaulo ighono akumto qogheki lakhi akehu aphughilo kiptimi totimi eno sakiphemi kumtsu tipaulo poilokhave. Panonguno alikhi akhatha susu sholokuu ilono tilauno aqogheki kunguu poikukhave.

⁵² Kughou Abimelek no tipau qogheki lo ighilukeno pano ahukikhalo ikupuzu aqogheki tipaulo ami suvetsu.

⁵³ Ikemu topumi lakhino athi tsughu chekeu tuqu pesu pa kutsulo vepuku ke lono pa boghe ghi kubovetsu.

⁵⁴ Tishike mtsa lono pano pa zuta angu petsucheku apu lhotheu kuno pi, “Ozutakihi sujopheno ighiqhivelo. Kughengu niye topumi lakhino iheqhi pithiveke ipipenishi amoe.” Ike kuchono apu huno pa zutakihi sujopheno pa chuxu qhi kelono paye thive.

⁵⁵ Kughou Israilmino Abimelek thivae pikeu chilukeno panongu kuchopu akilo idewokhave.

⁵⁶ Ikehu Alhou no hitoishi Abimelek no papu mithighi pa thikuzumi pano lhotsuni ghiqhi pithivekeu ghenguno angusu pa tsu chileveke.

⁵⁷ Alhou no Shekem timiqo pelono ghi panongu kumla lhoksa ghenguno aloqhi imevepeke, Gideon nu Jotham no panongu ghusho puaketoi imeveke.