SAMUEL AKINIU 13 - BAIBEL (BSI)

Amnon ngo Tamar

¹ David nu Absalom ye pa chepu kulaumokeu ajukivi lakhi Tamar ipikeu ache. David nu lakhiu Amnon ipikeuno li kimiyekeu ache.

² Paye ighono li kimiye kutu keu lono suuve, ikemu pa ghenguno li lunikeu kushokutsu; kughengu liye ili tathe kehu timi sasu kushopemoniye li kutashi puache.

³ Ikemu Amnon ye pa shou lakhi ache paje Jonadab, paye ighono aghili lhoksa kughami lakhike.

⁴ Jonadab no Amnon vilo pi, “Noye akukau nu ikemu ino tsalakipetsulo oju ithulu kelo ighono amlo saqhiyi ithulu acheni. Kiu shive kya?” Pano khochile, “Niye ithikuzuu Absalom chepu Tamar sasu kuzuvu keu ani,”

⁵ Jonadab no pa vilo pi, “Tishiaye noye su aniepi azualo zuvelo. Ipuzu kughou opuno oputsa ighini keno tileno pa vilo ishi pilo, ‘Kimiye puzu ichepu Tamar pelo ighino ilojitsupelo. Niye li pelo ino pa ithukulupu alo ngono chuqu kusho mlatsu penishi ani eno hileno li pelono ilojitsu penishi anie.’ ”

⁶ Kuchouno Amnon no muqumghashi su aniepi azualo zuniye wuve. Akukau David no pa juniye ighi eno Amnon no pa vilo pi, “Tamar pelono hilau ighino ino li ithukulupu alo ngono asho kitila mlapesu li ampino sughino itsupelo.”

⁷ Tighenguno David no akuka kilo Tamar lau tipau sutsa pithi puwuve: “Amnon kilo wuno achuqu shipesu pa tsulo.”

⁸ Lino tilau ighikelo kuchono paye azualo ngo aghi. Lino asho kukubo hami ikhilu puzu khile pano li ithukulupu shi akeno tipa alo ngono asho mlathuve. Tishi puzu lino asho pughavekeqo

⁹ ayili lono ikhiphe suwo pa pelo chupenike sughi tsu, ikemu paye chutsumove. Amnon no pi, “Timi kumtsu puwovelo” ikehu tile ngo akemi kumtsu chekhave.

¹⁰ Tileno pano li vilo pi, “Asho pesu hilau izualo sughilo eno ouno ilojilo.” Lino asho ikhilu eno pesu pa lau ighi.

¹¹ Lino tipaqo pesu pa loji kemtsa pano li sunheluveno pi, “Isasu kumtsa azualo zulo!”

¹² Lino pi, “Moe! Khilemu aje kusapu kumla shinikeu ilau anguka shikevilo! Tiye ighono akumsapue! Niye kishino akiniu aqha zulo igi pephe piyeni kya? Ipuzu nono Israil yeghilo noye atichepu kije avenanie.

¹³ Kimiye puzu, Akukau putsalo ino ithi anike paye ikughapesu otsu nani.”

¹⁴ Ikemu pano lino pikeu tsa initsumoe; eno paye li nguno akumtou keke pano li sunheluveno li shipsave.

¹⁵ Tithiu Amnon ye li ju kuchhube keuno pa mlolo chhitoi iloghive puzu pano li kimiyekeu nguno alaushi li jukuchhube keuno ihulove. Pano li vilo pi, “Khalacheu ipevelo!”

¹⁶ Lino khochile, “Moe, tikithipu shi ipuwuveni keuye nono ilau kiu mlave akeno tipau nguno tiuno angusu akijeu!” Ikemu Amnon no li tsa initsumoe.

¹⁷ Pano pa qeu ku puzu pi “Totimi hipau sunhephe pesu inhekithe lo puakevino sawuvelo! Li sunhephevelo eno ahukikha khavelo!”

¹⁸ Aqeuno li sunhepheve eno aki khavetsu. Tamar ye aphikuzu chijeboboi keu eno au kukuzu kushuwa uae, tiye khaghi ghulokilo kulaumokemi kukalimino uchekeu phike.

¹⁹ Lino ayevu pesu li kutsulo epuku, li phikuzu suxuve eno auno li gi nhaluveno qasu wuve.

²⁰ Kughou li peu Absalom no li ithulu keno pano iniju, “Amnon ye oshikukujo keshea? Achepukishiu, kimiyeno highenguno ighono omlo ime kutu kevilo. Pa ghi opeu lakhike ghenguno khuu pelo nomu tipau ghili ithi pekevilo,” Ikehu Tamar ye Absalom kilo amlo imeghi li likhi ache.

²¹ Kughou akukau David no hipau ghili chilukeno paye ighono agha ideve.

²² Ipuzu Absalom ghi Amnon ju ighono kuchhubethuve kughengu pano pa chepu Tamar shipsavetsu kethiuye atsa mu pa putsamove.

Absalom no Amkhulu

²³ Ampe kini wove kethiu Absalom no Efraim taun phivilo Baal Hazor lono pawu bheriqo mhi tsanike ghenguno akukau David nuli kumtsu tipau alo ku-kutsue.

²⁴ Pano akukau David lau wuno pi, “Akijeu, niye iwu bheriqo mhi tsanike kuto ani. Ike no eno oqholo kijemi ighino hipau pinyelo jusutsunima?”

²⁵ Akukauno khochile pi, “Moe, inu ningu kumtsu ghano tile ighinikeloye oghenguno ighono amakho kije shini ae.” Ikemu qeti Absalom no tamono piauve, tishimu akukau ghi pulotsumo ipuzu pano Absalom vilo tipaa lono chevelo pive.

²⁶ Ikemu Absalom no pi, “Tishimaye kutamiye ighimla namu ithikuzuu Amnon likhimu ighilu penima?” Akukauno iniju, “Kushiye pa likhi ku anikya?”

²⁷ Ikemu Absalom no tsumomo David vilo Amnon ngo anuliqo kutami kumtsu Absalom gholo ighi penikeu piauve kehu pulovetsu. Tileno Absalom no aghulhu kije lakhi Akukau tsukepu qhemi kiqi lono kuto,

²⁸ eno pano pa qemi vilo hitoi mijepua: “Amnon no ighono shomzu akeu jukuto pualo eno ino kughono ahza tsuni keno tileno pa ghiqhivelo. Khilemu msakevilo. Amlo kuloghi shilo kumu avehu izu akevilo!”

²⁹ Aqemiqono Absalom no mije pua tsukeu kiqi lono Amnon heqhi pithive. Tileno David nuli kutamiqoye khurshi lo ikupuzu pokhave.

³⁰ Panonguno akilo idewochekelo, David vilo ishipi: “Absalom no onuli kumtsu heqhi pithikhavae, panongu khumu ghumono pithivae!”

³¹ Tileno akukauye puthughove, pa phikuzu suxuve amlo ghime launo pishiqho pesu ayeghilo ikiqive. Aqemi khunoqo tilehi ngo akeno panongu phikuzu suxuve.

³² Ikemu Jonadab khuu David thikuzuu Shammia nu keno pano pi, “Akijeu, panonguye onuli kumtsu pithikha mphie. Amnon likhi thivae. Nono Absalom jukelonomu ithi anike paye hishi mlanikeu pa mlo lo ake, Amnon no pa chepu Tamar sazuve tsukeu lonoke.

³³ Tighenguno onuli kumtsu thikhavae pikeu sutsa ye pulukevilo; Amnon likhi pithivae.”

³⁴ Tishivekethiu Absalom ye pove. Tileno ghushimi aghukhe pe akeuno Horonaim kudauno aqo kithikhi kumzapushi ato lono alaghi kudau iqi chekeu pishipuwo ithulu. Pano wupuzu pano kiu ithulu keno tipau ghili pesu akukau vilo pi.

³⁵ Jonadab no David vilo pi, “Hupaqoye ino ovilo tishi nani pi puakeu toi onuliqono checheni.”

³⁶ Pano tipau pita kemtsa lono David nuliqo ighilu; Panonguno qathuve eno David ngo pa qholo kijemi ghi ighono amlo ita qathu.

^37-38 Absalom ye pove eno Geshur lo akukau Talmai khuu Ammihud nu keno pa lau wuve eno pa gholo ampe kuthu kutolo ngove. David ye panu Amnon ghenguno ado kushuwodolo amlo imeche;

³⁹ Ikemu Amnon kithi sutsa chilu kemtsa, itaghi panu Absalom ghenguno pa mlo ihjuthuve.