XAKUTHAMI 17 - BAIBEL (BSI)

Mika su-atu Julho

¹ Aghuloki lakhi lo Efraim ghakhu lo timi lakhi pa je Mika ache.

² Pano pa za vilo pi, “Kughokela khami no owu tsandiyi 1,100 puka suwuvekelo nono akukau ghushoqhie, nono tishi ghusho akeu chilue. Julo, pisa tipau iulo ani. Pukape wuvekeu hu nike.” Pazano pi, “Inu AMPEU pelono okumghatsu peni!”

³ Pano pisa hu pesu paza tsuchile kelo lino pi, “Ghushokeu ngusu inu shou ikupemo nike ghenguno, ino tsandiyi hipaqo pesu AMPEU lau tsuve ani. Hipau pesuno asuno shikeu lhou tsandiyino nhape qhikeu shilu peni. Ino tsandiyi muno hipaqo pesu otsuchileve ani.”

⁴ Tishino pano tipau paza tsuve. Eno lino tsandiyi muno 200 pesu ayi kumlami lakhi pelono ajulho lhou asu pesu mlano tsandiyi no tipau khikha penike tsuveno tipau pesuno Mika kilo qhipuave.

⁵ Mika ye pawu akumlla-a acheke. Paye asu-atu julho hami ache eno efod lakhi ache, eno pamu gholo milakhi pelono pa chineu kumla shiche peke.

⁶ Tipa ghuloki lo Israil loye kukami kuhakehu; kumtsu no pututa ghoshi xu ache.

⁷ Tipau ghuloki lo Levi laghami lhothemi lakhi Juda lo Bethlehem taun lo ache.

⁸ Paye Bethlehem qhiveno a-a kutau khilela ngouveniye wuve. Ike pano izu susu cheke lono Efraim ghakhu toghe lo akeu Mika kilo ighilu.

⁹ Mika no pa iniju, “Noye khikudauno ighi kya?”

¹⁰ Mika no pi, “Isasu ngovelo. Imje kutsuu eno achineu shilo, tishiaye ino ampe lo tsandiyi muno chighi gholo aphimini eno achuqupu ishi otsunie.”

¹¹ Levimi apuu huno Mika gholo ngonikeu pulove eno paye panu lakhi kumlho shi ngove.

¹² Mika no pa pesu pa chineu shipenike sukusu shilu eno paye Mika kilo acheuve.

¹³ Mika no pi, “Niye itehiye Levimi lakhi pelo ichineu shiluve ake ghenguno AMPEU ye ilau achipishi woniae pi ino ithivae.”