Piyeküsü 2 - BAIBEL (BSI)

Efesia lau Atsape tsuakeu

¹ “Efesia kukuhoulo kungumi akeu lau yelu ani: “Atsape hipauye khuu-u ajeu ayepu tsuni pe ani keno eno khuno shunayino shikeu akulu kibepu tsuni mtalo ani keno tipau launoke.

² Ino okumlaqo, oghichheghime eno nono kutuukulu shikeu ithitoi ani. Noye alhoksami pelo tishi shiape nishi chemokeu ino ithi ani. Khunono pano likhi pano pesu apostolmi ipiche keno tipaqo nono miqejuke eno panoqoye kimkimi shiaghike.

³ Ino ithianike noye kutuukulu shiani eno ije ghenguno aghime sholuke ikemu noye aghuthi sumphike.

⁴ Ikemu niye oshou hipau pikepu ani: noye atughulo hutoi ikimiye chemovae.

⁵ Tishiaye, noye kiutoi veqhive akeno kumsululo. Xaideighilo, eno nono atughulo kiu shichekeno tipau shilo. Nono xaideghimo napiaye ino olau ighi puzu owu akulukibepu tipa alono ikhive nani.

⁶ Tishiepimu noye hipau ogholo aphie, noye Nikolaitmi no shichekeu mithi cheni, tipauye nighi mithi achenike.

⁷ Khunono akini puanikeno Aghungu no akukuhouqo lau piakeu chilu pelo! Khunono theqhikulushi toluni keno, Alhou wu Aghutu lo akuxupu subo akeu xathi chulupe nani.”

Smurna lau Atsape

⁸ “Smurna akukuhoulo kungumi akeu lau yelu ani: “Atsape hipauye atughiu eno ashekhau tsapeke, khuu thiveno akuxu shiluve keno tipau tsapeke.

⁹ Ino owu shilukusa eno oquagha ithi ani, ikemu kuchouno noye kinikulu shiani. Khunoqono panonguye Judamike ipi cheni kemu tishimokeno, tipaqono othaigha keu ino ithi ani; pano muqoye Satan laumike.

¹⁰ Aghime sholuniye akeulo noye musa kevilo. Julo, tughamino nongu pejuniye nongu gholo khamiye akughukilo suve nani, eno atsala chighi kutolo nongu shikighime nani. Akithi kutolo aghokulu shilo eno akuxupu pesu osaxu ino otsunani.

¹¹ Khunono akini puani keno Aghunguno akukuhouqo lau piakeu chilupelo! Khunono theqhikulushi toluni keno akithi akiniu pesu ghuzamo nani.”

Pergamos lau Atsape

¹² “Pergamos kukuhoulo kungumi akeu lau yelu ani: “Atsape hipauye azutakihi kutsugha pe akeu launoke.

¹³ Nono khile acheni keno Satan kuka lakhu ghi tile anipi ino ithi ani. Noye ije mutotoi tsuqupe cheni eno kughou nongu gholono ishepekishiu, ino pukhukulu Antipa ghiqhiveke tsala ghulokilo ghi, Satan no achekeulo, noye ishou akupulu achekeu phevemoe.

¹⁴ Ikemu niye oshou thime lakhi kini pikepu ani: ogholo timi khamino Balaam kukutsu pape cheni. Balaam no Balak pelo Israilmi zusawo ajulho shisuno mllakeu chuqupu chupenikeushi shika eno Israilmi pelo salhashupuve peniye shikake.

¹⁵ Tihutoi Nikolaitami kukutsu papekemi ghi nongu gholo anike.

¹⁶ Tishiaye, axine lono xaideghivelo. Tikumo aye, niye pai olau ighi nani eno ikichi lono ipeghikeu zuta pesu timi tipaqo sasu aghushi nani.

¹⁷ Khunono akini puani keno, Aghungu no akukuhouqo lau piakeu chilu pelo! Khunono theqhikulushi toluni keno manna kusupe puakeu hami ino tsu nani; eno metsughoikeu tu lakhi ino milakhikhi tsu nani eno tipau shou ajekithe lakhi yepuku puani, atu tipau ithulukemino kumoaye kutami khunomu aje tipau ithimo nani.”

Thuatira lau Atsape

¹⁸ “Thuatira kukuhoulo kungumi akeu lau yelu ani: “Atsape hipauye Alhou Nu, ami mili toikeu nhethi puakeu eno alazayi pitikutsughu pesu mulapuyi aketoi keu pukhu puakeu launoke.

¹⁹ Ino okumlaqo ithiani — kikimiye, akukuphu, akupulu, kheakulushi mlakeu ino ithi ani. Atughilo nguno itehino alaushi mla akeu ithi ani.

²⁰ Ikemu niye oshou pikepu hi ani: Noye Jezebel atotiu lau kusuqhilukeu anike. Lino li likhi liye tungkupulimi kepi cheni, eno salhashupukeu ngo ajulho shisuno mllakeu chuqupu chupe nike lino shikapiye eno sakughuzuke.

²¹ Li pelo axine lono xaideghipe nike ino ado tsuke ikemu lino salhashupu chekeu lono xaideghi nishimoe.

²² Julo, ino li kughapesu azualo veda nani, eno khunoqono li sasu salha cheni keno, panonguno li sasu alhoksa shichekeu launo xaideghivemo aye, panongu ghi li gholono aghime kithikhi sholupe nani.

²³ Li pape chekemiqo ghi pithive nani, tileno akukuhou kumtsuno niye timi kukumsu eno timi mlo lhejuchekeu kenapi ithi nani. Nongu kumla qhemi lono milakhikhi lau ino ajume tsu nani.

²⁴ Ikemu Thuatira lo nongu khunoqono akukutsu lhoksa hipau pechemo keno, nongu khunoqono ‘Satan wu tuqhotugho’ akeu ithive akeno, nongu vilo ino hi piani: niye nongu shou amakho kutau betsuamoe,

²⁵ ikemu ino ighimoke kutolo nonguno kiu ani keno tipau mutotoi tsuqupe alo.

²⁶ Khunono theqhikulushi toluni eno ashekha kutolo ikumla peluni keno, ino iPuh launo akuka ithuluke toi panongu pelo ashiayeh peithalu kepu kuka ino tsu nani.

²⁷ Pa pelo ayikusu pesu ashiayeh qo shou ayehpe pe nani, eno ayeghili toi tipaqo kubopiniyivetsu nani;

²⁸ eno ino inaqheyepu pa tsu nani.

²⁹ Khunono akini puani keno Aghungu no akukuhouqo lau piakeu chilupelo!”