SAMUEL ATUGHIU 11 - BAIBEL (BSI)

Saul no Amunmi shou Tokulu

¹ Aqhi lakhi thiu Amunmi kukau Nahas no pawu ghushimi Gilead lughilo akeu Jabes taun lenike ighi. Jabes lo kuamino Nahas vilo pi, “Ni sasu vishoshi velo, tishiaye nino noye ningu yehkipeu ipi ikhiluni.”

² Nahas no khochile, “Ino thime lakhi lono nongu sasu vishoshini: ino timi kumtsu nhethi ajeu chixejo pevetsuni eno tishikeu lono Israilmi lau jukusa sughipeni.”

³ Jabes lo alayemino pi, “Israil yeghi kumtsulo asutsa pikulha wulu kepushi atsala tsuni ningu tsulo. Tsala khunomu nikuphu tsumove aye, tithiuno ninguye ogho shive peni.”

⁴ Aghini kishimino Saul no ngochekeua Gibea lo ighi kemtsa asutsa hu pesu pithi, ikeloye timiqo kumtsu qaukhave.

⁵ Tishi akelono Saul ye alu lono pa mishitsu qo sasu wocheghi puzu pano iniju, “Kiu shivekeno kumtsuno qa akhani kya?” Tileno panonguno Jabes lono ighi kemi aghini kishimino sughikeu sutsa pesu pa vilo pi,

⁶ Saul no hipau sutsa chilu kemtsa Alhou ghunguno pa shou ighino paye ighono aloghu ideve.

⁷ Pano amshitsu kini heqhino ghekuchotha piniyi shive puzu aghini kishimi pelono Israil yeghiqha kumtsulo hipau sutsa pesu ghutuwu pe: “Khuu khuumu Saul ngo Samuel pama papesu aghushiqalo ilo ghimokeuye amshitsu heqhive ketoi pa lau tishi nani!” Israilmi kumtsuno AMPEU no tishi vetsuke msa kelauno panongu kumtsu khunomu itshumo no khala cheu ipe kumqolu.

⁸ Saul no panoqo Bezek lo hekutsulu: tilehi Israil lono ighikemino 3,00,000 eno Juda lono ighikemino 30,000 ishi ipeghilu.

⁹ Panonguno Jabes lono ighikemi aghini kishimiqo vilo ishi pi, “Thoghiu puchouno nongu kuqhophelu nani.” Kughou Jabes lo kuamino asutsa hipau chilukeno, panonguye ighono alovi sheveno

¹⁰ Nahas vilo pi, “Thoghiu no ninguye ogizulo ipeghiveniae eno nono pulokeu kiqi lono ningu lau kiu kiumu shilu nani.”

¹¹ Thoghiu itheno Saul no pawu timiqo amqo kuthu shi kije eno panonguno zughuyi aphi lono aghumi ghazu kudau powu eno Amunmi lethu eno puchomughu kutolo Amunmi ghiqhithuve; eno khunoqo achilishi pokalu keno panapaghai chekhave eno khilemu mikini kumtsa ngolupe kepu do shetsumove.

Saul Akukau Ikhikulu

¹² Tileno timiqono Samuel vilo pi, “Saul ye nikukau shipemlae ipi akeqo khilau wukhavea kya? Tipaqo niulo suvetsulo tishi aye nino tipaqo heqhi pithivetsuni!”

¹³ Ikemu Saul no pi, “Ishiye timi khumu pithive mlae, kughengu hipa tsalanino AMPEU no Israilmiqo kuqhophelue.”

¹⁴ Eno Samuel no panongu vilo pi, “Ningu kumtsu itaghi ghuthu lakhi Gilgal lo wuno Saul ye ningu kukau ipi shuphe tsuni.”

¹⁵ Ikehu panonguye Gilgal lo wu, eno tipa-a akimthe alono panonguye Saul ye akukau ipi shuphelu. Tishino panonguno kuposhukulu ghakishi shipesu tsulu eno Saul ngo Israilmi kumtsuno alokivi kije shilu.