XAKUTHAMI 7 - BAIBEL (BSI)

Gideon no Midiyami Leve

¹ Ghulo lakhi Gideon khuu paje kutau Jerub-baal ghi ku tsukeno, pano pawu timiqo sasu inaqhe itheno ithuveno wo Harod Zupuki ipikeu lo aghazu shino ngoluve. Midiyami ghi More to ahuu akhila lo aghazu shino ngo ae.

² AMPEU no Gideon vilo pi, “Nono sasu ngo akeqo timi ye ighenguno ihulokeu shi auve ake ghenguno Midiyami shou tokulu pesu tsunikeu sho ani. Kughengu panonguno akuto shi kumsukeu no panonguno tolu kughashiveno ije pipi tsumo nani.

³ Timiqo lau kutughulo, ‘Khu-khumu msakeu ye akilo idewove pelo, eno ninguye Gilgal tolo ngo nani.’ ” Ikehu kuchono msakemi pano 22,000 ye idechile wove eno 10,000 likhi ngolu.

⁴ Tishino AMPEU no Gideon vilo pi, “Itaghi timi chilo aphie. Tighenguno panoqo sasu azulo ilolo eno tileno ino kishe pesu otsunie. Tsalatsa ino ovilo timi lakhi ogholo wupelo ipi aye paye wumasa nani. Itaghi ino ovilo timi lakhiye osasu wukevilo ipi aye paye wupe kevilo.”

⁵ Kuchouno Gideon no timiqo sasu azulo ilo eno AMPEU no pa vilo pi, “Khunoqono atsuno azu yekeshi pa mili no azu damine nikeno tipaqo kutashi qhilo eno khunoqono khonhequ no azu yenikeno tipaqo kutashi qhilo.”

⁶ Timi 300 ye auno azu shope ikuno ye; tinguno alauye khonhequ no azu yekhae.

⁷ AMPEU no Gideon vilo pi, “Ino oxaphelu nani eno Midiyami shou timi 300 khunoqo panongu ulono azu shope yekeno tipaqo vechewono tokulu tsuni. Tinguno alauye akilo idewove pelo.” ipive.

⁸ Ikehu Gideon no “Israilmiqo 300 hu kumoaye tinguno tilauye akilo kighide puwokhave. 300 ye panongu gholo hekutsu pesu ngolukhave. Midiyami ghazuye panongu qhou ti abokhu khila lo ake.”

⁹ Tipajino AMPEU no Gideon ahza tsu, “Ithuno panongu ghazu lethulo; tipau shou tolupenike ino akuka otsu nani.

¹⁰ Ikemu tsalatsa nono lemsa aye no ampino oqeu Pura sasu aghazubo lo iqilo.

¹¹ Panonguno kuptsa keu chilu nani eno tishiaye lenikeu amlo kuloghilu nani.” Ikehu Gideon ngo pa qeu Pura pamano aghumi ghazu aphelo iqi.

¹² Tilehi Midiyami, Amalekmi eno asayeqha lo achekemi shiyehqo huno tulhaqu tawocheke hutoi nhakha kuho akeu eno panongu wu kemel no azughi muku lo asaye jehi sasu ngo akhake.

¹³ Kughou Gideon no tipa alo ighikeno, timi lakhi no pa samo hitoi pa kusau vilo lhe aghikeu chilu. Pano hitoi lhe-aghi, “Isamouno barli sho lakhi ningu ghazu shou ikughino aphiki lakhi lo velu. Ikelauye aphiki hu ilaqiveno ayeghilo vedave cheghie.”

¹⁴ Pa shou huno pichile, “Tiye Israilmi, Joash nu Gideon zutakihi kiqi shi aghi nani. Tiye kutauye kiu kiqimu shi aghimo nani: Alhou no Midiyami eno niwu ghushimi kumtsu shou tokulu pesu pa tsuvae!”

¹⁵ Kughou Gideon no timi samo eno akiqi chiluvekeno, pano khoqhunhe no mllakeu shilu. Tishiveno pano Israilmi ghazu lo idechile ighino pi, “Ithulo! AMPEU no Midiyami ghushimi shou tokulu pesu tsuni cheni.”

¹⁶ Pano pawu timi lakhi khi ulo afuko eno ayeghili lakhikhi alou akuluqhe sutsu.

¹⁷ Pano panongu vilo pive, “Kughou ino aghazu phivilo wulu nikeno ti iju alo eno ino kiu shinikeno nongu ghi ti shilo.

¹⁸ Kughou ni eno imqono ningu fuko ighanikeno nongu ghi nongu fuko ighalo eno aghazu homxa ishi iqhaighulo, ‘Hiye AMPEU zuta eno Gideon zutakihi!’ ”

¹⁹ Gideon ngo pa lojimi 100 ye zubumta tonikelo aghukhe pe akeu kilive kelono wo ti aghazu phelo tolu. Ti toluke mtsa panonguno afuko igha eno panonguno pechekeu ayeghili hu kughapho thuve,

²⁰ tipau mtsa lono aloji amqo kini hughi titoi shi. Panongu kumtsu au piyiu no akulu kuqupe, eno au ajeuno afuko peno ighathuve; “AMPEU eno Gideon ghenguno Azutakihi lakhi!”

²¹ Timi kumtsu pututa alono aghazubo homxa puthugho kheluve, ikeuloye aghumi ghushimi akuchopu msano ighasusu pokhave.

²² Gideon wu timiqono panongu fuko igha kelono AMPEU no aghumi wu ghushimi pelono pano likhi panongu dolono azutakihi pesu xeqhikile aghushi thuvepe. Panongu ye posusu Zarethan kudau Beth-Shita kutolo eno Tabat phivilo Abel Mehola taun kutolo pokhave peke.

²³ Tishino Naftali, Asher laghaqo eno Manase lagha kinikujo lono timiqo kupheno panonguno Midiyami hakuqo thuve.

²⁴ Gideon no aghinimi hapesu Efraim ghakhu toghi kumtsu lo puwuno ishi piwupe, “Iqighino Midiyami sasu aghushilo. Jordan eno aghokiti lono Bethbara kutolo Midiyami pelono veche wukhavepe kepushi ngokheluvelo.” Efraim lo kuamino hekutsu pesu ngo puzu Jordan aghokiti lono Bethbara kutolo bothaluve.

²⁵ Panonguno Midiyami kukatou kini Oreb ngo Zib pama kughaluve; panonguno Oreb Tuqu lono Oreb heqhi pithive eno Zib no Zib Tsayizu tsughu phechekeu a lono heqhive. Panonguno Midiyami hasusu wupuzu Oreb ngo Zib pama kutsu lupuwo Gideon tsuve, tipau dolo Gideon ye Jordan kipelau ngoae.