Rommi 3 - BAIBEL (BSI)

¹ Tishiaye, Judamiye kutami nguno heshekulu kiu ani kya? Momu aphighu yiko ghave keuno kiu vehupu ani kya?

² Ala thwokha lono heshekulu ani. Atughiu no, Alhou no pa sutsa pesu Judamiqo lau pichetsue.

³ Ike panongu khamino pukhubemla kepu shive aye kishini kya? Panongu pukhubemlakeu huno Alhou pukhubekulu puhaveni kesha?

⁴ Khilemu tishimo nani! Timi kumtsuno kimkimi shive namu Alhou ye kuchou shi ani putsae. Kuchoyesulo ishi pipuakeu toi: “Kughou nono atsa pini keno noye achipie pi piye masae, Kughou oshou kughathabeni keno noye tipaulo tolu masae.”

⁵ Ikemu ninguno akumou shikeu lono Alhou ye achipiu lono shichekeu ke ipi ipeghi piyelu aye, tile ninguye kiu pikepu ani kya? Alhou no ningu ghime aye, paye achipilo kumoe pilu nani kesha? (Niye hipau lo timiqono pichekeu toi piauvae.)

⁶ Khilemu tishimoe! Alhou no amikucho kumo aye, paye kishi puzu ayeghi shou kughakutha shiluni kya?

⁷ Ikemu ikimiki vechewo Alhou ye kuchou ipikeu heshe pesu sheqhekepu shilu aye, kushiye axinemi lakhi hutoi ipimi ani kya?

⁸ Tishiaye kushiye “Akivi ipeghi penike ningu alhoksa shinie” ipimo kya? Timi khamino ni-tha-ghi hikithipu ino picheniepi inguku acheni! Timi hitoi keqoye kileqhi vekeuno achipie.

Timi Khumu Amikucho Kuhae

⁹ Tishi aye ningu Judamiye Judakumomi nguno akiviu kesha? Moe, khilemu kumoe! Ino piveano Judami na Judakumomi namu, kumtsu axine qholo ani.

¹⁰ Kuchoyesu lo ishi pipuakeu toi: Timi lakhimu amikucho shikemi kuhae,

¹¹ Milakhimu ithikeu kuhae, milakhimu Alhou phukemi kuhae.

¹² Timi kumtsuno Alhou launo ighosusu wukhave, panongu kumtsuno vimove. Milakhimu akivi shikemi kuhae, kuchouno lakhimu kuhae.

¹³ panongu baxaye akumoki chhupe puakeu toike, Panongu mili pesu pishiqhi acheni. Apighi tughuno panongu mili qholo ani.

¹⁴ Panongu kichilo kukhu-kimji shi ghushokeuno chhitoi ani.

¹⁵ Panonguye timi ghuza eno pithivenikeulo thai ani.

¹⁶ Panonguno khile wuni keno hexakeu eno shikupusa qhivetsu cheni.

¹⁷ Panonguno alakishi laghi ye kiukeno mtha.

¹⁸ Panongu gizulo Alhou sumsanikeu yeh kuha.

¹⁹ Ninguno ithi anike, Ayezahlo pi puakeu kumtsu Ayezah qholo akemiqo vilo pi anike, tishianguno timino jekukivi shichekeu kumtsu hakhave no ayeghiqha kumtsu Alhou kughakutha qholo saghiniye ke.

²⁰ Kughengu Ayezah vechewo timi pelo paye axine shivaepi ithipe cheni kethono, Ayezahlo shilo pi puakeu shilukeu lono timi khumu Alhou zulo achipi kalukeu shimlae.

Timi pelo Achipikalupe

²¹ Ikemu itehiye Alhou no timi pelo pa lau achipikalupe keu pephepiyevae, eno tiye ayezah kumu suakepu shimoe. Ayezah ngo tungkupmino hipau shepe shipuani, ike tiye,

²² pulukemi kumtsu ghenguno Jisu Khristo lau akupulu akeu vechewo Alhou no timi pelo pa lau achipikalupe keuke. Kughengu kiumu kutuqukeu kuhae:

²³ Timi kumtsu axine shive eno Alhou no xalunikua lono putosuve.

²⁴ Ikemu Alhou no kumsano kimiyeqhiyikeu lono Jisu Khristo xachilekulu akeu vechewo panonguye Alhou lau achipikaluvae.

²⁵ Alhou no Jisu Khristo ikhiphepe tsukeuno pa kithino axine pevekulupu shipeniyeke, tiye timino pa lau akupulu bekeu vechewono hitoi shikeuye pano kishi timi pelo pa lau achipikalu kepu keno piyekeu ke. Kughengu wovekeu loye Alhou no kheakulushi timi xine juzuve tsucheke,

²⁶ ikemu itodoloye pano timi xine ikhivetsu akeuye, paye achipie pinikehu eno Jisu lau khukhumu akupulu bekemiye pano achipikalu pecheniepi piyeni kehuke.

²⁷ Tishi aye tile kiu qheza kepu ani kya? Kiumu kihi akepu kuhae! Kiu kiqi lono? Timino Ayezah papelukeu kiqi lono kesha? Moe, akupulu akeu kiqi lono ke.

²⁸ Kughengu ninguno kishekhalu keuno timi lakhino Alhou lau achipikalu pekeuye akupulu likhi vechewo noke, eno Ayezahlo pipuakeu shilukeu lono kumoe.

²⁹ Momu Alhou ye Judami Lhou likhi kesha? Paye ashiayeh kutami Lhou ghi ke kumokesha? Iye, paye ashiayeh kutami Lhou ghie.

³⁰ Alhou ye lakhi kehu pano aphighu yiko ghave kemi pelo panongu kupulu qhemi lono pa lau achipikalupe nani, eno Judakumomi pelo ghi panongu kupulu vechewo shilupe nani.

³¹ Tishiaye hipau kupulu pesu Ayezah hapuhaveni kesha? Khilemu tishimoe! Tishinike zuqhu ningu pelo Ayezah mutotoilu peniyeke.