SAMUEL AKINIU 16 - BAIBEL (BSI)

David ngo Ziba

¹ Kughou David no ato mqa kitila hechesu wu chekelo paye Mefiboshet qeu Ziba no gadaha kini lono ashopa 200 atsayithi kipki amqo 100 eno anile xathi amqo 100 eno ashiyiko lono aji chhitoi pilisu puveno pa sasu kushoniye cheghikeu sholu.

² Akukau David no pa vilo iniju, “Noye kushiniye tipaqo pu cheni kya?” Ziba no khochile, “Gadahaqoye no akijeu kibolomi pelo ikupeniyeke, ashopa ngo axathiqoye timiqo pelo chupeniyeke eno ajino kughou panonguno aghalo itsuchekelo akulho shive nikeno shopeniye xapusu ighi anike.”

³ Akukauno pa iniju, “Ompiu Saul tili nu Mefiboshet ye khilehi anikya?” Ziba no khochile pi, “Paye Jerusalem lo anie kughengu Israilmino pa su Saul kukaphu pa tsunikeu shi thebei pano ithi ani.”

⁴ Akukau no Ziba vilo pi, “Mefiboshet no kiu pighi anikeno ti kumtsu owue.” Ziba no khochile pi, “Niye oqeu ke Akukau akijeu, ipelo ogizulo achipiu shilupelo!”

David ngo Shimei

⁵ Kughou Akukau David no Bahurim lo ighikeno Saul bolomi lakhi Gera nu Shimei no khalacheu ipeghino pa sasu kusholu, pa ghushoqhi ghi tile ighi.

⁶ Shimei no atu pesu David ngo pawu kijemi vehathuve, David ye pawu timiqo eno pa ghukhemino pa suhu pesu chemu tishie.

⁷ Shimei no pa ghushoqhi ghi pi, “Chevelo! Chevelo! Ghikiqhiu! Akumla lhoksa kishiu!

⁸ Nono Saul kukaphu ikhiluve tsu eno itehiye AMPEU no nono Saul kibolomi kutomo heqhi pithive tsuke ghenguno oghimeqhi ani. AMPEU no akukaphu pesu onu Absalom tsuvae eno noye ikiqivae, noye ghikiqhiu!”

⁹ Abishai khuu paza je Zeruia keno pano akukau vilo pi, “Akukau akijeu, kushiye hi atsu pelono oghushoqhi anipe kya? Ipelo wuno pa kutsu michethave tsupelo!”

¹⁰ Akukauno Abishai eno pa thikuzuu Joab pama vilo pive. “Tiye kiumu okumlapu kuhae. Tsalatsa pano ighusho qhi keu huye AMPEU no pa vilo pino ghushoqhi aghiaye khuunomu noye kushiye tishi kyapi pa vilo iniju akepu kuhae?”

¹¹ David no Abishai ngo pa qholo kijemi kumtsu vilo pi, “Inu kuchou thotsu iheqhiveniye pukaputsa ani; tishi aye noye kushiye ti Benjamin lagha shou akumza anikya? AMPEU no ghusho penike pa vilo pivae; tighenguno pa kishishi apelo eno papelo tishi apelo.

¹² Kumsujukelo AMPEU no ighime ithitsu nani eno pano ghusho keu thelilo kukumgha itsu nani mthae.”

¹³ Tighenguno David ngo pawu timiqoye ala chethuve. Shimei no panongu hasusu naghuto kudau ighi; paye panongu ghusho ghi atu ngo asaye epesu panoqo lau vepuwu.

¹⁴ Akukau ngo pawu timiqo ye Jordan tokelo ighono akulho shikhave ikehu panonguye tile akulho qhi ngolu.

Absalom no Jerusalem loa

¹⁵ Absalom ngo Israilmi pa gholo akeqo kumtsu Jerusalem lo iloghilu eno Ahitofel ghi panongu gholo ighilu.

¹⁶ Kughou David shou kuchou Hushai no Absalom kusholukeno pano ighamuku, “Akukau axupushu peniu, akukau axupushu peniu!” ipi.

¹⁷ Absalom no pa iniju “Nono gihu ikhilu chekeu oshou David ye kiu shive akeya?” “Noye kushiye pa gholo wumove kya?”

¹⁸ Hushai no khochile, “Niye kishino tishini kya? niye AMPEU no kishephe lukeu, timi hipaqo eno Israilmi kumtsu ghenguno kethono. Tighenguno niye ogholo anani.

¹⁹ Niye impiu nu qemono kutami khuu huthu qeni kya? Ino kiutoi opu qechekeno titoi itehiye niye oqeuvenie.”

²⁰ Tileno Absalom no ide ighino Ahitofel vilo pi, “Tishiaye ninguye hilehi ngoniae, ike noye kiu kukutsu pesu ningu tsuni kya?”

²¹ Ahitofel no khochile, “wulo eno opu nipu amishiuqo khunoqo pano akukaki khe aghipeniye qhipuani keno tipaqo sazuvetsulo. Tishive kethiu ye Israil lo kumtsuno opuye okugha pesu pa ghumi kuchou shivae pi ithi nani eno opapemiqoye alau amlo muto kithelu nani.”

²² Tighenguno panongu no aphiki lakhi akukaki kutsuqalo Absalom ghenguno kutope qhitsu eno kumtsu nhekithe lono Absalom no aki tipau alou ilono papu nipu amshiuqo sazu vetsu.

²³ Tipa ghulokilo Ahitofel no kiukiu kukutsu tsa pikeno tiye Alhou tsa kiqi shi ikhiluche: David ghi Absalom ghi ishi tipau pape cheke.