SAMUEL ATUGHIU 18 - BAIBEL (BSI)

¹ Saul ngo David pama kuptsa taluve. Tipathiu Saul nu Jonathan ye David ju ighono pa lokutu sheve eno pa likhi pa kimiye ketoi David kimiyesheve.

² Tipa tsala lono huthusu Saul no David ye akilo idewo pemono pa gholo ngo acheuvepe.

³ Jonathan no ighono David kimiyekutu keu lono pa sasu alhokuthu ashou shinikeu shi tushoqhive.

⁴ Chijeboboi keu phikuzu pano uchekeu xaqhino David tsuve, tipau gholono pawu aghunanu, pa zutakihi, asuzu eno apokha kumtsu David ulo suvetsu.

⁵ David ye Saul no aghini pa pulu puwukeu kumla kumtsulo tokulu shilu, tilehino Saul no pa pesu pawu ghushimi gholo kijemi lakhi shiluvepe. Tishi shikeu lono Saul qholo kijemi eno timi kumtsu alaushi alovi kitheluve.

Saul no David ju Anheshuuve

⁶ David no Goliat heqhiveno ide wochekelo eno ghushimi ghi akilo idewocheke ghulokilo, Israil yeghi lo taun kumtsu lono totimino akukau Saul sasu kusho lunike khalacheu ipeghikha. Panonguno alokivi lephe, ilhe eno tur-tur lebo ngo akighi lebohu pesu igha.

⁷ Panonguno ikhikulu shikeulo totimino ale hitoi phe. “Saul ye 1,000 kutolo heqhilu, Ikemu David ye 10,000 heqhilue.”

⁸ Hipau lekiphe chilu pesu Saul ye ighono amlo ideveno ishi pi, “David ye 10,000, ikemu niye 1,000 likhi heqhiluepi shipili anikena! Tipashelo panonguye pa pesu akukau shiveniye ayeakena!”

⁹ Tighenguno tipa tsala thiuye paye ighono anheshuveno David pulupusa thuve.

¹⁰ Thoghiuye Alhou no puwukeu aghahwu lhoksa no Saul qhasuluve, eno paye pa kilo kughuzumi lakhi hutoi ngono atsaza thuve. David ye tsala kipetsulo shiche ketoi, akighilebo igha ae, ipuzu Saul ye angu tsuqu pesu ngoa.

¹¹ “Ino angu pesu atozulo pa chheda kuqhani,” pi Saul ye pa mlo kutouno kumsu pua, ikehu ghuthu kini angu pa lau chhepuwo; ikemu David no ghuthu kini kujolo tsughuluve.

¹² Saul ye David msathuve kughengu AMPEU no David gholo auveno pa pheve kehu.

¹³ Tighenguno Saul no pa hapuwuno timi 1,000 shou ahzakutsuu shipeni keu shive. David no pawu timiqo sasu aghushiqalo ilo

¹⁴ eno pano aghushikeu kumtsulo tokuluu shilue, kughengu AMPEU no pa gholo akehu.

¹⁵ Saul ye David no tokulu shi lukeu ithulu pesu alaushi pa msathuve.

¹⁶ Ikemu Israil eno Juda yeghiqha kumtsuno David kimiyeuve kughengu paye ighono tokulu eno sakiphe kivike.

David no Saul nga Luve

¹⁷ Tishike lono Saul no David vilo pi, “Inga akichiu Merab ani. Ino li kughapesu onipu shipenike tsunie, nono amlo kuloghi eno aghokulu ghushimi shino AMPEU wu ghushiqaqolo aghushi tsuaye.” (Saul no hishi kumsukeuye Filistiyami pelono David heqhivetsu penikeu muqu lonoke eno pa uza loye David pithimo niyeno ke.)

¹⁸ David no khochile, “Ni khuukeno ni laghaye kiu keno kishipuzu niye akukau makishiu shiluni kya?”

¹⁹ Ikemu kughou Merab pe David kilo puwove kepu do tovekeno, liye timi kutami Adriel khuu Mehola lono ighikeno pa kilo kula puwove.

²⁰ Ikemu qeti Saul nga Mikhal ye David ju li lokutuuve eno Saul ghi ti chilukelo pa lokivishive.

²¹ Tileno pano pa likhi pa putsa ghi ishipi, “Niye Mikhal pelo David kilo wopeni akena eno li lichhe vechewono Filistiyami pelo David heqhi pithiluvepeni.” Ikehu akiniu loghi Saul no David vilo pi, “Noye imakishiu shiniae.”

²² Pano pa qholo kijemiqo vilo tuqhouno David putsano hitoi pilo pipuwu, “Akukau ghi eno pa qholo kijemi kumtsuno oju alo akhani; eno hitoi akelono noye pa nga sasu kulakupu shiluvelo.”

²³ Tileno panonguno tipau tsa pesu David vilo pitsu kelono pano hitoi khochile, “Ikithipu ikumlhopu no akukau makishiu shilu akeuye ighono agigihu kije kushuwoe.”

²⁴ Kijemino David no kiu pikeno tipau pesu Saul vilo pitsu,

²⁵ tileno Saul no itaghi panongu vilo David putsa wulo pi ahza hitoi tsu puwu: “Akukauye olauno ame khu amoe ikemu Filistiyami aphighu yiko ghamokemi akukau ghumi timi 100 phighu ghathavetsulo.” (Saul no hitoi akukughu shikeu vechewono Filistiyami pelono David heqhi pithive peniye shike.)

²⁶ Saul wu kijemino Saul no kiu pilo pikeno tipau pesu David lau piputotsu, ikehu David ghi akukau makishiu shinike pa zuvuve. Kulakupu shinikeu tsala kihithamphilo,

²⁷ David ngo pawu timiqono wupuzu Filistiyami 200 heqhive tsu. Tishi puzu pano panongu phighu kumtsu pesu Akukau zulono kihi pe qhitsu, tishikeu lono paye pa makishiu shiluveniye ke. Ike Saul no pa nga Mikhal pesu David kilo kula puwove.

²⁸ Saul no mutsuqhei AMPEU ye David gholo auve keu ithive eno panga Mikhal ghi pa kimiye akeu ithive.

²⁹ Ike Saul ye alaushi David msa kitheuveno pano xu ake dolo paye pa ghumi shiuve.

³⁰ Filistiyami ghushimi no ighono aghushi, ikemu aghukishi kumtsulo David no Saul wu kijemi kutami nguno alaushi tokulu shiluve. Tishi kehuno David ye ighono ajekipi shiluve.