XAKUTHAMI 16 - BAIBEL (BSI)

Samson no Gaza lo Wukeu

¹ Ghulo lakhi Samson ye Filistiyami phughi Gaza lo wuke lono kusalhalimi sasu kusholuno paye li sasu zuve.

² Gaza lo timiqono Samson no tile akeu ithiveno a-a tipau homxape puthotsu iqunei ngono panongu dolo ishi kumsua, “Ninguno thanau atsala pekighi kutolo ngokheno pa heqhi pithini.”

³ Ikemu Samson ye zubu mta kutolo likhi azua lo ngo apuzu ithuveno aphughi khagho hukikhaqo, atsukucho eno akhadu kumtsu sujovetsu. Pano tipaqo pa bighi shou bepu puzu Hebron ithulu chekeu toghi kutsuqa kutolo tipaqo kumtsu xapusu wuve.

⁴ Tipathiu Samson ye totimi lakhi lije Delila ipikeu khuu Sorek Khila lo achekeno tipau sasu kuzuvu wuve.

⁵ Filistiyami kukami pano punguno li lau wuno pi, “Amqu shino Samson vilo paye kiu lono akumto achenikeno ovilo pipelo, tishi anguno ninguno kishino pa kughalu eno tshuluve eno pape lono kumu shimlavepenie. Tishilu aye ningu lakhi khino ghukayi aqhe chighi qhaqhi otsunie.”

⁶ Ikehu Delila no Samson vilo pi, “Kishima, kiuno okugha pesu akumto shilu cheni keno ivilo pilo. Tsalatsa khamino okugha pesu pheda kudakudai veno opelono kumu shimlave peniye aye paye kiu shi anguno tishi shilunani kya?”

⁷ Samson no khochile, “Panonguno ashiyiko sulakeu kipli akithe the tsuni pesuno iphedave aye, niye kutami toi miqemilei veno kumu shimlave nani.”

⁸ Tishi pike lono Filistiyami kukamiqono ashiyiko kipli akithe the pai suthamla kepu tsuni pesu ighino Delila lau sughi tsu eno lino tipau shiyiko kipli pesuno Samson pheve.

⁹ Lino timi khami pesu kokuthabo hami lono ngokhe ape, tishino lino asheshu, “Samson, Filistiyami cheni!” ipi. Ikemu Samson no ashiyiko kipli tipaqo ayeho piti thave tsukeshi kumu akumcho shimono suthave. Tighenguno panonguye pawu tuqhou kumto kiu lono anikeno kumu mthave.

¹⁰ Delila no Samson vilo pi, “Julo noye kuchou tsa ivilo pimono ipishiqhivae, kishima, kishipuzu khamino opheda pesu qhilu nani keno ivilo pitsulo.”

¹¹ Pano khochile, “Panonguno akighi kichhe akithe khilemu peithamono achekeu pesu iphedave aye kutami toi niye miqe mileive nani.”

¹² Tighenguno Delila no akighi kichhe akithe pesuno pa phedave. Tishino lino asheshu, “Samson, Filistiyamiqo cheni!” Timiqo ye kokuthabo lakhiu lono ngokheae. Ikemu itaghi pano akighi kichhe akitheqo hu ayeho sutha ketoi pawu lono suthavetsue.

¹³ Delila no Samson vilo pi, “Noye itehi kutolo kuchou pimphie eno ipishiqhi aphie. Ivilo pilo kishipuzu khamino opheda luvekepu shilu nani keno.” Pano khochile, “Tsalatsa nono isakipli tsuni shiveno aphi gholo ghokuqhave puzu akupta suno putape qhive aye, nighi kutami toi miqemilei venani.”

¹⁴ Tileno Delila no pa muzupuzuve no pa sa kipli tsuni shino aphi gholo ghosu kuqhavetsu. Tishino lino akupta su suwo putape qhiveno asheshu, “Samson! Filistiyami cheae!” ipi. Ikeuloye pano kumu kupnamono pasa aphi gholo ghopli puakeu sujoluve.

¹⁵ Tighenguno lino pa vilo pi, “Noye kishipuzu noye ikimiye ani pilunikya? Kughengu nono omlo tsa ivilo pimoke. Kughengu noye ghuthu kuthu kutolo ipishiqhivae, eno itehi kutolo kiu lono akuka kumto anikeno noye ivilo pitsu mphie.”

¹⁶ Atsala pekighi kumtsu lo lino tamono iniju kichichi auve. Lino pa pelono pitsu peniye pa zuiza minimuloi akeu jupe pa ngaghaive.

¹⁷ Ikehu paye ashekha loye kuchou tsapesu li vilo pive. “Isaye khilemu miye chemoe,” pi pano pi. “Niye ipunu qhi kelono huthu susu Alhou lau ikhiphe tsukeu shi Nazario shivae. Ikehu isa miyeve aye niye ikuka puhavenia eno kutami toi miqemileive nani.”

¹⁸ Kughou Delila no Samson no kuchou tsa li vilo pikeu ithiveke mtsa, lino Filistiyami kukamiqo lau asutsa tsupuwu eno pi, “Itaghi ghuthu lakhi ideghijulo. Paye itehiye kuchou tsa ivilo pivae.” Tishike lono panonguno pisa panongu gholono pesu ide ighi.

¹⁹ Delila no li lukobo lono Samson khapeno muzupuzuve, tishipuzu timi lakhi kuno Samson sa ghokipli tsuni hu tsavetsupe. Ipuzu lino Samson ghime thuve, kughengu paye pa kuka puhave akehu.

²⁰ Tishino lino asheshupi, “,Samson! Filistiyami qo cheae!” Pano ida thughi eno kumsu. “Thosulo toi kuthole qhiveno kumu kupunamono wuluve nani.” Ikemu AMPEU ye pa pheve keu paye mthano ae.

²¹ Ikehu tileno Filistiyami no pa kughaluve eno pa nhethi lejovetsu. Tishive no alazayi kichhe yikipli no patshu sasu Gaza kughukilo akutsughutu kumla mla auvepe.

²² Ikemu pano tile ake lono pasa ipeghino thuwuve.

Samson Kithi

²³ Filistiyami kukamiqo kuqhano aghakishi kumlla kije lakhi shino panongu lhou Dagon mllanikeu shi. Panonguno hitoi phe , “Ningu lhou no nighumi Samson shou tokulu pesu ningu tsue!”

^24-25 Panonguno alokivi launo hitoi pi, “Samson kuphelo, eno pa pelo ningu lopivi ajukutunu tsu apenie!” Kughou panonguno akughuki lono Samson sasu khalacheu ipeghi keno, panonguno pa pelo ajukutunupu shitsu apeke eno pa pelono atsukucho kijeje kini dolo puthugho apeke. Kughou timiqono pa ithulukeno, panonguno alephe pano lhou she: “Ningu lhou no nighumi khuno niyeghi shipusavetsu eno ni timi kutomo heqhi pithive tsukeno tipau shou tokulu pesu ningu tsu!”

²⁶ Samson no itimi khuuno pa sunhepesu cheche keno pa vilo pi, “Ipelono hi aki choqhe pesu akeu tsukucho bulu pelo. Niye tipau mungu pesu ngonishi ani.”

²⁷ Aki tipaulo kiptimi totimi no ihulokeu shi kuhoqhe ake. Filistiyami kukami pano pungu ghi tile ngo ae, aki tsuqau ghi kiptimi totimi kuqhakelo 3,000 kutono Samson juae eno pa pelono panongu lopivi tsu apeke.

²⁸ Tileno Samson no inikhu, “Akughushu MPEU, kishima ikumsululo; kishima Alhou, thosu kuka ghuthu lakhi itsulo, tishi anguno Filistiyami no inhethi lejoluve tsukeu ghuthukhave lono amkhu kulupu shilupelo.”

²⁹ Samson no aki tsukucho amtau kuma dolo ngono tipau mutuluve. Pau hula hila atsukucho kughasuluveno tipau tula ghi

³⁰ ighamuku pi, “Ipelono Filistiyami gholono thikuqhave pelo.” Tishino pano pa kuka kumto kumtsu pephe sukinithu, tishi ke lono aki hu ilaqi Filistiyami kukami pano pungu eno tile kuho akemi shou ikuve. Samson ye pa kuxu ghuloki lono heqhi pithi keu nguno alauno pa kithi tsalani no timi kutomo pithivetsuke.

³¹ Pa thikuzumi eno pa kibolomino iqighino pa kumo ikhiluve. Panonguno pa kumo pesu wuno Zora ngo Eshtaol kuma dolo khile papu Manoa kuma akeno tipa alo qhovetsu. Paye ampe muku kutolo Israilmi sakipheu shiluke.