Rommi 7 - BAIBEL (BSI)

Kulakupu Pesu Kichepiye

¹ Ithikuzumiqo, ino nongu vilo piniye akeuye nonguno ithi ani, kughengu niye ayezah ithiakemi vilo piniye anie, ike ayezah ye timi lakhino xuake thaqhulo likhi pa shou qhasupe achenike kumo kesha?

² Tishikehu kulakupu shivekemi totimi lakhiye li kimino xuake thaqhulo ayezah no li tsughape qhipuanie, ikemu li kimi thive aye liye li kimi lau tsugha pua keu yezah lono phepuwuvae.

³ Tighenguno li kimi xuaphi lono lino kutami sasu kughunawuve aye liye kutuqhalimi ipi kuniae. Ikemu li kimi thive aye liye ayezah launo phepuwuva, eno lino timi kutami sasu kulakupu shinamu liye kuquamoe.

⁴ Ithikuzumiqo, nongu ghi tihutoike. Nongu ghi Khristo philo lakhi shive akehu ayezah kudauye nonguye thivae, tishikeu lono nonguye itehiye akithi lono xuputhuvekeu wu shivae, tishianguno Alhou ghenguno ningu pelo athi pithilupeniyeke.

⁵ Ninguno ningu timi lhoayelo xuache kelo Ayezah no axine gho apulou haputhu puzu niphi-mpi pepimheno akithipu mlaphe cheke.

⁶ Ikemu itehi ninguye ayezah lono kuqhophevae eno ningu kughape akughu shipepuakeu lono khaqhiphevae. Tishikehu ninguye yepuakeu yezah ghola aqau qholono Alhou qemae, ikemu Aghungu wu akuxu kithe lono qeniae.

Ayezah eno Axine

⁷ Tishiaye ninguye kiu pini kya? Ayezah ye axine kesha? Tiye khilemu kumoe! Ikemu Ayezah ghenguno kethono niye axine kiu keno ithini chemoe. Ayezah lo “Jumine kevilo” ipi puaghimo keaye niye juminekeu ye kiu keno ithini chemoke.

⁸ Ikemu axineno ti ahza kutsu vechewo adokivi phuluveno ilolo juminekeu jeli thwokha xukuthotsu. Kughengu ayezah kuha keloye axineye thiake.

⁹ Ayezah kuha kelo ghuthu lakhi niye xu acheke, ikemu kughou ahza kutsu hu ighive keno, axine puxuvetsu eno niye thikepu shive.

¹⁰ Ahza kutsu huye akuxupi sughi tsupenikeu shikelauye ishelo tiye akithipu shive aghi.

¹¹ Axineno adokivi phuluveno pa zah kutsu vechewo ipishiqhi pithive.

¹² Ayezah kutsuye akimthe, achipi eno akivi.

¹³ Tishiaye, kiuno akivipu keno tipauye kishi puzu akithipu ilau sughi cheni kya? Tikumo thono! Hiye axineno akivi peitha puzu ilolo akithipu mla ani, tishianguno axine lhoayeh ye kuchouno axine kepi tipau ithulupe niyeke eno ahza kutsu vechewono axineye ihulo axine shivepeke.

Timi Lhoayeh Kini Akeu

¹⁴ Ayezah ye alokutsu kepi ninguno ithi ani, ikemu niye thive nikuau timike eno axine quaxemi shipeniye jesuvekemi.

¹⁵ Niye ilikhi ikumla kughutha ghi ithikuthumoe. Kughengu ino shinishi akeu ino shichemoe, ikemu ino shinishimo keu ino shicheni.

¹⁶ ike ino kiu shinishi mokeno tipau ino shicheni aye, ayezah ye akivi kepi ino tipa tsalo qhasutsu ani.

¹⁷ Tishiaye, ino ti shianike kumovae, ikemu axine alou ilolo akeu huno shi anike.

¹⁸ Ino ithi akeuno ilolo, timi lhoaye loye akivi achemoe. Kughengu kiuno achipi keno ino pulo anamu niye ti shilu chemoe.

¹⁹ Kughengu akivipu ino shinishikeu hu ino shichemoe, tishinike zuqhulo khikhi ino alhoksa shinishimo keno tipau ino shie.

²⁰ Ikemu ino kiu shinishimo keno tipau ino shi aye, tiye ino shianike kumoe, ikemu axine ilolo achekeu hunoke.

²¹ Ike hiye ahza lakhia kepi ino phuluve keuno kughono ino achipi shini shikeno alhoksa likhi ino kisheluvekepu shi aghie.

²² Ilikhi imlo alouye Alhou yezah lo izukuvu ani,

²³ ikemu ayeh kutau lakhi iphimpilo akeu huno imlo alouno pulotsu akeu yezah sasu kichighi acheni. Ayezah tipauno ikughape iphimpilo axine yezah achekeu kughu shichenipe.

²⁴ Niye kiutoi akijikusapu timi kela! Khuuno akithilo isailo chekeu phimpi hipau lono ixaphelu nani kya?

²⁵ Ni Mpeu Jisu khristo vechewo Alhou shikimthi ani! Tishiaye, ilikhi imloloye Alhou yezah qecheni, ikemu iwu timi lhoaye ye axine yezah qe cheni.