SAMUEL ATUGHIU 12 - BAIBEL (BSI)

Samuel Kikini Sutsa

¹ Tileno Samuel no Israilmi vilo pi, “Niye nonguno ivilo shitsulo pikeu kiqi lono mlave tsuae. Nongu shou ayehpe penike ghenguno niye nongu lau akukau lakhi tsuvae,

² eno itehiye pano nongu saphe woni ae. Ighenguye, niye kitemi shiva, asa mpavea eno inuli ghi nongu sasu anie. Niye ilhothe lono itehi kutolo nongu sakipheu shisusu ighivae.

³ Ino hile aphi lono tsalatsa ino kiwala kuqupimi puaghi aye itehino AMPEU eno pano kishephetsu keu akukau zulono ingukulu velo. Ino khuwala wu amshi momu gadaha lupuaghi aye, ino pishi piyi puaghi aye momu khuala qodaneda keu shipuaghi aye, ino khuala lau kulugho lupuaghi aye, ino thime hipaqo mlapuaghi aye, tipau thelilo lochileveni.”

⁴ Timiqono khochile, “Moe, noye khilemu ni pishi puamoe momu ni qodaneda keu shipu amoe; noye khu laumu kumu lupuamoe.”

⁵ Samuel no khochile pi, “Tishi aye AMPEU eno akukau pano kishelukeu pama zulono ishi tsala lono thopi shighi nonguno niye amikuchoe pi phuluvae.” “Iye, AMPEU no ningu wu thopi ke” pi panonguno khochileve.

⁶ Samuel no itaghi pi, “AMPEU khuno Muse eno Aron kishelukeno eno khuno nongu puasunoqo Ijip lono saipeghilu keno ti huke.

⁷ Itehi nonguno puthugho ke alo ngo aghilo, eno ino AMPEU zulono nongu qhuiniju piputo ani AMPEU no nongu eno nongu puasunoqo xaluniye akichiqhipu kumla shikeqo kumsu chilelulo.

⁸ Kughou Jakob eno pa kibolomi Ijip lo wuvekeno tile Ijipmino panongu shikighimeve eno nongu puasuqono AMPEU lau kuphutsu lepi igha khue, tishike lono pano Muse ngo Aron pama hapuwu puzu Ijip lono panoqo saipeghilu eno tishino panoqo pelono hipa yeghilo kughuna luvepeke.

⁹ Ikemu timiqono AMPEU panongu Lhou kumsumave, tighenguno pano Filistiyami eno Muab lo akukau eno Hazor phughilo ghushimi shou zatou Sisera ighino nongu puasuqo sasu aghushino panoqo shou tokulu shiluvepeke.

¹⁰ Tishikeu lono panonguno AMPEU lau igha kuphu tsulepi khu eno pi,’Ninguye axine shive kughengu ninguno olauno tsughu susu poveke, AMPEU! ipuzu Baal ngo Astar lhou mllauve. Ni ghumi ulono ni xaphelu tsulo, tishiaye nino omllanie!’

¹¹ Tileno AMPEU no Gideon hapuwu, pashelo Barak, pashelo Jeftha eno ashekhashi ipuwuke. Ningu lakhi khino nongu ghumi ulono xaphelutsue, ikehu nonguye sukusho qholo anie.

¹² Ikemu kughou Amun lo akukau Nahas no ighi puzu nongu lethu keno, tile nonguye AMPEU no nongu kukau shi akeu milive eno ivilo ishi pive, ‘Ningu shou kapenike akukau lakhi tsulo!’

¹³ “Nonguno kishephe luve keu akukau hile ani; nonguno pa khuae, eno AMPEU no nonguno khuake toi tsuvae.

¹⁴ Tsalatsa nonguno nongu MPEU Alhou akishe tsu, pa huthu aye pa tsa initsu aye eno pa zahkutsuqo aghokulu shi aye, nongu eno nongu kukauno pa pape aye thwokha kumtsulo nonguye achipishi nani.

¹⁵ Ikemu nonguno AMPEU tsa initsu move, pa zahkutsuqo hebideve aye, pano nongu eno nongu kukau mithive nani.

¹⁶ Tighenguno, nonguno khile puthugho anikeno tipa alo ngolo, tishi aye AMPEU no thime kije mlaniye akeu nonguno ithulu nani.

¹⁷ Hiye qhaikeu tusho ke, tishie ma? Ikemu ino inikhu aye AMPEU no tsutsu kusu tsutsughu puwutsu nani. Kughouno hi shikeu sholu nikeno nonguno AMPEU lau axine kije mlavekeu eno nonguno pa vilo akukau lakhi tsulepi khukeuye kuquve kenapi kumsukidelu nani.”

¹⁸ Ikehu Samuel no inikhu eno tipa tsalani no AMPEU no tsutsukusu eno tsutsughu puwutsu. Ikelaye kumtsuno AMPEU eno Samuel msauve,

¹⁹ eno panonguno Samuel vilo pi, “Akijeu, kimiyeno AMPEU, oLhou vilo nighenguno inikhutsulo, tishi keu lono ningu pelo thivepemo kepu shitsulo. Ningu ye ningu xine kutau likhi kumono akukau lakhi khuluvekeu huno axine shivaepi kumsu kideluvae.”

²⁰ Samuel no panongu vilo pi, “Msakevilo nonguno hitoi alhoksa kumla shivenamu AMPEU launo tsughusu wuve kevilo, ikemu nongu mlo kuchopu pesu pa huthulo.

²¹ Kichileu lhouqo pape wukevilo; panonguye nongu kuphuluni chemo momu nongu xaluni chemoe, kughengu tipaqoye kuchou kumoke.

²² AMPEU no tsaquino tushoqhivae eno paye khilemu nongu phevemo nani, kughengu nongu pesu pawu timi shini keu pano kughakutha shiluvae.

²³ Ighenguye, ino nongu ghenguno pa lau inikhutsu akeu huno axine shi apenikeu AMPEU no lakhavae. Tishinike zuqhu, kiuno nongu ghengu akivi eno achipiu keno ino nongu shika tsu nani.

²⁴ Nongu mlo kuchopu pesu AMPEU gholulo eno akivishi pa qelo. Pano nongu ghenguno thime kije mlavetsu keu kumsululo.

²⁵ Ikemu, tsala nonguno axine shi kibe auve aye nongu eno nongu kukau ye shipusave tsu nani.”