Rommi 12 - BAIBEL (BSI)

Alhou Kumla Shikeu Kuxu

¹ Ikehu ithikuzumiqo, Alhou wu qhuivulayi keu kutomo ningu lau akeu vechewono ino nongu vilo hi qhuiniju ani: Nongu phi-mpi pesu Alhou lau akuxuno mllakeugho shi-ghi qhitsulo, pa kumlapulo akimtheshi peitha penike eno pano ikhilu kuzupushi tsulo. Hino kuchou shi nonguno mlla kepue.

² Hipa yeghilomi ghola hakevilo ikemu nongu kukumsu shikithelukeu vechewo nongu lolo pekililulo. Tishiluaye Alhou pulouye kiuno akivipu, kiuno pano ikhilu kuzupu eno kupukulu keno nonguno ithi kututa shilu nani.

³ Kughengu Alhou wu kupukini itsukeu vechewo ino nongu kumtsu vilo hi pi ani: Nongu khumu alikhi akughapesu qhemghai kumsukepu kumoe, ikemu pututano aghibiu lono kumsukepu, Alhou no akupulu lakhikhi tsupuakeu qhemi lono pututa likhi pututa shou xathabeluve kepue.

⁴ Aphimpi lakhilo ninguye aphia-u jeli kutomo ani eno aphia-u jeli hipaqo kumtsu aphiphi lono peitha chemoe.

⁵ Titoi, ningu ghi kutomo shi anamu ninguye Khristo lono kimepe aphi-mpi lakhi eno aphiauno kimepe akeu toi ningu lakhino lakhi sasu kimepe ani.

⁶ Alhou no kupukini ningu tsukeu kiqi lono agho kututashi tsupuakeu ninguno peithani. Alhou launo tungkupu tsa pinikeu tsupuaghi aye ningu kupulu aghikeu qhemi tishi masa;

⁷ kutami qekepushi aghi aye ninguno qemasa; shikakepu shiaghi aye ninguye shika masa.

⁸ Kutami hakitekepu shiaghiaye ninguye hakitekile masa; khuno qhasutsu kepu shini keno ililai qhasutsu masa. Timi khuno sakiphemi shinikeno ichhe-ime mla masa. Khuno timi kupuqhiyikeu kumla shinikeno aloviqhiyi shimasa.

⁹ Kimiyekilekeu hu mutsumishei shipelo. Kusakughaye mithilo eno akiviuye mutotoi tsuquluvelo.

¹⁰ Athikuzumi kimiyekile ketoi nongu lakhino lakhi kimiyekilelo; gihukilenikeulo kuhakilelo.

¹¹ Azukinilo ghuthi suve mono, angu-agha thibuyimono Ampeu qe alo.

¹² Nongu lajupu akeu huno nongu pelo alokiqi shipelo, shilukusalo theqhikulu alo, akighinilo azuni alo.

¹³ Nonguno aghikeu pesu kupulumi vehupu shi aghi keulo qhasutsulo; eno nonguye inami sasukinimi shilo.

¹⁴ Nongu shikighimekemiqo kumghatsu lopi Alhou vilo khutsulo. Pa vilo tipaqo kumghatsupenike inikhu nithono musu ini penikeu khukelo.

¹⁵ Alovi aghikemi gholo alovilo, qa-mlo aghikemi gholo qa-mlolo.

¹⁶ Kumtsu sasu kuloni kughuvuyi xulo, qheza-laki kevilo, ikemu aqhokighepu kumlapu saje ikhilulo; eno khilemu olikhi noye alokutsumi kepi kumsu kevilo.

¹⁷ Khualano oshou alhoksa mla aye, alhoksa pesu pa tsuchilekevilo. Timi kumtsuno kiu pesu akivi kepi cheni keno tipau shinikeu pukaputsalo.

¹⁸ Toluke thaqhu, omuzuloye timi kumtsu sasu kulakishi lono xuanikeu shilo.

¹⁹ Ino kimiyechekeqo, khilemu olikhi omukhu lukevilo, ikemu tiye Alhou loghulo pichevetsulo. Kughengu kuchoyesulo ishi yepuani: “Ino amukhulu nani, ino lochile nani, ipi Ampeu no pie.”

²⁰ Ike tishinike zuqhulo, kuchoyesulo pike toi, “Oghumino mzuthi aye pa kughulhulo; pano tughuthiaye jehlo kughengu tishi keu lono nono ami hipe pa kutsu shou puku tsuanie.”

²¹ Alhoksa pelo nongu theqhiluvepe kevilo ikemu akivi pesu alhoksa theqhiluvelo.