SAMUEL AKINIU 17 - BAIBEL (BSI)

Hushai no Absalom Sabide

¹ Kushuwo kumolo Ahitofel no Absalom vilo pi, “Ipelo timi 12,000 kishelu pelo ino itijino David hathuveni.

² Pano akulho shive eno aghuthi supesu ngo akelono ino pa le nani. Paye msave nani eno pawu timi kumtsu no pokhave nani. Ino akukau likhi heqhive tsu nani

³ eno pawu timi kumtsu kulaliuno kulapuu kilo ighike hutoi panongu kuchopu olau sachile saghive tsu nani. Nono timi lakhi khuu phucheni keno tipau likhi heqhilu nani eno kutamiqoye olau kulakishi shiluve nani.”

⁴ Akukutsu hipauye Absalom ngo Israilmi kumtsu ghenguno akivie pi kumsulukhave.

⁵ Absalom no pi, “Tishiaye itehi Hushai kulo eno pano kiu pinikela ninguno ti inijunie.”

⁶ Kughou Hushai no ighikeno Absalom no pa vilo pi, “Akukutsu hipauye Ahitofel no ningu tsu ani; ike ninguye tipau pape kepu keo mokya? Tsala papekepu kumoaye kiu shikepu keno nono ni vilo pitsulo.”

⁷ Hushai no khochile, “Ahitofel no ishiulo akukutsu nongu tsuakeuye akivipu kumoe.

⁸ Opu David ngo pawu timiqoye ighono aghukivimi likhi eno panonguye avaquno ati puhavekelo axuide aketoi ighono muqhumzai nani. Opuye aghushilo alayemi lakhi ikehu paye putholo pawu timiqo gholo ngo chemoe.

⁹ Itehimu kumsujukelo paye mkakukilo momu a-a kutau khilehiela itshu aghi nani. David no owu timi lethukeu sutsa khu khumu chilu kemtsa lono owu timiqoye tomlavae pikeu chilu nani.

¹⁰ Ipuzu abongushu toi msachemokeu ighono amlo kivimi ghi msaukhave nani kughengu Israil lo timi kumtsuno opuye aghukivimi ghushimi kije lakhi eno pawu timi ye kumtsuno aghushilo ighono shitsami likhi akeu ithi akhanie.

¹¹ Tighenguno ino ovilo akukutsu tsunikeuye hike—aghakhu ashekha halauno ashekha halau kutolo azughi mukulo asaye hutoi Israilmi kumtsu hekutsuno, no ampino sasu aghulawumasae.

¹² Tishiaye David no khile khile aghipinamu pano mtha aphi lono pa leluve masae. Tishi anguno pa pina pawu timiqo pinamu kumu xukulupu shimove nani.

¹³ Pano aphughi lakhilo idewove aghi aye ningu wu timino akighi kipili suwono aphughi tipau sulaqhi pesu akhila chhiliu piqivetsu nani. Ato tsuqa tipaulo atu tachumu ghutsumove nani.”

¹⁴ Absalom eno Israilmi kumtsuno pi, “Hushai kukutsuye Ahitofel kukutsu nguno akiviue.” AMPEU no Ahitofel kukutsu kivi ikhilu pemo nikeu shitsu. Absalom lau shikupsa ikughi penikeu shivetsu.

David no Pove

¹⁵ Tishino Hushai no achinemi Zadok ngo Abiathar pama vilo pano kiu kukutsu pesu Absalom ngo Israilmi vilo pikeu eno Ahitofel no kutsukeu tsa hi kumtsu pesu lhevetsu.

¹⁶ Hushai no highi sukuqha pi, “Mtazu itehi asutsa lakhi David lau piwulo eno pa vilo aghasaqha lo aghoki ghusa lo zukevilo pilo, ikemu mtazu Jordan hechesu povelo pilo, tishianguno pa ghi pawu timi ghi khuumu kughaluno heqhi pemonike.”

¹⁷ Abiathar nu Jonathan ngo Zadok nu Ahimaaz pamaye Jerusalem kupunulo Enrogel zupukilo ngokhe ae, kughengu pamaye aphughilo ilokeu ithulu pemo niyeke. Ike aqelimi lakhino alhokuthu pama lau ighino kiu shive anikeno tipaqo lhepesu piche eno tileno pamano wuno Akukau David lau pithicheke.

¹⁸ Ikemu ghulo lakhiye itimi lakhino pama ithuluve eno itimi huno pama ghili Absalom vilo pivetsu; tileno pamaye mighi susu Bahurim lo timi lakhi kilo poilo itshu wuve. Paye paki phivilo azukikhe lakhi ache, ikehu pama ye tipaulo poilove.

¹⁹ Timi nipu huno azukikhe kichi nhachekeu no khonhapesu qhive, eno tipau shou athi phuve, tishikeu lono kutami khuunomu tipau ithulu pemoniye tishi nhape qhiveke.

²⁰ Absalom wu kijemiqono aki tipaulo ighino atopuu vilo ishi iniju, “Ahimaaz ngo Jonathan pama hile poilo kehu khilau wuve akya?” Lino khochile, “Pamaye aghokikathasu chevae,” Timiqono pama phuju akemu ithumlaveno panonguye Jerusalem lo idewove.

²¹ Panonguno cheve kethiuno Ahimaaz ngo Jonathan pamaye azukikhe lono ipeghilu no Akukau David vilo tipau ghili pithive. Pamano Ahitofel no pa mithivekeu kukughu kiushipesu akeno pa vilo ishi pithi, “Mtazu mighilo eno aghoki kathavelo.”

²² Tighenguno David ngo pawu timiqoye itheno Jordan hechesu chekhave eno atsala vu ipeghike ghulokiloye panongu kumtsu Jordan hechesu kushuwolo chekhave.

²³ Kughou Ahitofel ye pano pikeu tsa initsumovekeu ithivekeno, paye pawu gadaha lakhilo ikuno pano phughilo pa kilo idewove. Pa kilo thime kutokughoi kithikiyi shiveno pa likhi pa tshuqhi pithive. Pa kumoye pano bolomi qhocheke alo shiqhove.

²⁴ Absalom ngo Israilmino Jordan kathalu ke ghulokiuye David ye ighino Mahanaim taun toluve.

²⁵ (Absalom no Joab zuqhulo Amasa pelo ghushimi shou zahtsuu shipenikeu shive. Amasa ye Ishmael lagha lono ighikeu Jether nuke; paza jeye Abigail ke, liye Nahas nongake eno Joab paza Zeriua tsunipuke.)

²⁶ Absalom ngo pawu timiye ighino Gilead yeghilo aghazu shipe ngolu.

²⁷ Kughou David no Mahanaim lo ighilukeno, Amun yeghilo Rabba phughi lono ighikemi Nahas nu Shobi ngo Lodebar lono ighikeu Ammiel nu Makhir ngo Gilead yeghilo Rogelim lono ighikeu Barzillai pano kuthuno David sasu kusholu.

^28-29 Panonguno ayibo, ayeghili eno azua phi ngo achuqupu ishi David ngo pawu timi ghenguno sughitsu: tiye ashothi, ashopa kusavekeu thi, khetsuthi, axalothi, akhingozu, athachi, athazu, eno bherishi ghi pesu ighi. Panonguno David ngo pawu timiqo muzutughu eno aghasaqhalo ighono akulhoshi itsuchekeu ithive.