Piyeküsü 21 - BAIBEL (BSI)

Kungugha Kithe Ayeghi Kithe

¹ Tileno ino kungugha kithe eno ayeghi kithe lakhi ithulu. Kungugha atughiu ayeghi atughiu eno azughiye hauve.

² Eno Akimthe phughi, Jerusalem Akitheu hu kungughalo Alhou launo iqicheghikeu ino ithulu. Hiye kulaliu lakhino li kimi sasu kusholuniye aphimini pepusu akeshi aphughi hipauye kishekulu shi kutopesu che.

³ Akuka lakhu lono asutsa kuloghi lakhi ishi pikeu ino chilu: “Julo, itehiye Alhou no timi gholo acheuvae! Pano panoqo gholo xu nani eno panonguye pawu timi shive nani. Alhou ampino panoqo gholo anani eno paye panongu Lhou shive nani.

⁴ Panoqo nhethi lono anhezu kumtsu pano isuvetsu nani. Akithi khilemu kuhave nani, amlo imekeu, akuqa momu aghime hauve nani. Aqau thimeqoye wokhavae.”

⁵ Tileno akuka lakhulo iqa akeu huno ishipi, “Itehiye ino thwokha akithe shitsu ani!” Pano highi ivilo ishipi, “Hipau yelulo, kughengu atsa hipaqoye kuchou eno pukhube kulupuke.”

⁶ Pano pi, “Hiye tavae! Niye Alfa eno Omega ke, abothu eno kishekhakeuke. Khunono tughuthi anikeno akuxupu zupuki lono azu sholu kepushi ino kumsano tsu nani.

⁷ Khunono theqhikulushi tolunikeno paye ilauno hipau ithulu nani: Ino pa Lhou shiluve nani eno paye inu shiluve nani.

⁸ Ikemu akumsami, pulukumlami, kitiqevekemi, ghikiqhimi, kusalhami, kuduu shichekemi eno ajulho shisukeu mllakemi eno kimkimi kumtsu ami ngo amichu pitiakeu yizulo anani, tiye akithi akiniuke.”

Jerusalem Akitheu

⁹ Kungumi tsuni pusa bohu tsuni peakeqo gholo lakhino ilau ighino pi, “Ighilo, Kulaliu, Bheriti nipu opiyenike.”

¹⁰ Aghungu no ipeithaluve eno kungumi huno naghuto shishe qhemghaikeu lakhi toghilo ixapusu wue. Pano Jerusalem, Akimthe phughi hu kungughalo Alhou launo iqichekeu ipiyeke.

¹¹ Tiye Alhou wu akimthe jukuvuno yevuqai pesu ae. Aphughi huye amekusho-tu lakhi toi yevuqai pea, jasper-tu toi tsughukhuyike.

¹² Tipau puwupe puakeu huye qhemghai kijeke eno tipaulo khagho chighikini ae eno kungumi chighikinino khaghoqo kheae. Khagholo Israilmi alagha chighikiniqo je yepuku pua.

¹³ Puwupe puakeu jibo lakhikhilo khagho kuthuthu ae, kuthuno kipelau, kuthuno apeu, kuthuno ahuu eno kuthuno kulolau ishi ae.

¹⁴ Aphughi puwupe akeu huye atuqu chighikini shouno shipukupe puae, atuqu tipaqo shou Bheriti wu apostolmi chighikini je yepukupe puake.

¹⁵ Kungumi iputsa akeu huye mighikepu aqhaqhi lakhi shunayino shikeu pea, tiye aphughi ngo khagho eno tipau puwupe puakeu mighiniyeke.

¹⁶ Aphughi huye akijelau, akiqhelau eno akushulau aqhemishi aphiphike; kungumi huno mighijukepu aqhaqhi pesu aphughi hu mighijukelo tiye akijelau ghi, akushulau ghi eno akiqhelau ghi aqhemi kilomiter 2400.

¹⁷ Kungumi huno aphughi puwupe puakeu mighijukelo tiye akiqhelauno miter lhotsughoke, tiye thosulo mighichekeu kiqike, khikhi kungumi huno peitha akeno tipauke.

¹⁸ Aphughi puwupe puakeu huye jesper-tuno shipepua, eno aphughi huye ayina toi shunayi akimtheno shipepua.

¹⁹ Aphughi puwupuakeu boqha tuquqoye amekushou-tu jeli kutomo pesu ananu shipepua. Atughiu boqha tuquye jasper-tuno shipepua, akiniu boqhatuquye safir-tuno, akuthuuye agat-tuno, abidiuye emeral- tuno.

²⁰ apunguuye oniks-tuno, akutsughou ye karnelia-tuno, akutsuniuye quartiz-tuno, akutacheuye beril-tuno, atokuuye topaz-tuno, achighiuye khalsedoni-tuno, chighiaqhaqhiuye turqoiz-tuno eno chighi akiniuye amythis-tuno shipe pua.

²¹ Khagho chighi kini huye achiku chighikinike; khagho lakhikhino achiku kuloghi lakhikhi lono shike. Aphughi tipaulo alaghilaqoye ayina toi jupililu eno shunayi akimtheno shipepua.

²² Niye aphughi tipaulo achineki ithumlae, kughengu tipau phughi chinekiye Ampeu, Alhou Akumtou eno Bheritike.

²³ Aphughi tipau yepuvu nike ghenguno tsukinhe momu aqhi kuvu avehupu shimoe kughengu Alhou wu akimthe jukuvuno tipau yepuvu ake, eno Bheriti huno tipau kuluboke.

²⁴ Ayeghilomino tipau kuvu lono chelu nani, eno ayeghilo kukamino panoqo wu kinikulu tipaulo sughi nani.

²⁵ Aphughi tipau khaghoye ghulo atsu-tsu khaqhipe pua nani, tipaqoye khilemu khavemo nani, kughengu tilehiye khilemu putho tsala kuha nani.

²⁶ Ashiayeh jeliqo wu kinikulu eno akijivilo chekeu pesu aphughilo suiloghive nani.

²⁷ Ikemu kiukiumu alhoksano kitiqevekeu thaqhuye aphughi tipaulo ilomla, momu khunono akukujopu kumla shi cheni eno miki cheni keno tilehi ilomla nani. Timi khunoqo je Bheriti wu akuxupu kakulo yepe puaghini keno tipaqo likhino aphughi tipaulo ilolu nani.