Rommi 5 - BAIBEL (BSI)

Alhou Lau Achipikalu Keu

¹ Tighenguno ninguye akupulu lono Alhou lau achipikaluve akehu, ningu Mipeu Jisu Khristo vechewo ninguye Alhou sasu kulashiluvae.

² Hi kupukini khile ninguno puthugholu ani keno pa vechewo ilolukepu shiveke. Ikehu ninguye Alhou jukuvu kusajenikeu lakuju akeulo ninguye alokivishini nolo.

³ Tinguno alauno ningu wu shilukusaqo lomu alokvishi acheni,kughengu nino ithi akeuno shiluksano kutuukulushi theqhilukeu iqiphe cheni,

⁴ kutuukulushi theqhilukeu huno athicho iqiphe cheni, eno athichono lajupu iqiphe cheni.

⁵ Lajupu hipauye nilo kumtshuve chemoe, kughengu Alhou no pawu kupukini nimlolo sutsue,tiye pano Aghungu Kimthe nilau puwutsu keu vechewono ke.

⁶ Ninguno akukuphu kuhano ake lono, Alhou no ado kihitha puakeu dolono Khristo no lhoksakughami ghenguno thive.

⁷ Khamiye ighumono kivimi zuqhushi thivetsuni shikeu aghilue pinamu achipiu shiaghi kemi lakhi zuqhushi thivetsunikeu shishe kushokutsue.

⁸ Ikemu Alhou no ningu kimiyeqhiyi keu pephepiye keuye ninguno axinemi shiaphi lono Khristo no ningu ghenguno thiveke.

⁹ Tighenguno itehiye pa kithi pesu ningu pelo Alhou sasu achipikaluve apekehu, tinguno alau shi Alhou loghu launo pano ningu xalu nani.

¹⁰ Kughengu ninguno Alhou ghumi shiaphilo thotsu panu kithi vechewo Alhou sasu kulashilupe aye, itehiye Alhou sasu kulashiluve akeke, Khristo kuxuno shisheno ningu xalu anani.

¹¹ Tishike likhi kumono, Ampeu Jisu Khristo vechewo Alhou sasu kulashiluve akehu pa vechewo Alhou gholo alokivishi acheni.

Adam eno Khristo

¹² Hi ithilo. Timi lakhi vechewo ayeghiqhalo axine iloghi, pa xineno akithi sasu ighi. Ikehu timi kumtsu shou akithi ikughive, kughengu timi kumtsu axine shiveke.

¹³ Ayezah tsumphi loghi ayeghiqhalo axine ache, ikemu ayezah kuha kehu axine kihikulayi pe puatsumoe.

¹⁴ Ikeghi Adam ghuloki lono Muse ghuloki kutolo akithino timi kumtsu shou qhasupe ae. Adam no Alhou hebidekeu xine paphishi axine shimokemi shou ghi qhasue. Adam ye athiu milakhi ighiniye akeu kumlhoke.

¹⁵ Ikemu hipama aphiphi kumoe: Alhou no kumsagho tsukeuye Adam hekibide xine toimoe. Kughengu timi lakhi hekibide xine vechewono timi kutomo thiveke, ikemu tinguno alaushi Alhouw kupukini eno pawu kumsaghoye timi lakhi hi Jisu Khristo wu kupukini vechewo timi kutomo ghenguno kupukunoshi ighi.

¹⁶ Alhou no tsukeu kumsagho ngo Adam xine kuma dolo kutuqukeu ani. Adam xineno timi kutomo lau akithipu xine sughi, ikemu Khristo no kumsagho tsukeuno kutomo xine qhivetsuno ajukuvu kuxulo sughi tsue.

¹⁷ Adam xine ghenguno akithino qhasupe acheni. Ikemu Jisu Khristo vechewo Alhou no kupukini kupukunoshi tsukeu eno pa mikucho kumsagho shi-ghi tsukeu khunoqono ithuluve akeno, panoqono xuaphi lono Khristo vechewo qhasulu nani.

¹⁸ Ikehu, hebidekeu xine lakhino timi kumtsu kileqhive ketoi timi lakhino achipikalukeu ghushoghili no timi kumtsu akipimi tsumokeu eno akuxupi ani.

¹⁹ Kughengu timi lakhi aghokulu kumo lono timi kutomo axinemi shive peke toi, timi lakhi ghokulu lono timi kutomo Alhou lau achipikalupe nani.

²⁰ Axine shikeu kighishenike ghenguno Ayezah iloghi; ikemu khile axine shikeu kighisheni keno, Alhou no kupukini shishe alau shi kighishe tsue.

²¹ Ikemu, axineno akithi peitha puzu qhasuke toi, Alhou kupukinino achipikalu keu peitha puzu qhasupe lhokta kuxulo ni Mpeu Jisu Khristo vechewo nisasu wu cheni.