SAMUEL ATUGHIU 3 - BAIBEL (BSI)

AMPEU no Samuel lau Ipeghi

¹ Samuel ye Eli qholono AMPEU qeche. Tipa ghulokilo AMPEU tsa ighono mipimighi cheke; papashi kungunhetsu ithulu keu shimono acheke.

² Tipa ghulokilo Eli nhethiye zamemei veke paye kumu ithumlaghi shiuve eno pa alo ihozughi ngoche;

³ Samuel ye ti kuho chekeu alo zua, khile akimthe Puloshoqhi Bohu qhipua keno. Inaqhe tsukutho lau, akulu kuqukeu iqu aphi lono

⁴ AMPEU no Samuel ku. Pano khochile, “Ni hile ani!”

⁵ ipino Eli lau po ighino pi, “Nono ikuke ghenguno niye hile ighi ani.” Ikemu Eli no khochile, “Niye oku moe; zu auvelo.” Ikehu Samuel ye idewo zuauve.

⁶ Tileno AMPEU no akiniu ghi, “Samuel” ipi paku. Itaghi Samuel no ida ithughino posu Eli lau wuno pi, “Nono ikuke ghenguno niye hile ani.” Ikemu Eli no pi, “Inu niye oku moe; noye azualo wuvelo.”

⁷ Tipa ghulokilo Samuel ye AMPEU mtha aphi eno AMPEU sutsa mu pa lau piyekusu shimphi.

⁸ AMPEU no akuthuu ghi Samuel ku. Ikehu paye ida ithughino Eli lau poighino pi, “Nono ikuke ghenguno niye hile ighi ani.” Tileno Eli no AMPEU no Samuel ku ani kenapi ithive.

⁹ Tighenguno Eli no Samuel vilo pi, “Wuno ihozu aghilo tsala pano itaghi oku aye, noye ishi pilo, ‘AMPEU ,oqeuye iniju ani.’ ”

¹⁰ Tithiu AMPEU no ighino puthughono azuu kuketoi “Samuel, Samuel” ipi paku. Tileno Samuel no pi, “Pilo, oqeuye iniju ani.”

¹¹ Tishike lono AMPEU no Samuel vilo pi, “Jualo, ghulo lakhi ye ino Israil timiqo lau kiwana mlani cheni, tiye ighono kumsa kimshipu shi nani, ikehu hipau chilukemi kumtsu kichi mamaive nani.

¹² Tipa tsalalo ino Eli kibolomi lau kiu shi nanipi piqhipua keno abothu lono ashekha kutolo shikupu nani.

¹³ Ino pa kibo alhokuthu ghenguno ghimeveni keu tsa azuuno pa vilo pivae, kughengu pa nuliqono imithikeu shi alhoksa mlae. Eli ghi panonguno kiu mla akeno ithi ae, tishimu paye panongu hasumoe.

¹⁴ Tighenguno ino Eli kibolomi lau tushoqhi pivae kiu ghakishi momu kumlla nomu panonguno lhoksakugha xine mlavekeu jonha lunichemovae.”

¹⁵ Samuel ye inaqhe kutolo azualo ngoa; tishino ithughi puzu AMPEU ki hukikha khaqhitsu. Samuel ye kungunhetsu ghili pesu Eli vilo lhemsave.

¹⁶ Ikemu Eli no Samuel kuno pi, “Inu, Samuel.” Eno pano pi, “Ni hile ani.”

¹⁷ Tileno Eli no iniju, “AMPEU ye ovilo kiu shile pikya? kumu kusukevino ivilo lhelo. Nono pano pikeu kumtsu ivilo pimove aye Alhou no ighono aghime kije otsu nani.”

¹⁸ Ikehu Samuel no thwokha kumtsu kishekulu shi pa vilo pivetsu; kiumu kusumono lhekhavetsu. Eli no pi, “Paye AMPEU ke; pa ghenguno kiuno akivi keno tipau shitsu nani.”

¹⁹ Samuel ye thuwuve. AMPEU no pa gholo ae eno Samuel no pikeu kumtsu kuchouno achipikave.

²⁰ Tileno Israil timi kumtsu no ayeghi cheku halauno halau kuto lono Samuel ye kuchouno AMPEU wu tungkupu shiluvaepi ithiluve.

²¹ AMPEU no tamono Shilo lono pa lau piyesu, puzuu Samuel zulo ipeghi piye eno pa putsa keno tipa alono. Eno kughou Samuel no pini keno Israilmi kumtsuno initsuche.