Rommi 10 - BAIBEL (BSI)

¹ Ithikuzumiqo imlo kumtsuno pulochekeu eno Alhou vilo ino inikhu chekeuno niwu timi pelo xalu vepenishie!

² Ino panoqo ghenguno ashepe shilu nanike panonguye aghuiloqhiyi Alhou lau azukini achenie, ikemu panonguno azukini shi achekeu huye kuchou kighithi sumo puzu shi acheni.

³ Alhou no timi pelo pa lau achipikalu pekeu lah panonguno jukumghaleyive puzu pano likhi pano chipiu shipe qhinikeu phuauve ikehu Alhou no timi pelo pa lau achipikalukeu lahlo panoqono chemove.

⁴ Kughengu Khristo no Ayezah kishekhavetsuae, tishianguno akupulu aghikemi pelo Alhou lau achipikalu apeni kehue.

Xakulupuye Kumtsu Ghenguno

⁵ Muse no yekeuno timi khuno Ayezah pelu puzu Alhou lau achipikalu nikeno paye tipau pesu xulu nani.

⁶ Ikemu akupulu shou bepuzu Alhou lau achipikalukeu pesu ishi pipuanie: “Olikhi omlolo ishi pikevilo, khuno atsutsulo ikuluni kya?”( Khristo saiqighi kepushi.)

⁷ Momu “Khuno ayeghi qhou iqi kulupu kya?” (akithi lono Khristo saikughi kepushi.)

⁸ Ikemu ishi pichekeuno: “Alhou sutsaye ophivilo anie, okichilo eno omlolo anie (nino pikulha chekeu akupulu sutsa hu pianike.)”

⁹ Kughengu Jisu ye Ampeu ke ipi okichino piphevelu aye, eno Alhou no akithi lono pa xaputhuve kepi omlolo puluaye, oxalu nani.

¹⁰ Kughengu timino amlo lono pulukeulo huno Alhou lau achipikalupe cheni, eno nikichino pipheveno xalu chenipeke.

¹¹ Kuchoyesulo ishi pipuani, “Pa pulukemi khumu shikukujo chemoe.”

¹² Hiye kumtsu kihi ani, kughengu Judami ngo Judakumomi dolo kutuqukeu kumu kuhae, Ampeu hipauye kumtsu Mpeu ke eno pa phu ighi kemi kumtsu shou kupukunoshi kumghatsu cheni.

¹³ Kuchoyesulo piketoi, “Khunono Ampeu je kunikeno xaluve nani.”

¹⁴ Ike panonguno pulumo kenokuu xalulepi inijuni kya? Panonguno chimla aphikeu sutsa kishi puzu puluni kya? Asutsa pikulha moke kishi puzu panonguye chiluni kya?

¹⁵ Asutsa kipemi puwumoke, kishi asutsa pikulhaluni kya? Kuchoyesulo pipuake toi, “Atsakiviu pikulhakemi ighikeuye kiutoi jukivi kela!”

¹⁶ Ikehu panongu kumtsuno Atsakiviu ikhilutsuke kumoe. Isaya no pivae, “Ampeu, nino asutsa peighikeu khuno pulutsu kya?”

¹⁷ Tishiaye asutsa chilukeu lono akupulu ipeghi cheni, eno Khristo tsa pikulhakeu vechewo chilu cheni.

¹⁸ Ikemu ino hi iniju ani, panonguye kuchouno asutsa chimlave kesha? Panonguye chiluvea thono, kughengu kuchoyesulo ishi pivae. “Panongu ghughaye ayeghi kumtsu shou wuvae, eno panongu tsaye ayeghi shekha kutolo tovae.”

¹⁹ Itaghi ino hi iniju ani, Israilmiye mthavekesha? Atughushi Muse no pikeuno, “Ino nongu pelo khunoqomino ashiayeh kuchou kumokeno tipaqo jupesu anheshu peniu; Mbomzumi shiayeh lakhi pesu ino nongu xupukani.”

²⁰ Isaya no akumto shi pipuani: “Khunoqono iphujumono achekeno tipaqono iphuluvae, Khunoqono ivehu inijumono achekeno ino tipaqo lau pephe piyevae.”

²¹ Ikemu Israilmi muzu loye Alhou no ishi pi, “Atsala kupuju aghokulukumomi eno hekibidemi lau i-u sukhope kheju acheni.”