SAMUEL AKINIU 20 - BAIBEL (BSI)

Sheba no Hebide

¹ Tishi ake lono ighono aghili suqe avehu kuha mithe kemi Gilgal lono ighikeu Bikri nu Sheba, Benjamin lagha lono iko ighikeuno tipa alo aghi. Pano afukolo ighasuno pi, “David ikhi qhivelo! Ninguye pa papemoe! Israilmiqo, ningu akilo woveni kholo!”

² Tileno Israilmiye David qhiveno Sheba lau su eno pa papesu Jordan lono Jerusalem kutolo ighilu.

³ David no Jerusalem pa kilo ide ighi eno akukauno pa nipu chighi aki jukuto peniye puakeqo salu eno akheu pesu panongu khepe. Pano panoqono avehupu shi akeu kumtsu tsu, ikemu panongu sasuye azua lakhi shimoe. Panonguye akuxu tivilo chimemi hutoi panongu likhi tishi acheuvepe.

⁴ Akukauno Amasa vilo pi, “Juda lo timi kumtsu hekutsuno aghiniuye panongu sasu hilau ighilo, “ ipi.

⁵ Amasa no panoqo kuniye wuve, ikemu paye akukauno pa vilo ide ighilo ipikeu tsalaniloye ighimove.

⁶ Tighenguno akukauno Abishai vilo pi, “Absalom nguno alau akukupunaye Sheba no ningu tsuni chenie. Tighenguno iwu timiqo kuno pa hawulo, tishimlave aye pano putukha puakeu aphughi pukhalu veno ningu launo pokave nani.”

⁷ Ikehu Joab wu timiqo ngo akukau khemiqo eno ghushimi kutami kumtsu Abishai gholono Jerusalem qhiveno Sheba hasu chekhave.

⁸ Kughou panonguno chesuwo Gibeon lo atuqu kije akeu a tolukeno tipa alono Amasa no panongu sasu kusholu. Joab ye ghushimi nanu pepua eno pa zutakihiye abohulo suno pa chitalo xipusu ngoa eno pano azuu pukasu wuniye shikelono pa zutakihiye ijo iqighive.

⁹ Joab no Amasa vilo pi, “Ishou, noye kiu toi anikya?” ipighi pau ajeuno pa mukhu mhilo pugholuno pa muma niye shie.

¹⁰ Amasa ye Joab no pa-u halau azuta kihi tsuqu pesu ngo akeu kumu mthano kutokupui shimove, ikehu Joab no pa polo azutakihi pesu qhusuve tsukelono kighinoli khalacheu ijo ipeghive, akiniu pa kutu kithe mphi lono Amasa ye thive. Tishiveno Joab ngo pa thikuzuu Abishai pamaye Sheba hasusu huve.

¹¹ Joab wu timi lakhino Amasa kumo vapesu ngono igha pi. “Khunoqono Joab eno David laumi shi ani keno Joab papelo!”

¹² Amasa sukumoye ajino aphi kuchopu nhakha pe tishi alaghi mtalo qhipe pua. Joab wu timi kumtsuno tipau ithuluno tipa alo vekhape ngove kehu timi tipauno asukumo sunhepesu alaphelo vesuve tsuno aphi lakhi pe tipau khonha pesu qhivetsu.

¹³ Asukumo tipau alaghi lono ikhipeve tsuke thiuye kumtsuno Sheba hakuqo nike ghenguno Joab papesu wue.

¹⁴ Sheba ye Israil laghaqo lughi hechesu Abel Bet Maaka phughilo ighilu eno Bikri lagha kumtsu hekutsuno pa papesu aphughi kutolo ighi.

¹⁵ Joab wu timiqono Sheba ye tile akeu ithuluveno panonguno aphughi tipau khasuluveniye homxa pesu ngoluve. Panonguno khalacheu kuptu ihjeghi ayeghi pesu shonhaghi shithuve eno akuptu tipa qhouno chhuthaniye ayeghi chhuthuve tishikeu lono akuptu ilaqighive peniye shike.

¹⁶ Tishi akelono alokutsu topumi lakhi aphughi tipaulo akeuno akuptu lono ighamuku pi, “Inijulo! Inijulo! Joab vilo hilau ighilo pilo; niye pa sasu kuptsa nishi ani pilo.”

¹⁷ Joab no kuchono tilau wu, ike lino iniju, “Noye Joab ke shea?” Pano khochile, “Iyei, tihu nike,” Lino pi, “Akijeu isutsa inijutsulo,” Pano khochile, “Niye inijutsu ani,”

¹⁸ Lino pi, “Ado kushuwo shiva panonguno hitoi picheghikeu, ‘Wulo, eno nongu kukupuna Abel phughi lono xathalulo’—eno tipau kiqi lono panonguye tishi shike.

¹⁹ Ningu phughi hipauye ighono kije lakhi. Israil ghakhulo alokughunoshi iqu ighai eno aghokulu qholo achekeuke. Tighenguno nonguye kushiye hipau shipsave tsuniye anikya? Nonguye AMPEU wu kiukeno tighi shipsa hexavetsuniye anikya?”

²⁰ Joab no khochile, “Khilemu kumoe. Niye khilemu nophughi hipau puhavetsu momu shipsave tsuniye shi amoe!

²¹ Tiye ni kukumsu lo kuhae. Timi lakhi paje Bikri nu Sheba paye Efraim ghakhu to lono ighikeu huno Akukau David hebide mujochile ani. Ike timi tipau likhi niulo phesuvetsulo tishi aye nophughi lono idechile wove nani.” Lino pi, “Ninguno pa kutsu akuptu veche vepipeve tsunie,”

²² Tishino liye aphughilo timiqo lau wuno li kupughu pesu pithi eno panonguno Sheba kutsu michetha pesu akuptu veche Joab lau vepipevetsu. Tileno pano afuko ighasuno pawu timiqo vilo aphughi qhivelo pikeu michipu shitsu, tishino panonguye akilo idewove. Ipuzu Joab ye Jerusalem lo akukau lau idewove.

David wu Kijemi

²³ Joab no Israil lo ghushimi kumtsu shou zahtsuu shilu; Jehoida nu Benaia no David ghukhemi shou ampi shilu;

²⁴ Adoniram no akumla kishimi shou ampi shilu; Jehoshafat, Ahilud nu no thwokha yekukutsu kithikeu ampi shilu;

²⁵ Sheva no riyam lo akijeu shilu; Zadok ngo Abiathar pamano achineu shilu,

²⁶ Jair taun lono ighikeu Ira no David wu achine kishiu shilu.