Rommi 2 - BAIBEL (BSI)

Alhou Kughakutha

¹ Tighenguno o timi, no-khuu keno kutami shou kughatha be kulupu kya? noye jekujeli kiumu pikulupu kuhae. Kughengu nono kutami shou kughakutha be aye olikhi okileqhive ani.

² Timi hikithipu shikichemi shou kughathabe aye Alhou ye achipishi anie pi ninguno ithi acheni.

³ Ikemu o timi, no-ampi ghi hikithipu shiche keghi noye kutami shou tipau ghenguno kughatha keu becheni kya? Noye Alhou wu kughakutha lono polu nani kughashi ani kesha?

⁴ Momu noye Alhou no ivuilayi keu kije, kutu-ukulu eno kheakulu shikeu jukunathani kesha? Alhou no ivuilayi keu huye opelo pa lau xaideghilupeni yekepi noye mtha kesha?

⁵ Ikemu noye amlo kumka likhi thono amlo-ighikeu kuhae.Ike Alhou ghakighide eno Pano achipi lono kughatsukeu pephepiye nike tsalalo noye olikhi oghengu aghime kitikhi ithulu kepu pekike auvae.

⁶ Kughengu pututano kiu mla puaghini keno tipa kiqi lono Alhou no asaxu tsuwo nani.

⁷ Khunoqono kheakulushi akivi kumla shi puzu sheqhekepu, agigihupu eno thive chemokeu phucheghini keno Alhou no lhokta kuxu tsu nani.

⁸ Ikemu khunoqono aghukhashini keno eno kuchou gholumo puzu akumou papewuni keno, Alhou no panoqo shou aloghu eno agha kighide lepuku nani.

⁹ Alhoksa mlakemi ghenguno aghime kitikhi ngo amlo kughuju anani, atughushi Judami shou paghi eno Judakumomi ghi tipa shelo sholu nani.

¹⁰ Ikemu akivi mlakemi lakhikhi ghenguno sheqhekepu ngo gihukepu ngo alokiqi ishi anani, atughushi Judamiqo shou paghi eno Judakumomi ghi tipa shelo sholu nani.

¹¹ Kughengu Alhou ye agi jumo nani.

¹² Judakumomi ye Muse yezah pecheghimomu axine shicheke eno Ayezah kuha pulaghi panongu ghi puhave, Judamino Ayezah peche pulaghi axine shikehu Ayezah no panongu shou kughathabevae.

¹³ Kughengu Alhou zuloye Ayezah inikemino achipiu shilu chenike kumoe, ikemu ayezah papelukemino Alhou lau achipiu shilu cheni.

¹⁴ Judakumomi ye Ayezah pecheghimoe, ikemu kughou panonguno aghoapulou lono Ayezah lo kiu ahza tsukeno shiaye, Ayezah pighi aghimo namu, panoqo ghenguno tino ayezah lakhi shivae.

¹⁵ Panongu kughutha jukelo Ayezah lo kiu zah tsupuani keno tiye panongu mlolo yepe puanie. Panongu lokutsu ghi kuchou kepi ashepe shiani eno panongu kukumsu thotsu kutsalano nguku kile eno hataloye panoqo sushokile cheni.

¹⁶ Ino pikulha chekeu tsakiviu kiqiloye, kughou Alhou no Jisu Khristo vechewo timi mlolo tuqhou kukumsu kumtsu shou kughathanikeu tsalalo, hitoi shi nani.

Judami eno Ayezah

¹⁷ Noye kishi ani kya? Nono olikhi opesu Judami kepi acheni, Ayezah pukhupe acheni eno Alhou sasu kutshupe aniepi qheza acheni.

¹⁸ Alhou pulou kiu keno noye ithi ani eno ayezah lono kiuno achipi keno kishelukepu shikalue.

¹⁹ Noye anhethi kighichemi kichekipiyeu kepi mutsuqheyi pi acheni, akuzulo akeqo lau akuvu lakhie ipi acheni,

²⁰ mbomzumi shikithe tsuchekeu, itimiqo kukutsuu, eno Ayezah lo akighithi eno kuchou kumtsu ithi puaniepi picheni aye,

²¹ noye kutami shika cheni puzu olikhi oshika mla kesha? Nono “Puka kevilo” pi asheshu cheni puzu olikhi noye puka cheni kesha?

²² Nono “Salha kevilo” ipi cheni puzu noye salhani kesha? Asu- atuno ajulho shino mllakeu aphimuqhu cheni puzu noye achinekilo akeu suxaluve cheni kesha?

²³ Alhou yezah pe acheni kepi qheza cheni puzu pa yezah hephokeu lono Alhou je kusapu sughi cheni kesha?

²⁴ Kughengu kuchoyesulo ishi yepuakeuno, “Nongu Judami ghenguno Judakumomi no Alhou je thaigha chenie.”

²⁵ Nonguno Ayezah papelu aye aphighu yiko ghave chekeu avehupu, ikemu nonguno Ayezah gholumo aye, khilemu aphighu yiko ghamo kepushi ake.

²⁶ Ikehu aphighu yiko ghamokemi lakhino Ayezah lo ahza tsukeu papelu aye paye aphighu yiko ghavekeu toi Alhou ye pa kihisumo nikesha?

²⁷ Tishiaye, nonguno aphighu yiko ghave aghi namu Ayezah hephoveaye, khunoqono aphighu yiko ghamo namu Ayezah peluni keno tipaqono nongu kileqhivae.

²⁸ Khualano ashouno Judami lakhi shi aghike ghenguno kuchouno Judami ke kumoe, momu aphighu yiko ghakeu kuchou huye ashou eno aphi- ashilo likhi ke kumoe.

²⁹ Ikemu timi khuno alouno Judami keno kuchouno Judamike, eno aphighu yiko ghakeu kuchouye amlolo ke. Tiye Alhou Ghungu no mlatsukeu kethono yepuakeu yezah kiqi lono shikeuhu kumoe. Timi tipauye Alhou launo akishe ithulu cheni, eno timi launo kumoe.