Piyeküsü 19 - BAIBEL (BSI)

¹ Hipa tikhau, kungughalo timi aqokitikhi sutsa toikeu ino chilue. Tipau sutsaye ishi chilu, “Alhou sheqhelo! Xakulupu, akimthe jekipi eno akukaye niLhou wuke!

² Pawu kughakuthaye kuchou eno achipike. Kughengu pano ngosukumla ashupuu shou aghime tsuke, lino li salha pesu ayeghi shipusa cheke. Alhou no li shou aghime tsukeuye lino pa qemiqo pithive kehue.”

³ Itaghi panonguno asheshu pi, “Alhou sheqhelo! Aphughi akijeu pitikeu michhiye alhokupuju phoipeghi nanike!”

⁴ Muchomi mukubidi ngo xuakeu lhoxu bidi huno itsaqi puzu Alhou akuka lakhulo iqa akeu mllaghi ishipi, “Amen! Alhou sheqhelo!”

Bheriti Kulakupu Ghulhu

⁵ Tileno akuka lakhu lono asutsa lakhi ishipi: “NiLhou sheqhelo! pa qemi kumtsu, timi kumtsu, kijemi kitilami ghi pa sumsa chekemiqo pa sheqhelo!”

⁶ Tileno timi aqokitikhi ghugha hutoikeu, azuphapha kuloghino igha akeu ghugha toikeu, tsutsukusu toikeu sutsano ishi pikeu ino chilu: “Alhou sheqhelo! Kughengu Ampeu, niLhou Akumtouye Akukau ke!

⁷ Ningu alokiqishi alovini nolo; paye shishe kije kehu ninguno pa sheqheni nolo! Kughengu Bheriti wu kulakupu ghuloki ighivae, pawu kulaliuye tipau ghenguno kutopesu ngoluvae.

⁸ Li likhi lino phepheyikeu phi eno akimthe phuphuyikeu pepuluvae.” Phephe pheyikeu phi kimthe huye Alhou wu timiqono amikucho kumla shikeu huke.

⁹ Tileno kungumi huno ivilo ishipi: “Hipau yepe qhilo. Bheriti wu kulakupu ghulhulo khunoqomi kusuni keno tipano kumghae.” Pano ivilo highi pi, “Hipaqoye Alhou tsa kuchouke.”

¹⁰ Tileno ino pa pukhu phivilo mllaniye iluiqive, ikemu pano ivilo ishipi, “Tishikevilo! niye no eno othikuzumi khunoqono Jisu no kuchou shepe shikeu ikhilu cheni keno tipaqo kumtsu gholo akusami aqemi lakhike. Alhou mllalo!” Kughengu Jisu no kuchou shepe shikeuno tungkuptsa pinikeu nguaghapuke.

Khurshi akimiye shou Ikuchekeu

¹¹ Tileno kungugha khaqhikeu ino ithulu eno tilehi khurshi akimiye lakhi ae. Tipau shou iku puzu chekeu pesu Pukhukulu eno Kuchou ipi kutsue; pano achipiu xakutha pesu kughatha eno aghu shiche.

¹² Pa nhethiye ami mili toi eno pa kutsulo akutsukuqho kutomo puae. Pa shou aje lakhi yepuku puae, ikemu pa likhino kumoaye khunomu tipau mthae.

¹³ Pano chijebobo phi tipau uchekeuye ahjino dapusu ae. Pa jeye “Alhou Tsa” ipi kuche.

¹⁴ Kungughalo ghushimino khurshi akimiyeqo shou iku puzu phepheyikeu phi akimthe metsughoikeu pepuno pa papeche.

¹⁵ Azutakihi lakhi pa kichi lono ipeghi eno pano tipau pesu ashiayehqo shou tolu nani. Pano ayikusu pepuzu panoqo shou ayehpe nani eno Alhou Akumtou wu aloghu tsughuphe chekeu tughuko lono aji taphe nani.

¹⁶ Pano chijebobo phi uchekeu eno pa pukhulo aje hipau yepukupe pua: “Kukami shou Akukau eno ampimi shou Ampeu.”

¹⁷ Tileno tsukinhelo kungumi lakhi puthugho aghikeu ino ithulu. Pano kunguu aghau yechekeqo kumtsu vilo asutsa kuloghi lono ighamukupi: “Ighilo, eno Alhou wu aghulhu kijeu ghenguno kuho kumqolo!

¹⁸ Ighilo eno kukami shi, Generalmi shi eno ghushimiqo shi chulo; khurshi ngo tipa shou ikuchekeqo shi timi kumtsu shi, aquaxemi timi qechemokemi shi eno kijemi kitilami shi chulo!”

¹⁹ Tileno tughashi ngo ayeghilo kukami eno panoqo ghushimi khurshi shou ikupuzu chekeu ngo pawu ghushimi sasu aghushiniaye kumqokeu ino ithulu.

²⁰ Tughashi ngo pa gholo kichile tungkupu pa zulono akumzapu kumla shichekeu ngo ishi akughu shipeniye kughaluve. (Kichile tungkupuno akumzapu kumla shipuzu khunoqono tughashi wu amchi pe-a eno khunoqono tughashi wu ajulho shisukeu mllachekeno tipaqo pishiqhi acheke.) Tughashi ngo kichile tungkupu pama kini kujo akuxuno amiyizulo amichu pesu pitiakeulo vesuve.

²¹ Pano wu ghushimiye khurshi shou iqachekeu kichi lono azuta ipeghikeu no ghiqhikhave; eno aghauqono chuluke thaqhu panoqo shi chuve.