Piyeküsü 3 - BAIBEL (BSI)

Sardia lau Atsape

¹ “Sardia akukuhoulo kungumi akeu lau yelu ani: “Hipauye Alhou kimthe ghahwu tsuni eno ayepu tsuni peakeu tsapeke. Ino okumlaqo ithiani; noye akithi kemu akuxu kua je puani.

² Idathuvelo, eno noye kiu pe anikeno tipau qhoyi thimphi lono shikumtolulo, kughengu iLhou zulo niye okumla shiwotolupe aghikeu ithumlae.

³ Tishiaye, kiu oshikave akeno eno nono kiu chiluve akeno kumsuchilelulo; tipau pechelo eno oxine launo xaideghilo. Nono idathughimo aye, niye kupukami lakhi toi ighi nani, eno ino kiu tuqhudo lono olau ighini cheni keno noye mtha nani.

⁴ Ikemu tilau Sardia lo nongu khami ani timi tipaqoye panongu phimini shou axine shipuku mphike. Timi tipaqoye metsughoi keu phimini pepu puzu igholo xu nani, kughengu panonguye titoi shikeuno akuzupuke.

⁵ Khunono theqhikulushi toluni keno paye titoi aphimini metsughoyi keu pepu nani, eno niye kuxumi kaku lono paje khilemu nuxavetsumo nani eno iPuh zulo eno pawu kungumi zulono paye ilaumi kepi ino piphetsu nani.

⁶ Khunono akini puani keno Aghungu no akukuhouqo lau piakeu chilupelo!”

Filadelfia lau Atsape

⁷ “Filadelfia akukuhoulo kungumi akeu lau yelu ani: “Hiye akimtheu eno amikuchou tsapeke. Paye David khadu peani, pano khaqhi aye khunomu tipau khavemlae, pano khavekeu khunomu khaqhimlae.

⁸ Ino okumlaqo ithiani; julo ino ozulo ahukikha lakhi khaqhi puatsu ani, tipauye timi khunomu khavemla nani; ino ithi anike noye akuka kitila likhi ani ikeghi noye itsape hu pelu acheni eno ije pevechemoe.

⁹ Julo, ti khunoqono panonguye Judami kepi cheni kemu panonguye ti kumo puzu kimkimiqo keno, panonguye Satan laumi qoke, ino panongu pelo ighi puzu opukhu phivilo itsaiqipe nani, eno ino okimiyeche keu panonguno ithi nani.

¹⁰ Kutuu khelulo pi ino ahzatsukeu nono peluke ghenguno nighi shilukusa tuqhudo lono ayeghiqha shou akemi pejuniye akeu launo oxapheluve nani.

¹¹ Niye keyi ighini cheni; nono peakeu mutotoi tsuqupe alo, tishianguno khuu pelomu owu tokulu saxu suxalu vepemonike.

¹² Khunono theqhikulushi tolunikeno, ino pa pelo iLhou chinekilo atsukucho lakhi shipe nani; paye tipau lono khilemu khalau wuvemo nani, eno ino pa shou iLhou je eno iLhou phughi je yepuku nani. Aphughi tiye kungughalo Alhou launo iqighinikeu Jerusalem akitheuke. Ije akitheu ghi ino pa shou yepuku nani.

¹³ Khunono akini puani keno Aghungu no akukuhouqo lau piakeu chilupelo!”

Laodikia lau Atsape

¹⁴ “Laodikia kukuhoulo kungumi akeu lau yelu ani: “Atsape hipauye Amen launoke, pukhukuluu eno ashepeu kuchou; Alhou no lhophe puakeqo shou atughiu launoke.

¹⁵ Ino okumlaqo ithi ani; noye mukomughai keumu kumo momu shukuthuyi keumu kumoe. Noye shukuthuyikeu momu mukomghai keu shipenishike!

¹⁶ Ikemu shukuthuyimo momu mukomghayimono lupunhake ghenguno ino ikichi lono oqhileve nani.

¹⁷ Nono ishi picheni, ‘Niye kinikuluke eno nibonileivae, niye kiumu avehupu shiamoe.’ Ikemu noye kiutoi itamujui kimiye kepushi anikeno noye muthano ani. Noye aqu-aghashi anhethi iche eno aphi kumsa ngo anie.

¹⁸ Tishiaye, ino oloputsu tsu anike ilauno thakimtheve keu shunayi qhululo tishianguno noye kinikulu shilupe nike, eno ilauno ophimini metsughoyi keu qhululo, tishianguno onhapulu kepushi eno ophi kumsa akeu kukujopu ithulu pemonike; eno onhethi nupu kepu qhululo tishianguno opelo ithulu penike.

¹⁹ Ino kimiye chekemiye sakiyi eno aghime tsu cheni. Tishiaye amlo tsuqhiyi shilo eno oxine launo xaideghivelo.

²⁰ Julo, ino ahukikha phivilo puthughono kukhu cheni; khunono isutsa chiluno ahukikha khaqhini keno ino pa lau iloghini eno pa sasu kuchukusho shini.

²¹ Khunono theqhikulushi toluni keno ino theqhi kulushi toluve puzu iPu gholo pa kuka lakhulo iqalu ketoi, ikuka lakhulo igholo iqalupe nani.

²² Khunono akini puani keno Aghungu no akukuhouqo lau piakeu chilupelo!”