SAMUEL AKINIU 23 - BAIBEL (BSI)

David wu Ashekha Tsa

¹ Jese nu David ye Alhou no pa pesu kijemi shitsuke, Jakob Lhou no pa kisheluno akukau shilupeke, eno paye Israilmi ghenguno alekungo kivi iqiphe chekemi. Atsa hipaqoye David no kishekha tsa pikeu ke:

² AMPEU ghunguno ivechewono pi ani; pa sutsaye imtsulo ani.

³ Israil Lhou no pivae; Israilmi sukushouno ivilo pi: “Akukau achipishi ayeh pechekeu, Alhou sumsa ghi pa zulo ayehpe chekeu,

⁴ Paye tsukinheno khungkusu kukuha inaqhe tsalalo phuphuyi ye aketoike, tsughu tave kethiu tsukinhe no atsaneghu qolo yebide pesu mlapui ithulu aketoike.

⁵ Tihutoi Alhou no ipolo kughuko kumghatsu nani; kughengu pano isasu alhokuthu ghenguno puloshoqhi shivae. Pulokile lukeu tipauye kubomo nani. Ashoqhi tipauye kilivemo nani. Ino mine hechekeuye tipauke; tipauno iwu tokulu shinani, eno Alhou no kuchouno tipaqo shikuputsu nani.

⁶ Ikemu Alhou sumokemi timiqoye asahu ikhipeve ketoi peve nani; khuunomu a-u kumsa ye panongu bumo nani.

⁷ Nonguye ayikumtsu mu angupa mu peitha masa nani; panonguye kumtsu pithive nani.”

David wu Ajekipi Ghushimi

⁸ Hipaqoye David ghushimi ajekipimiqoke: atughiuye Takhemon lono ighikeu, Josheb Bashebet, paye sakiphemi “Kuthu” gholo lakhike; paye pa ngupa pesu timi 800 sasu aghushi eno panoqo kumtsu aghushi qa lakhi lono pithikhavetsu.

⁹ Kuthu gholo akiniu ajekipiuye Dodo nu Eleazar ke, paye Aho lagha lono ighikeuke. Ghulo lakhi David pama no Filistiyamino aghushiqalo hekutsu pesu ngo akelono khuke.

¹⁰ Tile Israilmiye tsughulukhave ikemu pa likhino Filistiyami sasu kichighi aghushi kelono ajihno pau ngo pa zuta kuma mekhaluveno xachho kututa shimlave. AMPEU no tipa tsalani ighono tokulu kije tsuke. Tipaqo kishekulu xathave kethiuno Israilmiye Eleazar no khile ngo akeno tipa alo heqhivekeqo kumo lo aghunanu kuqholuniye ighie.

¹¹ Ajekipi kuthu gholo akuthuuye Age nu Shama paye Harar lono ighikeu. Filistiyamiye Lehi ipikeulo khetsuthililo kumqo ngo ae. Israilmiye Filistiyami launo pokhave,

¹² ikemu Shama ye alulo pa alo puthughono tipau sushokhalu eno Filistiyami tile akeqo ghiqhi pithivetsu. Tipa tsala loghi AMPEU no tokulu kije tsue.

¹³ Gile tusho huthuni kichelau “Shighi” gholo kuthu ye David no ngo akeu alo Adullam tukilo iqi, eno Filistiyamiye Refaim khilalo aghazu shino ngo ae.

¹⁴ Tipa ghulokilo David ye putukha pesu akeu toghilo ngo ae, eno Filistiyami aloji lakhino Bethlehem pukhapesu ngokheluve.

¹⁵ David ye akilo wonishi kutuve eno pi, “Khuwala no ghi Bethlehem khagho phivilo azukikhe lono azu pewo ipiyelu aye kiutoi alonike lae!”

¹⁶ Tileno ajekipi ghushimi pano kuthu huno Filistiyami ghazu shoxusu wupuzu no azukikhe lono azu pewo David tsulu. Ikemu paye tipau yemove no yenike zuqhu peleqhi pesu AMPEU lau akumllagho kiqi shipesu tsulu

¹⁷ no pi, “AMPEU. niye khilemu hipau yemlae! kughengu ino hipau yenikeuye timi hipaqo ji tsuye aketoi niae, panonguye akuxu papu kupumono hitoi sughi tsuke!” Tishi pino paye tipau zu yemove. Ike akumla tipaqo shilukeuye ajekipimi ghushimi pano kuthuno amlo kuloghi kumla shilukeu ke.

¹⁸ Joab thikuzuu Abishai no (pama pazaye Zeruia ke) “Ajekipimi Shighi” shou sakipheuke. Paye pangu pesuno timi 300 sasu kichighi eno panoqo heqhi pithi khave eno “Shighi” shou ajekipiu shiluve.

¹⁹ Paye “Shighi” shou ighono akiqheu jekipiuke eno tishino panongu shou sakiphetou shiluve, ikemu paye “Kuthuqo” jekipi toikeuye kumoe.

²⁰ Kabzil lono ighikeu Jehoiada nu Benaia ghi ghushimi ajekipimi lakhi; pa ghi amlo kuloghi kumla kutomo shilu, tipau gholo Muabmi aghutomi kini pano yivetsuke. Ghuthu lakhilo paye avutsaqi akelono aqo kuchhu khuki lono abongushu lakhi heqhi pithilu.

²¹ Pano Ijipmi khuu ighono subosughino alhokuthu azuta angu pesu pa nanu shiche keno tipau heqhi pithivetsu. Benaia no pa suthalu pesu Ijipmi subosughi sasu kichighi eno pa ulono angupa mxaluvetsuno tipau pesuno pa chheqhi pithive.

²² “Shighi” gholo Benaia ghi lakhi qeno hipaqono pa mlo kuloghi kumla ghilike.

²³ Panongu gholo pa ghi ighono atomi lakhike, ikemu “Kuthuqo” hutoi ajekipi kutuuye kumoe. David no pa pesu pa ghukhemi shou ampi shitsupeke.

^24-39 “Shighi” gholo hipaqo ghi ke: Asahel, Joab thikuzuu Elhanan, Dodo nu Bethelehem lono Shamma eno Elika pamaye Harod lono Helez no Pelet lono ighi Ira ye Ikes nu, Tekoa lono ighi Abiezer ye Anathot lono ighi Mebunnai ye Husha lono ighi Zalmon no Aho lono ighi Maharai no Netofa lono ighi Heleb Baana nuye Netofa lono Itai Ribai nu Benjamin lo Gibea lono Benaia no Pirathon lono ighi Hiddai no Gaas khila phivi lono Abialbon no Araba lono ighi Azmavet no Bahurim lono ighi Eliahba no Shealbon loni ighi Jashen nuliqo Jonathan Shamma Harar lono ighi Ahiam Sharar nu Harar lono Elifelet Ahasbai nu Maaka lono Eliam Ahitofel nu Gilo lono Hezro ye Karmel lono ighi Parai ye Arab lono Igal Nathan nu Zoba lono Bani ye Gad lono Zelek ye Ammun lono Naharai Beeroth lono, Paye Joabw aghunanu kipeu Ira ngo Gareb pamano Jathir lono Uriya Hatimi Hipaqo kumtsu kuqhakelo aghutomi ajekipimi pano shighi tsunike.