SAMUEL ATUGHIU 8 - BAIBEL (BSI)

Timiqono Akukau Khu

¹ Kughou Samuel no kitemi shiwuve keno, pano pa nuli pesu Israil lo xakuthau shivetsu.

² Akichiu jeno Joel eno aitiuno Abija ke; pamaye Beersheba lo xakuthau shiche.

³ Pamaye pama papuno shi piyekeu kuxu laghi papemoe; ikemu kishino pisa ithulu masakeno tiu likhi amlo tsusheuve, ikehu pamaye timi launo kulugho luveno khilemu amikucho shi atsa kugha xathatsu moe.

⁴ Tishike lono Israilmi sakiphemi kumtsuno Rama lo Samuel lau wuno

⁵ pa vilo pi, “Julepi, noye kitemi shiva eno onu pamaye nono mlapiyekeu papemoe. Tighenguno kukami lakhi sukusu shipesu ningu shou ayehpe penikeu tsulo, tishi anguno aghakhu kutamino aketoi ningu ghi akukau lakhi aluveniae.”

⁶ Samuel ye panonguno akukau lakhi tsulepi qhuiniju ighi keulo aloqimove; tighenguno pano AMPEU vilo inikhu

⁷ eno AMPEU no pi, “Timiqono ovilo kiu pi ighini keno ti kumtsu inijutsulo. Panonguye opevekeu shi amoe; ikemu ino panongu kukau shi akeu ti-u milive anie.

⁸ Ino panongu sasu Ijip lono ipeghi kelono ishikutolo panonguye ilauno tsughusu wuve eno alhou kutauqou mllaukhave; eno ilau pulhapuju shicheketoi itehiye olau mla ani.

⁹ Tighenguno panongu tsa inijulo, ikemu aloqhi panongu shikumsano panongu kukauno kiutoi panongu peitha wonani keno kishekulu panongu vilo pitsulo.”

¹⁰ Samuel no khunoqono pa lau ighi puzu akukau lakhi tsulepi khu akeno tipaqo vilo AMPEU no pa vilo kiu pikeno kumtsu kishekulu panoqo vilo pivetsu.

¹¹ Samuel no kishe kulushi pi, “Nongu kukauno hitoi nongu peitha nani, pano nongu nuli pesu ghushimi shi nani; panongu gholo khami no pawu khurshi lo sakicheu shipe nani, khamino khurshi lono ghushimi shipe nani eno kutamiqoye pau khurkulu zuu chewu keu shipe nani.

¹² Pano khami pesu kijemi shipe nani eno timi 1,000 shou ampi shitsu penikeu shinani eno khamiye lhopungu shou ampi shipe nani. Nongu nuliye pa lu hokide penani, pa lulo xa jeli ghile hupe nani eno pa ghunanu eno khurkulu lo peithakepu shinani.

¹³ Nongu ngano pa ghenguno axokutsungu mlakeu shipe nani eno pa likhuli kishiu eno asho kumlau shipe nani.

¹⁴ Pano nongu lu akiviuqo, atsailuqo eno oliv suphojo akiviqo luvetsuno tipaqo pesu pa qholo kijemiqo tsuve nani.

¹⁵ Pano nongu wu athi eno atsaizu saje chighilo lakhi luve nani eno pawu hiyam lo kijemiqo kushumi eno kutami kijemi ghenguno luve nani.

¹⁶ Pano nongu aqepumi aqelimi eno amshi akiviuqo, nongu wu gadaha ishi luveno tipaqo pelo pa kumla shipe nani.

¹⁷ Pano nongu pichepighi saje chighilo lakhi luve nani eno nonguye pa quaxemi shive nani.

¹⁸ Tipa tsalanilo nonguno nongu kukau khikhi nongu kutoshino kishelukeno pa ghenguno igha muchho ipeghi nani; ikemu AMPEU ye tipa tsalalo nongu khochile tsumo nani.”

¹⁹ Samuel no ishi piamu timiqoye pano piakeulo kumu inijutsumoe ipuzu ishi pi, “Mopi qeti, ninguye akukau lakhi lunishi anie,

²⁰ tishiaye shiyeh kutami toi, nilikhi ni kukauno ningu shou ayehpe eno ningu sasu aghu shiwu eno aghushiqalo aghushi nani.”

²¹ Samuel no panonguno pikeu tsa kumtsu aboakeshi iniju apuzu AMPEU lau wuno pitsu.

²² AMPEU no khochile, “Panonguno lunishi aketoi akukau lakhi tsulo.” Tileno Samuel no Israilmi vilo akilo idewo khavelo pi pitsu.