SAMUEL ATUGHIU 9 - BAIBEL (BSI)

Saul no Samuel Sasu Kusho

¹ Benjamin lagha lono ighikemi kinimi eno timi zukulumi lakhi pa je Kish ache. Paye Abiel nu eno Zeror tilinu, Afia lagha lono ikowokeu Bekorat kibolomike.

² Paye anu ajukiviu apumi lakhi pa je Saul ipikeu ache. Saul ye Israilmi dolo kumtsu nguno ajukiviu eno kutamiye kumtsu pa bighi qhou likhike.

³ Kish wu gadaha hami apanagha poveno akehu pano Saul vilo pi, “Ogholo aqemi lakhi sasu wuno gadaha juwulo.”

⁴ Pamano Efraim ghakhu eno Shalisha tokujo kumtsulo juwu, ikemu gadahaqo phumlave; tighenguno pamaye itaghi Shaalim to kudau phuwuju, ikemu tipa aloghi gadaha qo phumlave. Tighenguno itaghi pamaye Benjamin lughi kudau phuwuju kemu tikudau ghi phumlave.

⁵ Kughou pamano ju susu Zuf lughi kudau ighikeno, Saul no pa qeu vilo pi, “Nikujo akilo idewoveni kholo, kughengu ipuno gadahaqo ghiliye kumsumono nikujo ghiliu kumsupe amlo susu shi aghinosake.”

⁶ Aqeu huno khochile, “Qele, hipau taunlo akimthemi lakhi ani eno timi kumtsuno pa gihu ikhilu cheni eno pano pikeuye kumtsu kuchou shi achipikalu chenike, paye hile acheni. Tighenguno nikujo pa lau wuni shilo, tishi aye gadahaqoye khile anikeno pano nikujo vilo pitsu lunani.”

⁷ “Tsala nikujono pa lau wu aye kiu pesu pa tsuni kya?” ipi Saul no iniju. “Nikujo jolalo achuqupu kuhava eno kutau kiu nhemgha mu pa tsukepu kumu puchemova no kishinia?”

⁸ Aqeu no khochile, “Ino tsandiyi tachu kitila lakhi pecheni. Ino tipau pa tsu aye khileno gadahaqo ithulu nani keno pano nikujo vilo pitsulu nani.”

⁹ (Khaghiye Israil lo timi lakhino Alhou lau kighini kilejuniye wukelo pano hitoi piche, “Ighilo, ningu asakiqhimi lau wunie;” khaghi asakiqhimi ipi chekeu itehiye tungkupuu ipi kuuva.)

¹⁰ Tileno Saul no pa qeu vilo pi, “Tiye akukumsu kivi achipilo shi ani, nikujo wujuni kholo.” Tighenguno pamaye taun tipaulo akimitheu timi no ngo akeu alo wu.

¹¹ Pamano taunlo iqhocheke lono ilimi khami azu puniye cheghikeqo sasu kusholu. Pamano ilimiqo vilo iniju, “Asakiqhiuye taun lo anima?” ipi.

¹² Panonguno khochile, “Paye ani, ile ti hu nokujo zuu checheni. Papashi wulo; paye itehino taun lo ighi ani, kughengu ishiye timiqono qhemghai ke alono aghakishi kumlla tsuni cheni kehu.

¹³ Nokujono taun lo iloghi kelo pa ithulu nani, pano atoghi tipaulo ighi mphiloye pa kusu puakemiye chuqukusho shimo nanike eno pano ti aghakishi hu kumgha inibetsu paghini aphie; tithiuno khuno kusu puanikeno panoqono chulu nani. Tighenguno mtazu wu aye pano ti atoghilo wumphi lono nokujono pa sasu kusholu nani.”

¹⁴ Ikehu pamaye taun lo iqho. Pamano taun lo iloghi kemtsa Samuel ye atoghi kudau iqhoniye cheghikeu jupuwo ithulu.

¹⁵ Saul no ighinikeu tsala lakhi zuuno AMPEU no Samuel lau piyekusu shipua.

¹⁶ “Thoghiu hipa ghuloki toike lono ino Benjamin lagha lono ighikemi timi lakhi olau puwu nani; tileno pa pelo Israilmi shou ayehkipeu shikepushi nukishe tsulo eno pano Filistiyami ulono Israilmi xaphelu nani. Ino iwu timiqo ghime ithuluva eno panonguno akukuphu tsulepi igha khu akeu chiluvae.”

¹⁷ Kughou Samuel no Saul sasu kusholu keno, AMPEU no pa vilo pi, “Timi hipau ghili ino ovilo pi akeu hu hike. Pano iwu timiqo shou ayehpe nani.”

¹⁸ Tileno Saul no Samuel lau wu, paye khagho hukikha phivilo ngo akehu eno ishi iniju, “Asakiqhiu huye khile anikeno ivilo pi tsulo? “ ipi.

¹⁹ Samuel no khochile, “Ino asakiqhiu ke, izuu shighi akumlla-a kudau kholo, nokujo kinikujo ishiye igholo ilhumasae. Thoghiu inaqheno nokujono iniju akeu kumtsu kishekulu khochile tsuni eno nokujo laghilo xaide wolu penani.

²⁰ Gadaha puhavekeu ishi kuthu shive akemu kumu tipaqo ghenguno amlo sakevilo; kughengu tipaqoye phupheluvae. Ikemu Israilmi no lunishi kutu akeuye khuuno kya? Tipau huye noke no eno opu kibolomi qoke.”

²¹ Saul no khochile pi, “Niye Benjamin lagha lono ighikemi Israil lo ashiayeh dolo akitilauke eno ni shiaye gholo akimkheuke. Tighenguno noye kiu kiqi lono ishi isasu kuptsa ani kya?”

²² Tishino Samuel no Saul ngo pa qeu sasu kokutha bo kije lakhilo sailono khile shoinami pano shighi-a kutolo kusupe puakeu alo aghulhu lipa kutsu kudau pama sailo kughuqave.

²³ Samuel no alikhuli kishiu vilo pi, “Ino ovilo ashi leqhi lakhi pakutashi qhipuaghilo pi akehu tipau hilau sughilo.”

²⁴ Tileno alikhuli kishiuno ashi luko hu sughitsuno Saul zulo qhitsu. Samuel no pi, “Oghenguno ashi hipau kutope puatsuae. Hi chulo. Opelo hipau ghuloki lono ino kusupe puakeqo gholono ashi hipau chupeniye msape qhipuanike.” Ikehu Saul no tipa tsalani Samuel sasu aghulhu shilu.

²⁵ Kughou panongu akumlla-a lono chesusu taun lo iqighi keno panonguno azua lakhi Saul pelono zupeniye akitsuqalo kuto puaghitsu,

²⁶ eno paye tipa alo zuve. Inaqhe tsukutho lau Samuel no akitsuqalo no Saul kuno pi, “Ithughivelo, ino opelono olaghilo idewove penike kichetsuni.” Saul ye ithughiveno pa ngo Samuel ishi kumtsa alaghi kudau chewu.

Saul Ayehkipeu shi Kishelu

²⁷ Kughou panongu kumtsa chesu taun shekha kudau ighi keno, Samuel no Saul vilo pi, “Aqeu pelono nikujo zuwu huvepelo.” Tileno aqeuye pama qhiveno azuwu huve kelono Samuel no pi, “Hile kitila ngolo eno Alhou no kiu pikeno ino ovilo pini.”