Piyeküsü 6 - BAIBEL (BSI)

Mekhapuakeqo

¹ Tileno Bheritino likuzu kaku mekhapuakeu tsuni gholo atughiu suphono lhaphe keu ino ithulu, ikelo akuxu akeu lhoxu bidi gholo lakhino tsutsukusu ghugha kimihi lono ishipi, “Ighilo!”

² Ino jukeloye, khurshi akimiye lakhi aghi eno tipau shou iku puzu chekeuye asuzu pea eno akutsukuqho lakhi pa tsupua. Pano theqhikulumi lakhi toi lewuniaye chesu wuve.

³ Kughou Bheritino mekhapuakeu akiniu suphono lhaphe keno, akuxu akeu lhoxu akiniuno ishi pikeu ino chilu, “Ighilo!”

⁴ Khurshi kutau huchuyikeu lakhi ipeghi. Tipau shou iku puzu chekeuye ayeghilo aghukishi sughipe nikeu kuka tsupua, tishianguno timino lakhino lakhi ghiqhi kepushi; eno azutakihi lakhi pa tsupua.

⁵ Kughou Bheritino mekhapuakeu akuthuu suphono lhaphe keno, akuxu akeu lhoxu akuthuuno ishi pikeu ino chilu, “Ighilo!” Ino jukeloye khurshi tsubuyikeu lakhi aghi, eno tipau shou iku puzu chekeuye mighikepu ahhu lakhi pa ulo pea.

⁶ Akuxu akeu lhoxu bidi gholono ipeghikeu sutsa toikeu lakhi ishi pikeu ino chilu, “Atsala lakhi jume asho thi kilogram lakhi eno tsala lakhi jume barli thiye kilogram kuthu. Ikemu oliv teli subo eno atsayiluye shipusa kevilo!”

⁷ Kughou Bheritino mekhakeu abidiu suphono lhaphe keno, akuxu akeu lhoxu abidiuno ishi pikeu ino chilu, “Ighilo!”

⁸ Ino jukeloye, phalayikeu khurshi lakhi aghi. Tipau shou iku puzu chekeu jeye akithi eno Hades no tipau punukhoi papeche. Panongu pelo aghukishi, puqumiye, kusukini eno tughashi peitha puzu ayeghilo timi kikije bidi shikelo lakhi pithivepeni keu shi akuka tsupe pua.

⁹ Kughou Bheritino mekhakeu apunguu suphono lhaphe keno, Alhou tsa pesu asheshukeu eno amikucho shi ashepe shikeu ghenguno ghiqhivekemiqo akumllagho kiptia qholo aghikeu ino ithulu.

¹⁰ Panonguno asutsa kuloghi lono ishi igha, “Akughushu Mpeu, akimthe eno kuchou, ayeghilo akemino nighiqhi pithivekeu ghenguno panongu shou ado khitohi lono nimukhu lutsuni cheni kya?”

¹¹ Panongu lakhikhi lau chijebobo keuphi akimiye lakhikhi tsu eno panongu vilo ado ikhonheyi ghenguno ngo aghilopi pive, tiye panongu kusami aqemi eno athikuzumi panongu toi ghiqhivekemi kikihi kupu miphi kutolo ngo aghilo pive.

¹² Kughono Bheritino mekhakeu akutsughou suphono lhaphe keno, ino jukelauye ayeghi shishe ilu ighi, eno zumoive, eno aqhiye ahji toi huchuhuyive.

¹³ Eno tuqu tsalalo pasapaghano khughuthi kuxu fukighiqhi keshi ayepuqono ayeghilo ikiqighive;

¹⁴ eno likuzu kaku kuzuluve keshi atsutsuye hauve; naghuto lakhikhi eno zudoyeghi lakhikhino pututa-a lono iqeuve.

¹⁵ Tileno ayeghilo kukami, kijemi, ghushimi atomi kinimi, akuka kuami, eno timi kumtsu, aqemi na ampimi namu atukilo eno naghuto tukiqo qholo itshu wukhave.

¹⁶ Panonguno naghuto ngo atuquqo vilo ishipi, “Ni veqaluvelo eno akuka lakhulo iqa akeu zulono eno Bheriti loghu launo nikughutshuvelo;

¹⁷ kughengu panongu loghu tsala ighivae eno khuno tipaulo puthugho kulupu kya?”