SAMUEL AKINIU 8 - BAIBEL (BSI)

David wu Ghushimino Tokulu

¹ Ado hami thiu Akukau David no Filistiyami lekithelu, panongu theqhiluve eno panonguno qhasupesu achekeu kishekhavetsu.

² Tipathiu pano Muabmi ghi theqhi luve, pano akughumi ayeghilo ihozupe eno panongu kuthu thu dolo kini niye pithive tsu. Ikehu Muabmiye pawu timi shilukhave eno zahme pa tsuuve.

³ Tipashelo itaghi pano Siriya ghakhulo Zoba ipikeu leluve. Rehob nu Hadadezer no Eufrati ghoki ahuu qhasu pe achekeu xaqhe kitheniye wuche.

⁴ Tileno David no pawu khurshi kipemi 1700 eno aghukishimi pano 20,000 kutolo leluvetsu. Pano khurkulu 100 ghenguno lukumkhashi khurshi qhiluveno achiliye kumtsu apukhu kighichevetsu.

⁵ Tileno Damaska lo akemi Siriyamino akukau Hadadezer kuphuniye ghushimi amqo lakhi hapuwu. David no tipaqo leno timi 22,000 kutolo pithivetsu.

⁶ Tishino pano panongu lughi lo ghushimi ghazubo qhiwove, ike panongu ye pawu timi shikhave eno zahme pa tsuuve. AMPEU no aqha kumtsulo David pelo tokulu shiluvepe.

⁷ David no Hadadezer wu kijemino Shuna zuto pesu wocheghi keu ghi hakholuveno tipaqo pewo Jerusalem lo qhiluve.

⁸ Hadadezer no kachekeu phughi Beta eno Berothai kumalo alazayi kutomo David no ikhipewuvetsu.

⁹ Hamat lo akukau Toi no David no Hadadezer wu ghushimi kumtsu theqhiluvae pikeu chilu.

¹⁰ Tileno pano panu Joram hapesu akukau David tokulu ghenguno akishe eno shikimthi keu tsa pipeniye hapuwu, akukau Toi ye ghuthu kutomolo Hadadezer sasu aghu shicheke. Joram no David tsunikeu gho shuna, tsandiyi, alazayi ishi pesusu wu.

¹¹ Akukau David no tipaqo ikhiluno akumlla hoho lo peithanike ghenguno pano theqhiluvekeu shiyehqo tsukeu shilue-

¹² ashiayehqo ye hipaqoke: Edom, Muab, Ammun, Filistiya, Amalek eno pano Hadadezer launo hakholukeu thimeqo ghi ke.

¹³ Amiti Khila lono David no Edommi pano 18,000 heqhi pithiveno ideighike lono alaushi ajekipi shikitheve.

¹⁴ Pano Edom yeghiqha kumtsulo ghushimi ghazu qhiwove, eno tile akeqoye pawu timi shilukhave. AMPEU no aqha kumtsulo David pelono tokulu shilupe.

¹⁵ David no Israil yeghiqha kumtsu shou ayehpeluve eno paw timiqo pelono achipiu eno amikucho lono aphiphishi ithulupeni keu mutsuqhei shitsu.

¹⁶ Joab Zeruia nu no ghushimi Zahtsuu shilu; Jehoshafat, Ahilud nuno thwokhalo yekikithiu shilu;

¹⁷ Zadok. Ahitub nu ngo Ahimelek, Abiathar nu pamano achineu shiche; Seraiya no kughaki lo akiyeu shiche,

¹⁸ Benaia Jahoida nu no David ghukheu shiche; eno David nuliqono achinemi shiche.