SAMUEL AKINIU 22 - BAIBEL (BSI)

David wu Tokulu Le

¹ Kughou AMPEU no Saul ngo pa ghumi kutamiqo launo David susholuve keno, David no ale hipau AMPEU shipilie:

² AMPEU ye isukushou; paye iqoghe kumtou

³ Ilhou no isusholu cheni, pa gholoye niye ichi ighukepu kuha. Pano azuto lakhi toi ishokhalu cheni; pano ishokha cheni eno ixalu cheni. Paye ixakuluuke; pano ashiaghu kishi lono ishokhalu, eno ixaphelu cheni.

⁴ Ino AMPEU ku, pano ighumiqo launo ixalu cheni. AMPEU shelo!

⁵ Akithi zukukuchono ihomxaluve; shikupsa zukukuchono ishou ilu ikughive.

⁶ Akithi kumsapuno ibothaluve, eno akumoki lichheno imeniye piqeluve.

⁷ Iwu shiluksa lono ino AMPEU kue; Ino iLhou lau akukuphu ghenguno kue. Pa chineki lono pano isutsa chilutsu; Ino akukuphu ghenguno ighakeu pano initsue.

⁸ Tishike lono ayeghino msa kelauno pekughuthauve; atsutsu tsukuchoqo huno nanashi ithauve kughengu Alhou no amlo ide kehu!

⁹ Amchhi huno pa nigi lono pho ipeghive, pa kichi lono iqu akeu mi mili eno kuchughei piti akeu ami balu ipeghie.

¹⁰ Pano atsutsu kiyeveno iqighive, pa pukhu qholo zumoikeu khungukusu ae.

¹¹ Pawu kungugha kilu lono miyitsutsu yewue; amlhu pesu pa chishibo shino yewue.

¹² Zumoikeuno pa kuzupuve; shishoikeu khungkusu, azuno chhitoi akeu hipaqono pa suhomxa pesu ae;

¹³ Tsutsupha lono kuchughei akeu mibalu iqu ipeghikeu huno pa zulo ae.

¹⁴ Tishino AMPEU no atsutsu lono tsutsu sue, Akughushu Lhou sutsa chilue.

¹⁵ Pano pa leghuthi kapuwu eno pa ghumiqo apanaghaivetsu; pano tsutsu kukulo pesu panongu hakiphive.

¹⁶ Azughi boqha huno qhaikhave, ayeghi tsukuchoqo kuzupe ngokeu kuhave kughou AMPEU no pa ghumi lomipi eno aloghu lono panongu shou ighapuku keno;

¹⁷ AMPEU no kunguuno chhopiqino imxaluve. azu kuthokuzu lono pano isunhepheluve.

¹⁸ Ighumi kumka kumgho iju kuchhube chekeqo launo ghi pano ixaphelue panonguye ighenguno ighono akumtomi.

¹⁹ Kughou ino avesa akeno panonguno ihae, ikemu AMPEU no isusholuve.

²⁰ Kumsapu lono pano ikuphu tsue; pano iju aloke ghenguno ixaluve tsue.

²¹ AMPEU no asaxu itsue kughengu kiuno achipi keno ino tipau mlake; pano ikumghatsu kughengu niye amikuchomi kehu.

²² Ino AMPEU yezahqo aghokulu shie; niye iLhou launo tsughusu wumoe.

²³ Ino pa yezahqo kumtsu pelucheni; niye pa zahkutsuqo hebide chemoe.

²⁴ Niye akuiqu kuhapi pano ithi ani, kughengu ino akipimi kumlaqo lono tsughusu wuve cheni.

²⁵ Ikehu pano asaxu itsu cheni kughengu kiu achipi keno ino tipau mla cheni, niye amikucho kepi pano ni ithi ani.

²⁶ O AMPEU, noye khunoqono olau aghokulu piyekeno noghi panoqo lau aghokulu piye cheni. Khunono kupukulai keno panoqo lau ighono akivi mlacheni.

²⁷ Noye khunono akimthe shikeno panoqo lau akimthe shicheni, ikemu khunono alhoksa keno tipaqo mithi cheni.

²⁸ Khunono mthsaivu keno nono tipaqo xalu cheni, ikemu khunono qheza chenikeno nono tipaqo sunheqhive cheni.

²⁹ AMPEU, noye ikulu kuvu ke; nono ikuzu yevuqai shivetsu.

³⁰ Ighumi lepenike nono akumto itsuno panongu sukushoqo shou tolu penike akuka itsue.

³¹ Alhou hipau pa kumlaqoye kiutoi kupukulu kya! Pa tsaqoye kiutoi pukhube kulu kya! Khunono pa sukusho phucheni keno panongu kumtsu lau paye azuto lakhi toike.

³² AMPEU likhino Alhou ke; Alhou likhino ningu sukushouke,

³³ Alhou hipauye ikughutshupu kumtouke;

³⁴ Ashe lakhi toi pano ipelo tsaqui nesulupe; pano naghutoqolo isushokeu.

³⁵ Aghushiqalo pano iqophe, tishikeu lono asuzu kumka ghi peithalue.

³⁶ O AMPEU, nono isusholu eno ixalue; okukuphu huno ikughape kije shitsu.

³⁷ Ikughape wuveniye akelono nono isunhelue, ikehu niye khilemu veqhimoe.

³⁸ Ino ighumi hakuqo eno panongu theqhilu; panongu kutsavemoke kutolo niye ngomoe.

³⁹ Ino panongu hedaqhi kehu panonguye idethughi mlae; panonguye igizulo pomlave.

⁴⁰ Aghushi penike nono akumto itsu. eno ighumi shou tokulu shilu.

⁴¹ Nono ighumi pelo ilauno povepe; Khunono ijukuchhube cheni keno ino tipaqo kutsavetsu

⁴² Panonguye akukuphu laju anamu khunomu panongu xalumoe; panonguno AMPEU ku, ikemu panoqo khochilemoe.

⁴³ Ino panongu ayeghi mukhu toi kunudaqhi; alaghilo aniba qokeshi ino panongu nedaqhi.

⁴⁴ Ihekibidemi launo nono ixalutsu eno ashiayehqo shou iyehkipe ghenguno kidekudai shitsu; Ino mthakeu timiqo huno itehiye iqholo kuami shiluva.

⁴⁵ Shoinamino igizulo pishiqoe; kughou panonguno isutsa chilunino, panonguye aghokulu shie.

⁴⁶ Panonguye panongu mlokivi pheveno panonguw aliwoqo lono msa khokhoshi ipeghi khave.

⁴⁷ AMPEU ye xukuau! Isukushou sheqhelo! Alhou kumto kumgha khuuno ixalu keno pa ghili piphe alo!

⁴⁸ Ighumiqo shou pano tokulu itsu; iqholo akeqo shiyeh pano ghasutsue

⁴⁹ eno ighumiqo launo ixapheluve. O AMPEU, nono ighumi shou tokulu itsuke eno xesuxenimi launo ishokhaluve.

⁵⁰ Tighenguno ashiayeh gholono ino oshe ani; ino oshekeu lephe ani.

⁵¹ Alhou no tokulu kije pesu pa kukau tsuke; pano kishephelukeu lau tamo mithe pa kikimiye piyeke, David lau eno pa polo kughukoqo lau alhokuthu kikimiye piyeke.