XAKUTHAMI 18 - BAIBEL (BSI)

Mika eno Dan Lagha

¹ Tipa ghulokilo Israil lo kukami kuhae. Khaghi ghuloki lo Dan lagha no ngokepu yeghi phulu aye pukhaluveni keu shi ae, kughengu Israil lagha gholo Dan lagha ye ayeghi ithumlano akehu.

² Tighenguno Dan lagha no pano timi dolono amlo kivimi akumtomi pungu kishephe luno panongu pelo Zora ngo Eshtaol kuma dolo ayeghi phuluni malapi phuju wupe. Ike panonguye Efraim ghakhu toghi lo ighikelo Mika kilo ngolu.

³ Panonguno tile ngo akelono Levimi apuu tsa kipi amchishi chilu kelono panonguno pa lau wuno iniju, “Noye hile kiu shi ani kya? Eno khuuno osasu hile ighi kya?”

⁴ Pano khochile, “Niye Mika sasu avehu kishekulu kughano hile pa chine kishiu shi keu jume itsu ghi ngo ani.”

⁵ Panonguno pa vilo pi, “Tishi aye ninguno izu susu wuchekeuye tokulu shi nani kemokeno Alhou vilo iniju tsulo.”

⁶ Achineu no khochile, “Nonguye kumu amlo ime akepu kuhae. Kughengu AMPEU no hipau ghuzu lo nongu tucho mujo anie.”

⁷ Ike pano pungu huye Lais taun lo wunike cheve. Panonguno tile ighikelo timiqoye Sidoniami hutoi kuthathai alokughuno shi aghikeu ithulu. Panonguye alokughunoshi iquighai xu akemi khuu sasu mu kutsala kiyimto keu kuha kemiqoke; panonguye kiu avehupu shi anikeno tipaqo kumtsu pighi akemike. Panonguye Sidoniami launo ala sheshulo akemi eno khuno timi mu sasu kuhali chemokemi ke.

⁸ Pano punguno idechile susu Zora ngo Eshtaol lo ighikelo pano ghakhumino kiwala phuphelu kemo kyapi panongu vilo iniju.

⁹ Ikehu pano punguno khochile, “Ighilo ningu wuno Lais leveni. Nino ayeghi ithuluve ake ighono alo ani. Hilehi kiu kungo shi anikya? kumu mlakepu kuha; mighilo! Ningu wuno le luveni!

¹⁰ Kughou nonguno tipa-a tonikeno, timiqoye kitilamu pulu pusakeu nonguno ithulumo nani. Hiye ighono aghakhu kije lakhi; timi lakhino kiu lunishi anikeno kumtsu ithukulu a yeghike eno Alhou no hipau pesu nongu tsuvae.”

¹¹ Ikehu Dan laghami pano 600 ye aghushi wunike ghenguno Zora ngo Eshtaol qhiveno cheve.

¹² Panonguno chesu iqho Juda yeghi lo Kiriat Jearim ipikeu lo panongu ghazu shilu. Tighenguno ishi kutolo a-a tipau pesuno Dan Ghazu ipi chephi.

¹³ Panonguye tileno chesu wo Efraim ghakhu toghi lo Mika kilo ighilu.

¹⁴ Tileno pano pungu khunoqo Lais lo ayeghi juwu peniye puwukeno panonguno pano kusami vilo ishi pi, “Aki hipau lo asu no shikeu lhou tsandiyi no khikhape qhi puakeu nongu ye ithi anima? Tipau gholo ajulho lhou kutau ghi akhani eno efod ghi anie. Ninguye kiu shikepue pi nongu ye kumsu ani kya?”

¹⁵ Panonguno Mika kilo khile Levimi apuu no ngo akeno tipa a lo wuno paye kiutoi ngolu anikela pi pa iniju.

¹⁶ Tishi ake ghuloki lo Dan lagha pano 600 huye aghushinike aghili kutopesu khagho lo puthugho-a.

¹⁷ Pukujumi pano pungu huye vejoi aki sholokuu ilono ajulho lhou khikhi tsandiyino khikhape qhipu akeno tipau ikhiluveno kutau julho lhou ngo efod ishi ikhiluve. Tiye achineu huno timi 600 ghunanu pusu ighi akeqo sasu khagho lo ngo ake lonoke.

¹⁸ Timiqo no Mika kilo ilopuzu achine nhemghaqo ikhiluve kethiu achineu no panongu iniju, “Nonguye hilehi kiu shi ani kya?”

¹⁹ Panonguno pi, “Inaqhoi velo, kiu tsamu pikevi. Noye nigholo ighivelo eno ningu wu mijekutsuu achineu shivelo. Timi lakhi kibo chineu shi akeuye Israil lagha kumtsu shou achineu shikeu pavimo keshea?”

²⁰ Tishi pike huno achineu ye ighono aloviae, tighenguno pano achine nhemghaqo ikhiluveno panongu sasu cheve.

²¹ Panonguno ideghino panongu nuli, pichepighi eno anhemgha kumtsu pesu cheve.

²² Panonguno Mika ki lono kushuwa lo cheve kethiu no Mika no aghushinike pa kisughumi kuphe. Panonguno Dan lono ighikemi khami kughalu,

²³ eno panoqo shou ighapuku. Dan lono ighikeqo no idewo Mika iniju, “Kiu shivekeno timi hijijehi pocheni kya?”

²⁴ Mika no khochile, “Noye kushiye ‘kiu shive kya?’ nonguno iwu achineu eno ino alhou mlape qhipu akeu ikhipesu wukhaveno ighenguno kumu qhitsumoe.”

²⁵ Dan lono ighikemino pi, “Noye kiumu pimokeu pavi kughengu timi hipaqo mlo shikighideve no oleve nosae. Tishikeu lono noghi eno okibolomi kumtsu pithive nosae.”

²⁶ Tishi piveno panongu ye cheve. Mika ghi panonguye pa ghenguno ighono akumto eno paye panoqo tomla nani pikeu ithi veno idechile susu pa kilo wove.

^27-28 Tishive kethiu Dan lono ighikemino achineu ngo Mika no mlapesu qhikeu thime ikhilukhave tsuno panongu ye taun khikhi iquighai kemino ngo akeno eno alokughuno shi akeu taun Bethrehob Khila lo akeu Lais leniye wuve. Panonguno tile kughuna kuami heqhi pithiveno taun pitivetsu. Tishi akelo khunomu ighino panongu xaphekulupu shimove, kughengu Lais taun ye Sidon lono ala kushuwa lo kehu, tilikhi kumono Lais timiye khuno sasu mu kuptsa kilekeu kuha ke. Dan lono ighikeqono taun tipau mlakitheveno panonguno tile kughuna luve.

²⁹ Panonguno aje ghi Lais pe panosu Jakob nu jelono Dan ipi kukideve.

³⁰ Dan timiye asuatu julho shisuno mllanikeu kutoluve, ipuzu Jonathan khuu Gershom nu eno Muse tilimi keno pape lono Dan lagha ghenguno achineu shipenikeu shive, ikehu pa polo kughuko no timiqo sasu inami yeghilo akughu shiwumoke kutolo panongu chineu shicheke.

³¹ Mika wu ajulho lhou ye Shilo lo Aphiki lono Alhou mllauve kethiu kuto lo qhipua cheke.