Rommi 15 - BAIBEL (BSI)

Kutami Pulou Shilo

¹ Ningu khunoqo akupululo akumto shi ani keno tomochhimo keqono ikiqivekelo puqhetsu kepu, eno nilikhi nighoapulou shikepu kumoe.

² Ningu lakhi khino akusami ghoapulou eno panoqo kivipu shitsu kepue, tishianguno akupululo pa xaqheputhuni kehu.

³ Kughengu Khristo ye pa likhi pagho apulou shimoe. Tishinike zuqhu kuchoyesulo ishi yepuani: “Khunoqono othaigha cheni keno panonguno thaighakeu ishou iluqi ikughie.”

⁴ Tighenguno puzuu kuchoyesulo khijehi yepuani keno ningu shikapenike yepuani, tishianguno kuchoyesulo kheakulu eno shikumtokile akeu ningu tsukeu vechewo ningu pelo lajupu apeniyeke.

⁵ Kheakulu eno shikumto tsu chekeu Lhou pelo nongu gholo Jisu Khristo kuxu ghola papesu akukumsulo aphiphi shilupekepu nongu kophetsu peniu,

⁶ tishiaye nongu kumtsu kuqhano asutsa lakhi shi puzu niMpeu Jisu Khristo paPuh Alhou sheqhe peniu.

Judakumomi lau Atsakiviu

⁷ Tighenguno Alhou jukuvupushi Khristo no nongu ikhiluketoi, nongu lakhino lakhi ikhilukilelo.

⁸ Kughengu ino nongu vilo piakeuno Khristo ye Judami qeu lakhi shive puzu Alhou ye pukhube lukeu kepi piyeni ke eno apu-asu lau piqhipuakeu hu shikumtoniyeke.

⁹ Judakumomi ghi Alhou no qhuivulayi keulo pa sheqhepeniyeke. Kuchoyesulo ishi yepuakeu toi: “Tighenguno Judakumomi gholo ino shikimthikeu otsuniyeke, ino oje shipilini.”

¹⁰ Itaghi ishi pipuani, “Nongu Judakumomiqo, Alhou no kisheluvekemiqo gholo alovi lo!”

¹¹ Eno itaghi pipuakeu, “Judakumomi kumtsu Ampeu shelo, timi kumtsuno shishe pa shelo!”

¹² Itaghi Isaya no ishi pi, “Jese polo kughuko lakhi ighi nani, pano Judakumomi shou ayeh penike ipeghi nani, eno Judakumomi wu lajupu pa shou qhi nani.”

¹³ Lajupu tsuchekeu Lhou pelo nonguno puluakeu vechewo alokivi eno alokughuno pesu nongu lolo shepichhitsu apeniu, tishikeuno Aghungu Kimthe kuka vechewo nongu wu lajupu heshelu penike.

Paul mlo Kuloghi

¹⁴ Ithikuzumiqo, niye nongu ghili chilu puzu ighakiqi shi akeuno, nonguye akivipuno chhitoi ani, eno ninguye akighithi kutomo xapusu chhitoi ani eno lakhino lakhi shikakilelu nanie.

¹⁵ Ikemu yesu hipaulo tsatsayi nongu loputsu kithekeu shi avehu akhoto hami ghenguye amlo kumto suno nongu lau yevae. Ino amlo kumto shiakeuye kutau ghenguno kumono

¹⁶ Judakumomi kudau Jisu Khristo qeu shipenike Alhou launo ighikeu tsakiviu pikulhakeu lono niye achinemi kumlho shi ani, tishianguno Judakumomi pelo Alhou no ikhikulupu akumllagho lakhi shilupe, eno Alhou lau Aghungu Kimthe no shikimthe pesu tsukeu shilupeniye ke.

¹⁷ Jisu Khristo sasu kuqhape akeulo, Alhou ghenguno mlakeulo niye akijivilo ani.

¹⁸ Niye kutau kiumu piakepu kuhake, ikemu imlo kumtoshi pikulupu akeuye Khristo no ipeitha puzu, atsapilo, akughuthalo, amchipu, akumzapu shikeulo eno Aghungu Kimthe kuka ishi lono Judakumomi Alhou ghokululo saphe piyelupeke.

¹⁹ Tishikehu Jerusalem lono homuxa susu Ilurikiam qha hokumxa kutolo, niye Khristo tsakiviu pesu hipaqha kuchopulo kutughuvae.

²⁰ Pulhapuju ilokumsushi achekeuye a-a khilehi Khristo je chimlano aghinikeno Atsakiviu pesu tilehi kutughu nikeu shi acheni,tiye kutau kumono khualano aboqha qhave aghikeu shou shipukumoni kehue.

²¹ Kuchoyesulo pipuakeu toi, “Khunoqo vilo pa ghili pimphi keno tipaqono chilu nani, khunoqono ithumla aphi keno tipanoqono ithikuthulu nani.”

Rom lo Wunikeu Kukughu

²² Hi ghenguno ghuthu kutomo nongu lau ighiniye kuto akeu lono ivekhape auve chenike.

²³ Ikemu itehiye hipaqhalo ikumla ashe tovae, eno ampe kushuwa lono nongu lau ighinikeu puloqhiyi acheni ishi kehu,

²⁴ ino Spein lo wuche kikije lono nongu sasu kusholu nike laju ani. Ino nongu gholono alokivi shilu nongu kukuphu luno Spein lo wuni cheni.

²⁵ Ikemu tipa zuuno niye Jerusalem lo kupulumiqo vehupu shiwu paghini cheni.

²⁶ Kughengu Makedonia ngo Akhaia qhalo akukuhou qono amlokiqishi puzu Jerusalem lo kupulumiqo gholo kumlhomi akeqo kuphupenike agho qhakutsue.

²⁷ Panonguno hi shikeu amlo kiqishi, kuchouno panonguye kumlhomiqo kuphukuzue, kughengu Judami no kukumgha ngu-agha pesu Judakumomi sasu kusajeke, ikehu Judakumomi ghi panongu kukumgha tinhemgha akeu hu pesu Judamiqo huthu kepue.

²⁸ Tighenguno ino kughono hipau kumlapu saje shitaveni keno, eno kiu qhape puanikeno tipaqo kumtsu xapuwo panoqo tsuve kethino, niye Spein lo wuni cheni, eno tila wuche kelono nongu putsani.

²⁹ Ino ithi ani, kughou ino nongu lau ighini keno niye Khristo kukumghano chhikhoi shino nongu lau ighini.

³⁰ Athikuzumiqo! ningu Mpeu Jisu Khristo ngo Aghungu no kimiye tsukeu lono ino hi nongu qhuiniju ani: Igholo kutupo ghi ighenguno Alhou lau akighini shitsu alo.

³¹ Judia yeghilo kupulukumomiqo launo ixapheluve penike eno Jerusalem lo kupulumiqo pelo ino tilau kiu mlanikeno ikhikulupu shipenike inikhu tsulo,

³² tishianguno Alhou pulou shi aghi aye ipelo alokivi shi ighino nongu gholono aloshiputsuni.

³³ Alokughuno tsukeu Lhou pelo nongu kumtsu gholo apeniu. Amen.