SAMUEL ATUGHIU 10 - BAIBEL (BSI)

¹ Tishino Samuel no oliv teli supuchekeu bohu lono Saul tsuqolo lepuku tsuno pa muma eno ishi pi, “AMPEU no pawu timi Israilmi shou ayehkipeu shipenike okisheluvae. Nono pawu timiqo shou ayehpeni eno panongu ghumi launo sushoniae. Hi shi akeuno AMPEU no opelo pawu timiqo ayehkipeu shipeniye akeu michipu shi anike:

² Ishi nono iqhiveno wuve kemtsa noye Benjamin lughilo akeu Zelza alo Rachel kumoa phivi lono timi kini sasu kusholu nani. Pamano nokujono gadaha phuchekeuye ithuluvapi nokujo vilo pinani eno opuye tipau ghenguye amlo samovae ikemu nokujo khikudau wuve akelapi tino pa mlo sa ani eno paye ishi iniju ani, ‘Niye inu ghenguno kishive tsunikela he?’

³ Tishino noye chekithethu shi wulo eno Tabor lo chinichekeu subo ake alo ighilu nani, tilehi timi kuthu Bethel lo Alhou mlla nike ghenguno wucheghi keu kusholu nani. Panongu gholo milakhino ane kuthu hasasu chekeu, milakhino ashopa kuthu pecheghi keu eno timi akuthuuno ashiyikono shikeu bohu lono aji chhitoi pucheghi keu ishi sholu nani.

⁴ Panonguno petha otsu nani eno ashopa kini pesu otsu nanike noye tipau ikhilu masa.

⁵ Tishino noye Gibea lo Alhou toghilo iku nani, khipa alo Filistiyami ghazu anikeno. Taunlo ilocheke lalo nono tungkupumi aloji lakhi atoghilo akumlla khache shipuake kudauno akighi lebo jeli, amqu lebo eno fulili ighasusu iqicheghi keu nono sasu kusholu nani. Panonguno ilhe eno ighamuku cheghi nani.

⁶ Tishi kelono AMPEU ghunguno akumtoshi oshou ighi nani eno noye tungkuptsa pinani ipuzu noye pakuta keu timi shive nani.

⁷ Kughouno hipaqo sholu nikeno, Alhou no omijesutsu keu kiqi lono kiu kiumu shilo.

⁸ Noye izuuno chesu Gilgal lo wuluve nani, tipa alono ino osasu kusholu nani eno piti kumlla ghakishi eno kuposhukulu ghakishi tsu nani. Tilehi atsala tsuni kutolo ino ighino ovilo kiu shikepu keno pitsumoke kutolo ngokhe aghilo.”

⁹ Kughou Saul no Samuel qhiveno wuchekeno, Alhou no alhoayeh kithe Saul tsuve. Samuel no pa vilo pipuakeu kiqi lono thwokha kumtsu shilu.

¹⁰ Kughou Saul ngo pa qeu pama Gibea lo ighilu keno tungkupmi aloji lakhino pa sasu kusholu. Zulekhavi lono Alhou ghungu no pa peitha luve eno pa ghi panongu kighilhe gholo sukuqhaluveno ighamukuuve.

¹¹ Timi khunoqono azuuno pa ithi akeno pano tishi shi akeu ithulu puzu panongu dolo iniju kile, “Kish nu shou kiu ikughivea kya? Saul ghi tungkupmi lakhi shiuve akeshea?”

¹² Tipa alo kuami lakhino ishi iniju, “Tungkupu kutamiqoye khileno ighi kha kya? eno panongu papuqoye kiutoi kemi pi nonguye kumsu anikya?” Tileno atsa hipauye ahole tsa shi ghi athiuye hitoi piuve, “Saul ghi tungkupmi lakhi keshea?”

¹³ Kughou Saul no ilhe tave eno ighakeu tave kemtsa, paye atoghilo akumlla khache kudau wuve.

¹⁴ Saul papu thikuzuu no Saul ngo pa qeu pama ithulukelo, pano hitoi pama vilo iniju, “Nokujoye khilau wuve kya?” Saul no khochile pi, “Gadaha juniye wuveke, ikemu panongu phumlave ke ghenguno nikujoye Samuel juniye wuveke” ipi.

¹⁵ “Tishiaye paye ovilo kiu pikya? pi Saul papu thikuzuuno iniju.

¹⁶ “Pano nivilo pikeuye gadaha qoye ithuluvae” ipi pike. Ikemu paye papu thikuzuu viloye Samuel no pa vilo paye kukami shiveni cheni pikeu tsaye pitsumo.

Saul no Akukau Shiluve

¹⁷ Samuel no akupulu chine ghenguno timiqo Mizpa lo ku-kutsu

¹⁸ no panongu vilo ishi pi, “AMPEU, Israil Lhou no pi ani, ‘Ino Ijip lono nongu saipeghilu eno Ijipmi ngo timi kutami nongu ghime kichemi launo nongu sulekholu.

¹⁹ Niye nongu Lhou ke, nongu kukupna eno shiluksa lono nongu xaphe kuluu ke, ikemu ishiye nonguye imiliveno akukau lakhi nongu tsulepi khu ani. Tishi aye nongu pututa ashiayeh eno alagha kiqi lono AMPEU zulo hekutsu kumqo ngolo.’ ”

²⁰ Tileno Samuel no Israil shiyeh alagha kumtsu pa phivilo kupunu kumqo ngope eno AMPEU no Benjamin lagha kisheluve.

²¹ Tishino Samuel no Benjamin lagha pelono azuu ipeghilupe eno Matri kibolomi kishepheluve. Tileno Matri kibolomi pelo azuu ipeghipe eno Saul Kish nu kishepheluve. Panonguye pa phuju ikemu pa phumlave kelo

²² panonguno AMPEU vilo iniju, “Pa nguno kutami anikeo kuhave akya?” AMPEU no khochile pi, “Saul ye hukudau akho nhemgha thiu itshu anie.”

²³ Tileno panonguno posu wuno Saul sasu timiqo lau ighi eno panonguno pa jukelo kutami kumtsu pa bighi qhou likhi shi ithulu.

²⁴ Samuel no timiqo vilo pi, “AMPEU no kishephe tsukeu timi hipau ke! Ningu gholo khumu pa toikeu kuhae.” Timi kumtsuno ighamuku pi, “Akukau axupushulu peniu!”

²⁵ Samuel no timiqo vilo akukau lakhi chipiu eno kumlapuqo pesu kishekulu pitsu eno tipaqo ghili kaku lakhilo yesuvetsuno akimithe-a lakhilo kutsupe qhivetsu. Tishive kethiu pano panoqo kumtsu akilo wove pe.

²⁶ Saul ghi pa ki Gibea lo wove. Pa gholo aghu kivimi khunoqo mlo Alhou no butsu keno tipaqono pa sasu wo pa phei.

²⁷ ikemu timi khami kumu avehu kuhakeqono pi, “Kishi puzu timi hipauno nilau kiu akivi kumla shilunia?” Panonguno Saul piputha eno kumu agho suwo pa tsumoe. Ikemu paye inaqhoive ke.