SAMUEL ATUGHIU 5 - BAIBEL (BSI)

Puloshoqhi Bohu Filistiyami ulo Auve

¹ Filistiyamino Puloshoqhi Bohu suxaluve kethiu panonguye tipau Ebenezer lono kuhopesu panongu phughi Ashdod lo wuveno,

² achinekilo khile panongu lhou Dagon qhipua keno tipau phi ihjeghi qhive.

³ Thanau itheno Ashdod phughilo kuamiqono jukeloye asu-atuno shisupua keu Dagon hu agino pishiqhoghi AMPEU wu Puloshoqhi Bohu zulo ikiqive aghikeu ithulu. Tighenguno panonguno Dagon sunheputhuno pa-alo ghope qhive.

⁴ Ikemu tishiwo thoghiu ghi panonguno ithughino jukeloye Dagon huye itaghi pishiqhouno AMPEU wu Puloshoqhi Bohu zulo ikiqive aghi. Itehiuloye akutsu eno au kinikujo kututa shi itaveno akulaghilo ikiqi aghikeu ithulu; ipuzu aphi mpi likhi pa-alo aghi.

⁵ (Tighenguno ishi kutolo Ashdod lo kuami Dagon huthu chekemi achinemi eno tipau mllachekemiye ti Dagon ikiqive aghikeu alo apukhu nesumono pukacheve chephi.)

⁶ AMPEU no Ashdodmi aloqhi ghimeno panongu kichi mamaive tsu. Pano panongu ghimevetsu eno tipau hokumxalo kuamiqo pelono aphi aulo mishe ipeghipe.

⁷ Kughou kiu shive keno panonguno ti ithulu veno pi, “Israil Lhou no ningu eno alhou Dagon ghime ani. Ninguye Puloshoqhi Bohu hipau hile qhipua kepu kumoae.”

⁸ Tighenguno aghinimi hapuwuno Filistiya lo kukami pungu kuno panongu vilo iniju, “Ningu Israil Lhou Puloshoqhi Bohu pesu kiu shivetsuni kya?” “Tipau Gat lo pewuvelo,” pi panonguno khochile, tighenguno panonguye tipau kuhopesu Filistiya phughi kutau Gat ipikeulo wuve.

⁹ Ikemu ti suwo qhikithishi AMPEU no aphughi tipaughi aghimetsuno ighono panoqo mlo kichipuhavetsu. Aphughi tipaulo muchomi eno lhothemi kumtsu philo mishe ipeghivepe.

¹⁰ Tighenguno panonguno itaghi Puloshoqhi Bohu tipau kuhopewo Filistiya phughi lakhiu Ekron ipikeulo wuvepe; ikemu tipa phughilo iloghi kemtsa timiqono ighamuku pi, “Panonguye Israil Lhou Puloshoqhi Bohu pesusu hilehi ighi akeuye ningu kumtsu heqhi pithive peniye sughi ani!”

¹¹ Tighenguno panonguno itaghi Filistiya lo kukami kumtsu kuno pi, “Israilmi wu Puloshoqhi Bohu hipau pesu inahuu khile akeno tipaulo tsuchilevelo, tishi anguno ningu eno ningu kibolomi heqhimo nani.” Aphughi kumtsulo amlo kichi puhavetsu kughengu Alhou no aloqhi panongu ghimevekeu lono.

¹² Khunoqono thimokeno panongu ghi aphilo mishe ipeghikeu ithulu ikehu timiqono ighamuku panongu lhou vilo kuphutsulopi khu.