RUTH 1 - BAIBEL (BSI)

Elimelek Bolomi Muab lo Wu

¹ Israilmi gholo Kukami no ayehpe mphi lo pano ghakhu lo puqumiye ighie. Ike Judia lo Bethlehem phulo timi lakhi ye pa nipu ngo pa nu kini sasu Muab ghakhu lo pokauve.

² Pa jeye Elimelek eno pa nipu jeno Naomi eno pa nu pama jeno Maxlon eno Kilion. Panonguye Judia lo Bethlehem phulo Efratami kemu Muab ghakhu lo ighino tila acheke.

³ Ike Naomi kimi Elimelek thiveno liye anu pama sasu chime ache.

⁴ Anu pama ye Muablimi luke, lakhi nipu jeno Orpa eno lakhiu nipu jeno Rut.

⁵ Panonguye tile ampe chighi-a kuto kughuna apuzu Maxlon ngo Kilion pama ghi thive, ikehu atopuu ye akimi ngo anu pama kuhave keu lono akuxu kughuju shive.

Naomi Bethlehem lo Ideighi

⁶ Tile li no amukishiu pama sasu Muab ghakhu lono Bethlehem lo idewove nike kutothu, kughengu Muab ghakhulo ake lono AMPEU no pawu Israilmi xuju ighino timiqo ye achuqupu ithulu aniepi li no chiluke.

⁷ Ike li no achekeu-a lono ti kudau wuniye amukishiu pama sasu chethu. Panonguno Judia ghakhulo woniye che.

⁸ Ikemu Naomi no amukishiu pama vilo pi, “ Nokujo ye idewovelo, eno pututa puaza kilo wovelo. Nokujo no akithiunoqo heju eno iheju ke hutoi AMPEU pelo nokujo hejupeni.

⁹ AMPEU no nokujo pelo pututa shelo akimi phulu peni eno akibo shilu peni!” Tishi pieno li no pama vilo ileno wolo pi muma kelo pamaye ighamuku qauve.

¹⁰ Pamano li vilo pi, “Moe, nikujoye ogholo nowu timi lau idewonie.”

¹¹ Ikemu Naomi no pi, “Idewovelo, ninga nokujo ! Kushiye nokujo ye igholo wuniepi ani kya? Ipo lo anuli aphianguno pe nokujo kimi shilupe kepuonomu?

¹² Idewovelo! Kughengu niye kulau mlani keu topumi shivae. Tsala iphilo lakujupu aghiaye itiji no akimi lau wupuzu anuli punue pinamu,

¹³ panonguno kichimi shike kuto nokujo ye khekulupu nomu! Eno nokujo ye kulaumono ti khe akulupu kesha? Moe, ninga nokujo ! Kughengu nokujo nguno niu no akuxu kukhu kumiji xuju ake, AMPEU no ishou a-u beke.”

¹⁴ Tile pama no itaghi ighamuku qauve; eno Orpa no li ni vilo ileno wolo pi mumave no li nowu timi lau idewove, ikemu Rut ye lini khamgholuve.

¹⁵ Tile Naomi no pi, “Julo opami ye li no timi eno lino lhou lau idewova. Opami pape idewovelo.”

¹⁶ Ikemu Rut no pi, “Ivilo oqhivelo pikevilo eno opapenikeu ihachile tsukevilo, kughengu nono khile wunikeno nighi wuni eno nono khile ngoni keno nighi tile ngoni; owu timi pe iwu timi shini eno oLhou pesu iLhou shini.

¹⁷ Nono khileno thini keno nighi tile no thini eno tileno ikumo qhopenie. Akithi nguno kutauno nikujo kututa shivepe aye AMPEU pelo aghime kitikhi ishou betsu peniu.”

¹⁸ Rut no tsumomo wunie pikeu ithuluve kethiu Naomi ye kiumu pimove.

¹⁹ Ikehu Bethlehem tomoke kuto pama kumtsa chesu wue. Kughou pama no Bethlehem lo ighikeno aghami kumtsu no qheghuyi ju eno topumiqo no pi, “Naomi hu hike sha?”

²⁰ Li no pi “Naomi ipi ku kevilo”, “Mara ipi ikulo, kughengu AMPEU Alhou no ayikushu shi ipeithake.

²¹ Ino wunike loye kupukuno shi ake, ikemu AMPEU no au kumsa isaideghi anie. Tuchomujokutsu MPEU no ileqhi eno ikijipusa kenokuu nongu ye kushiye ‘Naomi’ ipi iku ania?”

²² Hishi Naomi no li mukishiu Rut sasu Muab lono ideighike. Pama no Bethlehem lo ighike lo ashothi ghile hu aghi.