RUTH 4 - BAIBEL (BSI)

Boaz no Rut sasu Kulauve

¹ Boaz no aphughi liwolo timi kumqo kuhochekeu a-lo wu eno tile iqa ae. Tipa mtsa Elimelek no bolomi Boaz no Rut vilo pi akeu hu kucho ti vechesu wucheghi. Boaz no pa ku puzu pi, “Hilau tsughu ighino iqalo.” Ike pano ighino iqa.

² Tile Boaz no muchomi chighi kusaghi puzu pi, “Hile iqalo!” Ike panonguno iqa.

³ Pano Elimelek no bolou vilo pi, “Muab ghakhu lono ideighikeu Naomi ye ningu thikuzuu Elimelek lu je anie,

⁴ ike ino ovilo ti qhuluvelo pi anikewa! Nono qhunie piaye timi hipaqo zulono qhulu velo. Ti nono luni aye ta ikemu nono qhulu mokepu aye ivilo pi peniyeke. Kughengu valu kuzupu atughiu ye nono ke, eno oshe lono ino ke.” Timi huno pi, “Ino ti qhunie.”

⁵ Tile Boaz no pi, “Naomi lau no alu qhuke tsala lono akithiu nipu Muabliu Rut ghi owu akeo! Tishi anguno alu hu akithiu mheghi shi pualu kepushi.”

⁶ Timi huno ishi khochile kitheve, “Tishikepu aye niye valu mae, kughengu imheghi puhaveni cheni. Nono valu velo, kughengu niye valu mulakepu shivae.”

⁷ Israilmi gholo tinhemgha qhukelo momu tsukileni kelo akhuayeh hitoi shiche: je akeu huno pa pukhu kuqho xape akuqhuu tsuve che. Tino kughakeu vehu xakutha michi shiche.

⁸ Ike timi huno Boaz vilo “Ti nono qhuluvelo” ipi puzu pa pukhu kuqho xape Boaz tsuve.

⁹ Tile Boaz no muchomi eno kutamiqo kumtsu vilo pi, “Ishi tsala lono ino Naomi launo Elimelek ngo Kilion eno Maxlon mheghi akuchopu qhuluve ake ti nongu kumtsu no thopi kene.

¹⁰ Tinguno alau no amheghi hu akithiu no-bolo puani kehu Maxlon nipu Muabliu Rut ye inipu ake, tishi anguno pa philo eno pano timi gholo paje puhave pemonike. Hipau lo nonguno thopi kene.”

¹¹ Timi qono pi, “Iye ningu no thopi ake.” Muchomiqo no pi, “AMPEU pelo okilo ighiniye akeu totimi hipau pesu Rachel ngo Lia pamano ati-anuli kutomo punutsuke toi shilu peni. Noye Efrata lo kinimi shilu peni eno Bethlehem lo aje kughushu shilupeni.

¹² AMPEU no totimi hipau vechewo atianuli otsukeqo huno akibo ye Juda ngo pa nipu Tamar pama nu Perez kibo toi shilupeni.”

¹³ Ike Boaz no Rut saluve eno lipe pa nipu shive. Pano li sasu ashiaji kuqhae eno AMPEU no mishikulupu li tsuno lino anu lakhi punu.

¹⁴ Totimiqo no Naomi vilo pi, “AMPEU shelo! Ishi tsala lono oheju kulupu pano qhitsu anie. Anu pelo Israil lo aje kughushu shilu peni!

¹⁵ Anu hipau pelo olau akuxu kithe sughi peni, eno oteasu lo sushokulu otsu peni. Omukishiu no anu hipau punu tsue, liye okimiye cheni eno liye anu tsuni nguno alau oju aloniae.”

¹⁶ Naomi no anga hu khapelu eno li mlah lo vape no pa kujuu shie.

¹⁷ Pano ghami totimiqo no anu je Obed kutsuno pi, “Naomi lau anga lakhi punu suvetsu ae!” Obed ye David pasu eno Jese papu ke.

Boaz Laghami

^18-22 Hipaqo no Perez laghami ke: Perez nu Xezron. Xezron nu Ram. Ram nu Aminadab. Aminadab nu Nahshon. Nahshon nu Salma. Salma nu Boaz. Boaz nu Obed. Obed nu Jese eno Jese nu David.