SAMUEL ATUGHIU 6 - BAIBEL (BSI)

Puloshoqhi Bohu Tsuchileve

¹ AMPEU wu Puloshoqhi Bohu ye Filistiya yeghilo aqhi tsuni kutolo ngove.

² Filistiyamino achinemi eno kuduumi ku-kutsuno iniju. “Ninguye AMPEU wu Puloshoqhi Bohu pesu kiu shive kepu kya? Puzuu acheke alo tsuchile puwuve nike ghenguno kiu pesu tipau gholo sukuqhano tsupuwuni kya?”

³ Panonguno khochile, “Tsalatsa nonguno Israil Lhou wu Puloshoqhi Bohu tsuchile puwuveni piaye, nongu xine jume agho lakhi pesu tipau gholono tsupuwumasa. Agho sumo keloye Puloshoqhi Bohu likhiye khilemu tsuchile puwu kepu kumoe. Tishi anguno nonguye viluve nani eno paye kushiye nongu ghime akeno nonguno tipau phupheluve nani.”

⁴ “Tishiaye kiu gho pesu tsupuwuni kya?” ipi timiqono inijulu. Panonguno khochile, “Shunano shikeu mishe julho pungu eno shunano shikeu ajih pungu, lakhi khino Filistiyami kukau pano pungu kiqi shilo, kughengu tipau pusano nongu kumtsu shou ghi eno nongu kukamiqo shou ghi iku ghike.

⁵ Nonguye amisheqo eno ajih khipaqono nongu luza shipusave tsukeno tikuma julho shisuno akishe agigihu pesu Israil Lhou tsulo. Tishiaye pano nongu ghime akeu lono nongu lhouqo eno nongu yeghi ghime akeu lono lakha luvetsu nani.

⁶ Nonguye kushiye Ijipmi eno Ijip kukau toi ighono amlo kuthovi ghi ngo ani kya? Alhou no panoqo shikimighi akethiuno Israilmi Ijip yeghi lono phepuwotsu keu ghili hu kumsumave kepu kumoe.

⁷ Tighenguno yeghikilu akithe lakhi mlano amshiqu kini puzuu khilemu akho puchemo keu kuma pelono tipau sunhepelo; ikemu tikuma mishitiye aza launo hatha pesu kututa shi puwovelo.

⁸ Tishino AMPEU wu Puloshoqhi Bohu ti mishikululo abohulo suno nonguno shunano ajulho shipuzu nongu xine ghenguno agho lakhi kiqi lono puwuniye akeu phivilo qhilo. Mishikulu pelono pakutoshino xapuwo palalo chevepelo.

⁹ Tishipuzu khikudau wuveniala jukuto alo; tsala tipauno Bet Shemes kudau wuve aye Israil Lhou no alhoksa ghime hipau nongu lau tsupuwu ipi ithivelo. Ikemu tsala hipauno tikudau wumove aye Israil Lhou no pusa hipau ningu tsupuwu mono pakutoshino hishi sholu kepu shive kena ipi ithiniae.”

¹⁰ Ikehu panongu vilo piketoi panonguno shiju: panonguno amshi kini sughino mishikulu pupenikeu shi kuokhasu betsu ikemu atiye ti amshikilo khatha pesu qhive.

¹¹ Panonguno Puloshoqhi Bohu pesu mishikululo ikhisu, tipau gholo shunano shikeu ajih julho ngo amishe julho shi keu ishi sukuqhano puwupe.

¹² Tileno amshi kuma huno akho xapusu vejoi hula-hilaumu wumono Bet Shemes ake kudau huve. Panonguno igha ghi tikudau che susu wuve. Filistiyami kukami pano pungu ghi ti papesu Bet Shemes lughi kudau wu.

¹³ Bet Shemes lo timiqoye akhilalo ashothi ghile hu-a, Zulekhavi lono panonguno pishipuku jukeuloye Puloshoqhi Bohu ithulu. Panonguno ti ithulu kelo ighono alokiqipushi ithulu.

¹⁴ Mishikulu hu chesusu timi lakhi pa je Joshua khuu Bet Shemes lo achekeno tipau lulo ighi puzu atuqu kije lakhi phivilo ngove. Tileno timiqono asuno shikeu kulu hu hephove eno amshi kuma hu heqhino pitino aghashikeu kumlla kiqi lono AMPEU mllave.

¹⁵ Levi laghano AMPEU wu Puloshoqhi Bohu hu ikhiqheluve, tipau gholono shunano shikeu amishe julho tile supe pua keqo ghi ikhiluve eno tipau pewo atuqu kije shou bepe qhive. Tishino Bet Shemes timi qono akipti kumlla ghakishi eno kutau aghakishi kumlla kumtsu shipesu AMPEU lau tsulu.

¹⁶ Filistiya kukami pano pungu huye tipaqo miqeju apuzu tipa tsalanino idechile susu Ekron lo wove.

¹⁷ Filistiyami no shuna no shikeu amishe pungu pesu panongu xine gha shighi AMPEU lau agho lakhi kiqi lono tsupuwu, tiye Ashdod, Gaza, Ashkelon, Gat eno Ekron hipaqo phughi lakhi khi ghenguno ke.

¹⁸ Panonguno shunano shikeu ajih Filistiya kukami lakhi khino aphughi lakhi khi shou ayehpe akeu kiqi lono tsupuwu-putukha puakeu taun ngo aphuqo khikhi akupuwu sumokeno tipaqo kiqi lono Joshua Bet Shemes ghami lulo atuqu kijelo khile AMPEU wu Puloshoqhi Bohu qhikeno ishikutolo tile kiu shikeno tino thopi shilu aphie.

¹⁹ AMPEU no Bet Shemes ghami pano lhotsuni kutolo heqhi pithivetsu kughengu panonguno Puloshoqhi Bohu lo jupukuveke. Tile timiqoye mlo qae, kughengu AMPEU no panongu shou akithi kije puwutsuke.

Keriat Yearim lo

²⁰ Tighenguno Bet Shemes lo kuami no pi, “Khuno AMPEU, hi akimthe Lhou zulo puthugho kulupu kya? Ningu launo putosu apenike ghenguno khilau puwuve kepu kya?”

²¹ Panonguno aghinimi hapesu Keriat Yearim lo puwuno ishi pi, “Filistiyamino AMPEU wu Puloshoqhi Bohu suchile sughivae. Iqighino hipau puwuvetsulo.”