SAMUEL AKINIU 18 - BAIBEL (BSI)

Absalom ye Tomlave eno Thive

¹ Akukau David no pawu timiqo hekutsu kumqo, tipaqo qhethonhe lakhi khi eno aqhe-aqheno kije pesu panongu shou kijemi lakhikhi pelono ahzakutsuu shipenikeu shi pichetsu.

² Tishino pano tipaqo aloji kuthu shino Joab ngo pa thikuzuu Abishai eno Gat lono ighikeu Ittai pano kuthu pelono amqo lakhikhi shou ahzakutsuu shino khalacheu puwu. Akukauno pawu timiqo vilo pi, “Ni ampino nongu sasu wunie.”

³ Panonguno khochile, “Noye nigholo wukepu kumoe. Ninguno povekepu shina momu ningu gholo tuxaye pithivekepu shinamu aghumi ghenguye tipau kumu kiyequkeu shimo nani; ikemu noye ningu gholo 10,000 me nguno amekushoue. Tighenguno noye hilehi aphughilo ngono akukuphu likhi nitsu puwu akeu pavi nani.”

⁴ Akukauno khochile,”Tishiaye nonguno kiuno akiviu ipi kumsu anikeno ino tipau shitsuni.” Tishino pano khagho phivilo puthugho ngotsuno pawu timino qhethonhe loji, aqhe loji jino ajo ajo shi pa hechesu khalacheu cheipe.

⁵ Pano ahza shipe Joab, Abishai eno Ittai pano kuthu tsu: “Kishimoake ije lono Absalom ghime tsukevilo.” Hipau zahkutsu David no pawu kijemi vilo pithi akeu ghushimi kumtsuno chilukhave.

⁶ David wu ghushimino aghakhu hechesu Efraim ghasu lono Israilmi sasu aghu shithuve.

⁷ Israilmi shou Davidw timino theqhiluve; hiye kumsapu theqhikulu lakhi shive, kughengu tipa tsalalo likhino timi 20,000 kutolo pithivetsu.

⁸ Aghakhuqha kumtsulo aghukishi qhawove eno aghushiqa lono thikeuye aghasu lono timi thivekeqo pachiuve.

⁹ Paikhavi lono Absalom ye David wu timi khami sasu kusholuve. Absalom ye khurshi lakhi shouno poche, eno posusu aphisubo lakhi sukho suzai akeu qholo poilolu, tileno asuloka lono Absalom kutsu hepiyeluve. Khurshiye pove ipuzu Absalom ye kunguu thuthu iju fupesu ngove.

¹⁰ Tishi akelono David wu timi lakhino pa ithuluno Joab vilo pithi, “Akijeu, Absalom ye aphisubolo pufuqhi pesu ngo akeu ino ithulue!”

¹¹ Joab no khochile, “Nono pa ithulu aye noye kushiye a-a lono pa heqhi pithive mokya? Tishi aye ino i-u ghulono tsandiyi muno chighi eno apokha ishi otsunicheke.”

¹² Ikemu timi huno khochile, “Tsala nono tsandiyi muno 1,000 papu itsukepu shimu, niye iuloti chhoqhi akukau nu shou bemo nani. Ningu kumtsuno akukauno no ngo Abishai eno Ittai nokuthu vilo, ‘Ije lono anu Absalom ghime tsukevilo,’ ipi ahza tsu akeu chilue.

¹³ Ikemu tsala ino akukau gholumono Absalom heqhive aye, akukauno tipau chilukelo—paye thwokha kumtsu chilu anikeke—tilehi noye ighenguno puthugho tsuni chemoe.”

¹⁴ Joab no pi, “Niye ado peve ghi hishi ogholo ngo amlae,” Tishi piveno pano angupa kuthu ikhiluno Absalom mlalo chhepukuvetsu, paye aphisubolo kunguu pufu pesu thiumlano xuaphi lono tishivetsu.

¹⁵ Ipuzu Joab wu aghunanu kupumi apumi pano chighino Absalom suholuveno pa chuxuqhi pithive.

¹⁶ Tishive kethiu aghukishi tavepenike ghenguno Joab no afuko igha, tileno pawu ghushimiye Israilmi hachekeu lono ide chile ighive.

¹⁷ Panonguno Absalom sukumo pesu aghasulo aqoh thonhei keulo vesuveno atu kutomo kichepewo tipau veqape qhive. Israilmiye kumtsu pututa sheamzulo pututa ki phususu pokhave.

¹⁸ Absalom ye pano xuaphi lono pa je lono kumsumamo kepu Akukau Khila ipikeulo athigho ghope qhive, kughengu paye anu kuha kehu pa je kumsulu chepeniyeke. Ikehu tipau a je ghi pa je kuvetsu eno ishikutolo tipau a pesuno Absalom Thigho ipi ku cheni.

Absalom Thivekeu David vilo Pi

¹⁹ Tileno Zadok nu Ahimaaz no Joab vilo pi, “Ino wupuzu AMPEU no pa ghumi ulono pa xapheluve keu sutsa kivi pesu akukau vilo piwunie.”

²⁰ Joab no pi, “Moe ishiye noye asutsa kivi pesu piwu kevilo. Nono wunishi aghiaye ghulo kutauno wuno pilo, ikemu ishiye wukevilo, kughengu akukau nu huye pithivae.”

²¹ Tishino pano pa qeu Sudanmi vilo pi, “Wuno akukau vilo nono kiu ithulu keno tipau ghili pesu pilo.” Aqeu huno itsaqi tsuno pinike pove.

²² Ahimaaz no tsumomoi, “Kiu shive kela niye kumu alomsumoe; kimiyeno ipeloghi asutsa pewupelo,” ipi Joab no iniju, “Noye kushiye tishi nishi anikya, inu? Tipau ghenguno noye kiu saxu mu ithuluni chemoe.”

²³ Ahimaaz no tamono pi, “Kiu kiu papu shive aghinamu niye wunishi anie.” Joab no pive, “Tishi aye wulo.” Ikehu Ahimaaz ye posusu Jordan khila laghilo vetha ipeghiluno aqeu Sudanmi zuthasu pove.

²⁴ David ye aphughi khagho alou ngo khalacheu kuma dolo a-a akeulo iqa ngo aghi. Aghukhu akeuno akupuwu tupikiye tsuqolo khagho laghi kudau puthughono jupuwo kelauye timi lakhi posusu chekeu pishipuwo ithulu.

²⁵ Pano pishipiqi akukau kutughuno pithi, tileno akukauno pi, “Tsalatsa pa likhi cheghi aye, paye sutsa kivi pesu cheghi nani.” Pochekeu huno posu aphivilo kupunu ighiluve.

²⁶ Tishino itaghi aghukheuno kutami lakhi ghi pa likhi pochekeu ithulu, ike tileno pano khagho khaqhi kicheu pishipiqi kuno pi, “Julo! itaghi kutami lakhi ghi pochenie.” Akukauno khochile, “Pa ghi asutsa kivi pesu cheghi nani.”

²⁷ Aghukheuno pi, “Atughushi pochekeuye Ahimaaz toi ithulu ani.” Akukauno pi, “Paye timi kivimi lakhie, eno paye asutsa kivi pesu cheghi nani,”

²⁸ Ahimaaz no akukau sukumsa tsughi igha eno pa zulo ayeghilo ikiqi ihozuveno pi, “AMPEU oLhou akishe tsulo, kughengu pano timi khunoqo akukau akijeu hebide akeno tipaqo shou tokulu otsuvae!”

²⁹ Akukauno iniju “Anu Absalom ye akivishi anikema?” Ahimaaz no khochile pi, “Akijeu, kughou owu kijemi Joab no ihapuwu ake ghulokilo ighono mbumughu akeu ino ithulue, ikemu tiye kushiye tishi akela niye pimlae.”

³⁰ Akukauno pa vilo pi, “Tilau puthugho ngo aghilo” ikehu pa ghi tilau wuno puthugho ngoluve.

³¹ Tipashelo Sudanmi aqeu hu ighive eno pano akukau vilo pi, “Akijeu, niye oghenguno asutsa kivi sughi ani! Ishino AMPEU no ohebide chekemiqo kumtsu shou tokulu otsuvae!”

³² Akukauno iniju, “Anu Absalom ye akivishi anikema?” Aqeu huno khochile, “Pa lau kiu shive keno tipaphi shi oghumiqo eno osasu kumjo akemiqo kumtsu lau tishi shive tsupenike niye kumsu ani, akijeu.”

³³ Tileno akukau ye ighono amlo save. Ikehu paye khagho laghi kudau kungu-u chebo lo ikuno qa auve. Paye ala chesu qaghi pi, “O inu! Absalom! Absalom, inu! Ino ozuqhushi thiveni keghi lae! Absalom, inu-o!”