Piyeküsü 7 - BAIBEL (BSI)

Israilmi 144,000

¹ Tipathiu ayeghiqha cheku bidilo kungumi bidi puthugho aghikeu ino ithulu. Panonguno amlhu bidi sunhechile pesu ae, tishianguno ayeghi shou azughi shou eno asubo shou mu mulhu puku pemoniyeke.

² Tileno kungumi lakhino akuxu akeu Lhou wu amchi chishida kepu pesu tsukinhe kipelauno ipeghi. Kungumi tipauno kungumi mibidi, ti ayeghi ngo azughi ghime peniye akuka tsu puakeqo vilo asutsa kuloghi lono ishipi,

³ “Nino Alhou qemiqo kishelo chishidakepu pesu amichi shimphi kutolo nonguye ayeghi, azughi momu asuboqo shipusa kevilo.”

⁴ Amichi chishida pukuvekemiqo kihikutsulu keu kikihi ivilo pikeuye 144,000. Panonguye Israilmi alagha chighikini gholonoke.

^5-8 Panonguye alagha lakhikhi lono 12,000 ni amchishi chishida pukuvekeqo ke: Juda lagha lono 12,000, Ruben lagha lono 12,000, Gad lagha lono 12,000, Asher lagha lono 12,000, Naftali lagha lono 12,000, Manase lagha lono 12,000, Simon lagha lono 12,000, Levi lagha lono 12,000,Isakhar lagha lono 12,000, Zebulun lagha lono 12,000, Josef lagha lono 12,000 eno Benjamin lagha lono 12,000.

Aqokitikhi

⁹ Hipathiu ino jukeloye khunomu kihikhamla kepushi timi aqokitikhi tile aghi. Panonguye timi ajeli kututa, ashiayeh kututa, aju kututa, atsa kututa lono ighikemi eno panonguye akimiye phimini pepu eno panongu ulo aghumhibo loka pepuzu akuka lakhulo eno Bheriti zulo puthugho.

¹⁰ Panonguno asutsa vekipighi ishipi, “Akuka lakhulo iqa akeu niLhou eno Bheriti launo xakulupu ighi cheni!”

¹¹ Kungumi kumtsuno akuka lakhu, muchomiqo eno akuxu akeu lhoxu bidi hu vehomxa pesu puthugho ae, eno panonguno akuka lakhu zulo agi pishiqhope itsaqino Alhou mllaghi ishipi,

¹² “Amen! shekiqhe akimithe jekipi, alokutsu, shikimthi, agigihu, akuka, aje kughushuye alhokupujulo niLhou wuke! Amen!”

¹³ Muchomi gholo lakhino ivilo ishi iniju, “Akimiyephi chijebobo pepuakemiqoye khunoqo keno eno panonguye khilano ighikeno noye ithi anima?”

¹⁴ “Akijeu, nono ithiani thono niye mthae,” ipi ino khochileve. Tileno pano ivilo ishi pitsu, “Hipaqoye shikighimekeu kitikhi hechesu ighilukemiqoke. Panonguye Bheriti jih pesu chijebobokeu phi qhukimthe luvekeqoke.

¹⁵ Tighenguno panonguye Alhou kuka lakhu zulo puthughono pa chinekilo putho pucho pa huthu anike. Akuka lakhulo iqa akeuno panongu susholu nani.

¹⁶ Panonguye khilemu muzuthi tughuthimo nani, tsukinhe momu kutau kululo panongu phuqhimo nani.

¹⁷ Kughengu akuka lakhu mutalo akeu Bheritino panongu kheu shive nani, pano panoqo sasu akuxupu zupukilo sawu nani; eno Alhou no panongu nhezu isuvetsu nani.”