XAKUTHAMI 13 - BAIBEL (BSI)

Samson Punu Ghili

¹ Israilmi ye ithaghi AMPEU lau axine shive, ikehu pano Filistiyami pelono panongu shou ampe lhobidi kutolo ayeh pecheuve peke.

² Tipa ghuloki lo Zora taun lo timi lakhi paje Manoa ipikeu ache. Paye Dan lagha lono ipeghikemi kihi kusumi lakhi. Pa nipu ye atianuli ithumlano ache.

³ AMPEU wu kungumi no li lau ipeghino pi, “Noye ati anuli kuhano ighivae, ikemu noye kushuwo womono mishiniae eno anu lakhi ithuluniae.

⁴ Khilemu kiukiu ji pina ber ji pina momu mithemokeu chuqupu chupekevilo;

⁵ ipuzu onu punuve kethiu, khilemu pa kutsusa miye tsukevilo, kughengu pa punu ke tsala lono huthusu paye Alhou lau ikhiphe pesu Nazario shiniae. Pano Filistiyami lau no Israilmi ikhiphe lunikeu kumla huthu woniae.”

⁶ Tileno atopuu huno wuve no likimi vilo pi, “Alhou wu timi lakhi ilau ighi eno pa jukelo paye Alhou wu kungumi shi aghinani kughengu ighono qhivutsuniyi paju ithulue. Niye paye khikudauno ighikeno inijumove eno pa ghi paje ivilo pitsumoe.

⁷ ikemu pano ivilo pike niye mishino anu lakhi ithulu nani ipi. Pano ivilo aji, ber ji momu mithekumo chuqu hipaqo peitha kevilo pi lakhavae, kughengu anu huye pa kuxu aketivilo ikhiphe pesu Alhou tsuve no paye Nazario shive ni ake.”

⁸ Tileno Manoa no AMPEU lau inikhu, “Kishima, AMPEU, Alhou wu timi nono puwukeu pelo nilau ideghipeno anu punu kelo ikujo ye kiu shimasa keno ni vilo pitsu pekepu shitsulo.”

⁹ Alhou no Manoa no iniju akeutoi shitsu, kuchono pa wu kungumi huno atopuu no alulo ngo ake lono li lau ide ighi. Tile li kimi Manoa ye li gholo kuhae,

¹⁰ ikehu lino paikhavi lono posu wuno pa vilo pi, “Julo timi khuu puzuu igizulo ipeghikeno itaghi ilau ideighi ani.”

¹¹ Manoa no ilhethu pa nipu papesu wuve. Pano timi lau wuno iniju, “Noye inipu sasu kuptsa keu timi hu kesha?” “Iye,” ipi pano khochile.

¹² Tileno Manoa no pi, “Tishiaye, kughou nono piqhipuakeu tsa shikupuve nikeno tile anu ye kiu shi nani kya? Paye kiutoi keu kuxu xuwuve nani kya?”

¹³ AMPEU wu kungumi no khochile, “Onipu ye ino li vilo kiu pive akeno tipaqo kumtsu shimasae.

¹⁴ Liye atsayibo lono ipeghikeu kiukiumu chumoni; liye kiukiu ji mu yemoni, ber ji yemoni, momu mithemokeu chuqu chumoni. Liye ino kiu pive akeno tipaqo kumtsu shimasae.”

^15-16 Manoa ye timi ighi akeu huye AMPEU wu kungumi ipikeu mthano pa vilo pi, “Kimiyeno kitila ngokhe tsu aghilo ikujono ane lakhi heqhipe lho otsuni.” Ikemu kungumi huno pi, “Niye ngokhe kepu shinamu no chuqupu chumoe. Ikemu okujono kutonishi aghiaye AMPEU lau akipti kumllagho kiqi lono pitino mllalo.”

¹⁷ Manoa no pichile, “Oje ikujo vilo pitsulo, tishiaye kughou nono piqhipuakeu otsa shikupuni keno tilehi ikujono osheqhe agigihu otsunike.”

¹⁸ Kungumi no iniju, “Noye kushiye ije ithinishi anikya? Hiye akumzapu je lakhi.”

¹⁹ Tighenguno Manoa no ane lhothe lakhi, athi hami elu eno tipaqo pesu AMPEU khuu akumzapu kumla mlacheni keno pa lau akipiti kumlla tuqu shou beno mllae.

^20-21 Akumlla tuqu shou ami kuyiqu kunguu iqu iku ae, tileno Manoa ngo pa nipu pama no AMPEU wu kungumi huye ami kuyiqu gholono kungughalo ikuchekeu ithuluve. Tileno Manoa no timi huye AMPEU wu kungumi kena pi ithiveno pama akimi anipu ye agi pishiqho ngoluve. Tithiu pama ye khilemu kungumi ithumlave.

²² Manoa no pa nipu vilo pi, “Nikujoye Alhou ithuluve akeke thiveni putsae!”

²³ Ikemu pa nipu no khochile, “Tsalatsa AMPEU no nikujo pithivenikeu shi aghiaye paye khilemu nikujono akumllagho shipesu mllakeu ikhilumoni che; momu nikujo zulo hipaqo piyemoni cheke momu thime akumzapu hipaqo nivilo pimoni cheke.”

²⁴ Tipathiu atopuuno anu lakhi punulu eno paje Samson kuvetsu. Anu ye thuwuve eno AMPEU no pa kumghatsu.

²⁵ AMPEU wu akuka huno pano Zora ngo Eshtaol kuma dolo Dan ghazu lo ake lono pa shikumtoluve.