XAKUTHAMI 8 - BAIBEL (BSI)

Theqhikulu Ashekhau

¹ Tileno Efraim timiqono Gideon vilo pi, “Noye kushiye Midiyami sasu aghushi nikelo ningu kumove kya? Noye kushiye hikithipushi ni peitha kya?” Panongu ye ighono amlo khumtsai muchho ae.

² Ikemu pano panongu vilo pi, “Ino mlalu keuye nongu no mlavekeu sasu kiu lonomu kimighi mlae. Nongu Efraim timi qono kiu kitila mlalukeno tipau ye ni timi kumtsu no mlakeu nguno ame kuau akijeuke.

³ Nonguno Alhou kuka vechewono Midiyami kukatou kini Oreb ngo Zib pama heqhi pithilue. Ino mlalukeuye tipau sasu kiu lono kimghi lunikya?” Kughou pano tishi pivekeno panonguye amlo idemove.

⁴ Tipa ghuloki loye Gideon eno pawu timi 300 ye Jordan lo ighino katha susu ikuluve. Panonguye akulho shive amu qeti tikutolo aghumi hacheke.

⁵ Kughou panonguno Sukot lo ighilukeno pano tipau taun lo akemi vilo pi, “Kishima asho hami pesu iwu timiqo tsutsulo. Panonguye akulho shikhavae, ipuzu niye Midiyami kukami Zeba ngo Zalmuna pama hachephie.”

⁶ Ikemu Sukot lo saphetomino pi, “Kushiye ninguye kiu kiu chuqupu mu pesuno owu ghushimi tsunikya? Kughengu noye Zeba ngo Zalmuna lelu mphie.”

⁷ Tighenguno Gideon no pi, “Alo! Kughouno AMPEU no Zeba ngo Zalmuna pama pesu iulo sutsu nikeno tithiuno ino aghasali lo achekeu sahu ngo apughu pesuno nongu heni!”

⁸ Gideon ye tileno iqesu Penuel lo ighi eno panongu vilo ghi aphiphishi qhuiniju, ikemu Penuel lo kuamiqo ghi Sukot lo kuami toi khochileve.

⁹ Tighenguno pano panongu vilo pi, “Ino shilusamono akivishi tokulu shi ide ighilu aye, niye hipau qogheki tuleqhive tsu nani!”

¹⁰ Zeba ngo Zalmuna pamaye pama wu ghushimi sasu Karkor lo ngo ake. Aghasaqha lo akemi shiyehqo ghushimi kumtsu kuqhakelo 15,000 likhi ghulu; ipuzu ghushimi 1,20,000 ye heqhi pithivetsu.

¹¹ Gideon no asaye yeghi phelono xesusu Noba ngo Jogbeha ajeu wuno akichiqhi tsughi ghushimi leke.

¹² Midiyami kukami Zeba ngo Zalmuna pamaye pove, ikemu pano hasusu wuno pama kughaluve eno pama wu ghushimi kumtsu akumsa ghenguno thughuyive.

¹³ Kughou Gideon no aghushiqa lono Heres Kita kudau idewo chekeno,

¹⁴ pano apumi lakhi Sukot lono cheghike sholu no pa vilo iniju. Apumi huno Sukot lo saphetomi pano lhotsuni tsuni je yepesu Gideon tsuve.

¹⁵ Tileno Gideon no Sukot lo timiqo lau wuno pi, “Nonguye ikuphunikeu milivekeu kumsulu anima? Nonguno achuqupu pesu iwu ghushimi akulho shive keqo tsumove kughengu ino Zeba ngo Zalmuna pama lelumphi ipie. Julo itehi pama hile ani!”

¹⁶ Tishino pano aghasali lo sahu ngo apughu ikhiluno Sukot lo sakiphetomi aghime tsu.

¹⁷ Tinguno alaughi Penuel lo aqogheki tuleve tsu eno tipau phughilo kuami heqhive tsu.

¹⁸ Tishino Gideon no Zeba ngo Zalmuna pama iniju, “Nokujono Tabor lo timi heqhivekeu kiutoi kemi kya?” Pama no khochile, “Panonguye otoike panongu kumtsu kukami lakhi nu toi khae.”

¹⁹ Gideon no pi “Panonguye imunoqo ke, iza kuchou nuliqoke. Ino ashoqhi mu shi pi anike tsalatsa nokujono panongu heqhi puaghimo aye nighi nokujo heqhi pithimoe.”

²⁰ Tishi puzu pano panu anoghiu Jether vilo pi, “Wuno pama heqhi pithivelo!” Ikemu anu no pa zuta sujo phemono auve. Paye itimi shi aphikehu pa vehu kunacho ghi ngove.

²¹ Tileno Zeba ngo Zalmuna pamano Gideon vilo pi, “Nono ighino nikujo ghiqhi pithivelo. Kiptimi no kiptimi kumla ghili shimasake.” Ikehu Gideon no pama ghiqhi pithive eno pama wu kemel kuolo akughupu nanu puchekeu kuqholuve.

²² Tishive kethiu Israilmino Gideon vilo pi, “Ningu shou ayepeu shilulo. Othiu opolo kughukomi kutolo ghi ayehpeu shilupelo. Kughengu nono Midiyami ulono ningu xaphe tsu.”

²³ Gideon no khochile, “Ni mu eno inu mu nongu shou ayehpeu shimo nani, AMPEU no nongu shou ayehpeu shinani.”

²⁴ Ikemu pano ishi pi, “Ino nongu vilo hi qhuiniju ani. Nongu kumtsu aghushi lono hakholukeu akini lo kighi chekeu pesu itsuvelo.” (Midiyami ghi aghasa qhalo achekemi toi Shuna kighi cheke)

²⁵ Timiqono khochile, “Ningu ye otsunike apulo shi akhanie.” Panonguno aphi lakhi qhaqhi eno kumtsuno kighi chekeu shuna xamunu hu pututa no hakholukeu hu pesu pa tsuchileve.

²⁶ Gideon no qhalukeu kighichekeu shuna xamunu kilogram muku ithulu eno tiye akughupu tunatunu, achila eno Midiyami no uchekeu hughughuikeu phinhemghaqo momu panongu kemel no akuo lo xini chekeqoye kihisu moe.

²⁷ Gideon no shuna pesu ajulho lakhi mla eno tipau pesuno paki Ofra lo ghope qhie. Tileno Israilmi kumtsu Alhou pheveno ajulho tipau mllaukhave. Hipau no Gideon eno pa kibolomi meluve.

²⁸ Israilmi no Midiyami theqhiluve eno kumu msaichi kepu kuhave. Ampe lhobidi kutolo Gideon no thimoke kutolo aghakhu lo alokughuno shilu.

Gideon Kithi

²⁹ Gideon ye pa kilo idewono tile acheuve.

³⁰ Paye anu lhotsuni ache, kughengu paye anipu kutomo sa achekehu.

³¹ Tinguno alaughi paye Shekem lo anipu amishiu lakhi ache; lino anu lakhi pa lau punu tsu eno pano paje Abimelek kutsu.

³² Joash nu Gideon ye aloqhi kitemi shino thive eno pa kumo ye Ofra, Abiezer limiqo taun lo papu kumo philo shiqhove.

³³ Gideon thive kethiu Israilmi ye Alhou lau amlo tsumoveno Baal mllauve. Panonguye Baal-Berit pesuno panongu lhou shiluve

³⁴ ipuzu AMPEU panongu Lhou ye qemove, khuuno aghumino panongu homxa pesu achekeu lono panoqo xaphe saghikeno tipau huthumove.

³⁵ Panonguye Gideon kibolomi laughi eno pano Israilmi ghenguno akumla kivi mlatsukeu ghi kumsumaveno kumu agigihu tsumove.