XAKUTHAMI 12 - BAIBEL (BSI)

Jeftha ngo Efraimmi

¹ Efraim timiqo ye aghushi nike ghenguno kutoluve; panonguno Jordan hechesu Zafon kutolo ikughino Jeftha vilo pi, “Noye kushiye ni kutughumono alughi hechesu Amunmi sasu aghushiniye wukeghi ningu kumove kya? Ninguno oki gholono noghi sukuqha pitive nani!”

² Ikemu Jeftha no panongu vilo pi, “Iwu timi eno nighi Amunmi sasu atsa kughavae. Niye nongu ku kemu nonguno panongu launo ni ikhiphelumoe.

³ Kughou ino nongu laju puhavekeno, ino ikuxu ighumono alughi kathasu ikuno panongu sasu aghushi eno AMPEU no panoqo shou tokulu itsu. Tighenguno nonguye itehino kushiniye isasu aghushini pi anikya? “

⁴ Tileno Jeftha no Gilead lo kuami kumtsu kukutsu saghino Efraimmi sasu aghushino panoqo theqhiluve. (Efraimmi no ishipi, “Nongu Efraim ngo Manase lo kughuna kuami Gileadmi, nonguye Efraim ghakhu lono pokauvekemi qoke! “)

⁵ Efraim lono poka cheghikeu lakhachile pe qhinike ghenguno Gileadmino Jordan kakutha laghi kumtsu kheluve no leluve cheke. Kugho kughomu Efraimmi no pokanishi aye Gileadmi vilo hechelu penimapi ahza khucheke, tishiaye Gileadmi no hitoi iniju che, “Noye Efraim timi lakhi keshea?” Tsalatsa pokachekeu timi huno “Moe” ipi aye

⁶ Gileadmino pa vilo hitoi pilo piche “Shibbolet.” Ikemu timi huno Shibbolet pimlano Sibbolet ipi aye tileno pa kugha luno Jordan kakutha alono heqhi pithive che. Hitoi Efraim timi 42,000 kutolo heqhi pithivetsu.

⁷ Jeftha ye ampe tsugho kutolo Israilmi saphelu. Tishino paye thive eno pa kumoye pano achekeu taun Gilead lo shiqhove.

Ibzan, Elon, Abdon

⁸ Jeftha thiu Bethlehem lo ighikeu Ibzan no Israilmi saphelu.

⁹ Paye anu shighi anga shighi ishi acheke. Pano pangaqo pesu timi kutami kilo kulapuwokhave eno panu shighi pelono inalimi shighi sasu kulakupu shilupeke. Ibzan ye ampe tsuni Israilmi saphelu,

¹⁰ tishino paye thive eno Bethlehem lo qhove.

¹¹ Ibzan thiu Zebulun lono ighikeu Elon no ampe chighi Israilmi saphelu.

¹² Tishino paye thive eno Zebulun lughi lo akeu Aijalon lo shiqhove.

¹³ Elon thiu Pirathon lono ighikeu Hillel nu Abdon no Israilmi saphelu.

¹⁴ Paye anu lhobidi eno atilimi shighi ache tipaqoye gadaha lhotsuni shouno oqho-iqi ache. Abdon no ampe tache ghenguno Israilmi saphelu.

¹⁵ Tishino paye thive eno pa kumoye Amalekmi ghasa toghilo Efraim lughilo Pirathon lo qhove.